Bondye ti ed lerwa Izkiya

ESKI ou konnen akoz sa zonm pe priy Zeova? Akoz i’n met sa bann let devan lotel Zeova? Sa zonm i apel Izkiya. I lerwa sa de tribi dan sid Izrael. I dan en kantite problenm. Akoz?

Akoz bann larme Asiryen ti’n deza detri sa 10 tribi dan nor. Zeova ti’n les sa arive akoz sa bann dimoun ti vreman move. Aprezan bann larme Asiryen ti’n vin lager kont sa 2 tribi dan sid.

Lerwa Lasiri ti’n fek anvoy bann let pour Lerwa Izkiya. Se sa bann let ki Izkiya ti’n met devan Bondye. Dan sa bann let lerwa Lasiri ti pe monk Zeova, e i ti pe demann Izkiya pour abandonnen. Izkiya ti priye: ‘O Zeova, sov nou dan lanmen lerwa Lasiri. Alor tou nasyon i ava konnen ki ou tousel ou Bondye.’ Eski Zeova ti pou ekout Izkiya?

Izkiya ti en bon lerwa. I pa ti parey bann move lerwa sa 10 tribi dan nor Izrael oubyen parey son papa Aaz ki ti en move lerwa. Izkiya ti obzerv byen lalwa Zeova. Apre ki Izkiya ti fini priye, profet Izai ti anvoy li sa mesaz ki ti sorti kot Zeova: ‘Lerwa Lasiri pa pou antre an Zerizalenm. Son bann solda pa pou apros avek sa lavil e zot pa pou tir okenn fles kont sa lavil.’

Get sa portre lo sa paz. Eski ou konnen lekel sa bann solda ki’n mor? Zot tou zot bann Asiryen. Zeova ti anvoy son bann lanz, e dan en lannwit 185,000 solda Asiryen ti mor. Alor lerwa Lasiri ti abandonnen e i ti retourn kot li.

Sa de tribi dan sid ti ganny sove, e pour en pe letan bann dimoun ti viv anpe. Me apre ki Izkiya ti mor son garson Manase ti vin lerwa. Manase ek son garson Amonn ki ti vin lerwa apre li, zot ti de move lerwa. Ankor enn fwa sa pei ti ranpli avek vyolans ek krim. Kan lerwa Amonn ti ganny touye par son prop serviter, son garson Yosiya ti vin lerwa sa 2 tribi dan sid.