Zezabel, en move larenn

APRE ki lerwa Yarobam ti mor, sak lerwa ki ti diriz sa 10 tribi dan nor Izrael ti move. Lerwa Aab ti pli move lerwa dan tou. Eski ou konnen akoz? En pli gran rezon se akoz son madanm Larenn Zezabel, ti move.

Zezabel pa ti en madanm Izraelit. I ti fiy lerwa Sidonn. I ti ador sa fo bondye Baal, e i ti osi fer Aab ek en kantite Izraelit ador Baal. Zezabel ti ay Zeova e i ti touy en kantite profet Zeova. Lezot ti bezwen kasyet dan bann lakav afen ki zot pa ganny touye. Si Zezabel ti oule en keksoz i ti pou menm touy en dimoun pour li ganny sa keksoz.

En zour lerwa Aab ti vreman tris. Alor Zezabel ti demann li: ‘Akoz ou tris ozordi?’

‘Akoz sa ki Nabot in dir mwan,’ Aab ti reponn. ‘Mon ti oule aste son plantasyon rezen. Me i’n dir mwan ki mon pa pou kapab aste.’

‘Pa trakase,’ Zezabel ti dir. ‘Mon pou pran sa plantasyon pour ou.’

Alor Zezabel ti ekrir en let serten zonm ki ti sef dan lavil kot Nabot ti reste. I ti dir zot: ‘Fer serten bann bon nanryen dir ki Nabot in donn malediksyon Bondye ek lerwa.’ I ti kontinyen: ‘Apre fer Nabot al an deor lavil e anvoy ros lo li ziska ki i mor.’

Osito ki Zezabel ti antann ki Nabot ti’n mor, i ti dir avek Aab: ‘Aprezan ale e pran son plantasyon.’ Eski pa ou dakor ki Zezabel ti merit ganny pini akoz i ti fer sa move keksoz?

Alor, plitar, Zeova ti anvoy Yeou pour pini li. Kan Zezabel ti antann ki Yeou ti pe vini, i ti penn son lizye e i ti esey aranz li pour fer li zoli. Me kan Yeou ti vini e i ti vwar Zezabel par lafnet, i ti kriy avek bann zonm ki ti dan pale: ‘Larg li anba!’ Sa bann zonm ti obei, parey ou kapab vwar dan sa portre. Zot ti anvoy li anba, e i ti mor. Sa ti lafen sa move Larenn Zezabel.