Lavi dan en nouvo Lemonn anpe

Ler ou get sa desen lo sa depliyan, ki santiman ou gannyen? Eski ou pa ti a kontan vwar sa lape, boner, ek prosperite parey ou vwar la? Byensir. Me eski i zis en rev pour krwar ki sa bann kondisyon pou egziste lo later en zour?

I paret ki laplipar dimoun i krwar sa i zis en rev. Ozordi nou vwar lager, krim, lafanmin, maladi, ek lavyeyes—pour mansyonn zis ennde. Malgre tousala, nou annan lespwar. Konsernan lavenir, Labib i dir ki “nou pe espere dapre promes [Bondye] en nouvo lesyel ek en nouvo later kot pou annan lazistis.”—2 Pyer 3:13; Izai 65:17.

Dapre Labib, sa “nouvo lesyel” ek sa “nouvo later,” i pa sa vre lesyel ek later ki nou vwar avek nou lizye. Sa later ek sa lesyel ki nou vwar ti ganny kree parfe, e Labib i montre ki i pou reste pour touzour. (Psonm 89:36, 37; 104:5) Sa “nouvo later” i endik en sosyete imen drwat ki pou viv lo later, e sa “nouvo lesyel” i en rwayonm ouswa en gouvernman parfe dan lesyel ki pou gouvern sa sosyete imen lo later. Me eski i rezonnab pour krwar ki “en nouvo later,” ouswa en nouvo lemonn merveye, i posib?

Mazinen ki okonmansman ler Bondye ti kree later, sa bann kondisyon ideal ti egziste lo later. I ti met premye koup imen dan Paradi Edenn e donn zot en travay merveye: “Fer zanfan e vin bokou, ranpli later e domin li.” (Zenez 1:28) Wi, Bondye ti oule ki zot fer zanfan e finalman fer later antye vin en Paradi. Menm si plitar zot ti dezobei Bondye, ki ti fer zot pa kapab viv lo later pour touzour, plan Bondye pa’n sanze. I pou ganny akonpli dan en nouvo lemonn!—Izai 55:11.

Anfet, ler ou fer lapriyer Notre Père, e demande ki Renny Bondye i vini, ou pe priye ki son gouvernman dan lesyel i retir mesanste lo later e gouvern sa nouvo lemonn. (Matye 6:9, 10) Nou kapab asire ki Bondye pou reponn sa lapriyer, akoz son Parol i promet: “Bann dimoun drwat pou posed later, e zot pou reste lo la pour touzour.”—Psonm 37:29.

Lavi dan nouvo Lemonn Bondye

Rwayonm Bondye pou anmenn bann gran byenfe lo later. I pou akonpli tou bann bon keksoz ki Bondye ti’n plàn okonmansman pour son pep rezwir lo later. Laenn ek diskriminasyon pou nepli egziste, e finalman tou dimoun lo later pou vin en vre zanmi avek kanmarad. Dan Labib, Bondye i promet ki i pou “fer arete lager ziska dan bann landrwa pli lwen lo later.” “Nasyon pa pou lev lepe kont nasyon e zot pou nepli aprann lager.”—Psonm 46:9; Izai 2:4.

Later antye pou finalman vin en paradi. Labib i dir: “Dezer ek rezyon ki napa delo pou rezwir, e laplenn dezer pou dan lazwa e i pou fleri parey en zoli fler. . . . Delo pou koule dan landrwa dezer e lavalas dan laplenn dezer. Later sek pou vin parey lanmar kouver avek zon, e later ki napa delo pou vin parey bann sours delo.”—Izai 35:1, 6, 7.

Nou pou annan tou rezon pour ere dan Paradi lo later. I pou nepli annan lafanmin. Labib i dir: “Later pou sirman donn son prodwi.” (Psonm 67:6; 72:16) Tou dimoun pou vwar rezilta zot travay, parey nou Kreater i promet: “Zot pou plant pye rezen e zot pou manz son fri. . . . zot pa pou plante pour en lot manze.”—Izai 65:21, 22.

Dan nouvo lemonn Bondye, dimoun pou nepli viv enn lo lot dan bann gran apartman ouswa dan bann bidonvil, akoz Bondye in deside ki: “Zot pou konstri lakaz e zot pou reste ladan . . . Zot pa pou konstri pour en lot reste.” Labib i osi promet: “Zot pa pou rente pour nanryen.” (Izai 65:21-23) Dan sa fason, tou dimoun pou annan en travay prodiktif e satisfezan. Lavi pa pou annwiyan.

Avek letan, Rwayonm Bondye pou menm reetablir sa lape ki ti egziste dan zarden Edenn ant bann zannimo, e osi ant imen ek bann zannimo. Labib i dir: “Lelou pou vreman reste avek en pti mal mouton pour en serten letan, e en leopar pou dormi avek en pti kabri. En pti bef, en pti lyon avek krinyer, ek bann zannimo ki ganny byen nouri, zot tou zot pou ansanm; e en pti garson pou gid zot.”—Izai 11:6-9; Osea 2:18.

Zis mazinen, dan Paradi lo later tou maladi ek dezabilite fizik pou osi ganny geri! Parol Bondye i asir nou: “Okenn zabitan pa pou dir: ‘Mon malad.’” (Izai 33:24) “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”—Revelasyon 21:4.

Konman sa i kapab vin en Realite pour ou

Sirman ou leker i touse avek sa bann promes Bondye konsernan lavi dan son nouvo lemonn kot pou annan ladrwatir. Menm si serten i kapab vwar sa bann benediksyon tro bon pour vin vre, zot pa tro bon pour sorti kot nou Kreater ranpli avek lanmour.—Psonm 145:16; Mika 4:4.

Byensir, i annan serten keksoz nou bezwen fer si nou anvi viv pour touzour dan sa Paradi ki pe vini. Zezi ti montre en keksoz enportan, ler i ti pe priy Bondye: “Lavi eternel . . . savedir ki zot konn ou konman sel vre Bondye, ek Zezi-Kri ki ou’n anvoye.”—Zan 17:2, 3.

Alors, si nou vreman anvi viv dan nouvo lemonn Bondye, nou devret premyerman aprann lavolonte Bondye e apre fer li. Parski larealite se ki: “Lemonn pou disparet ek tou son bann dezir; me sa ki fer lavolonte Bondye i reste eternelman,” pour rezwir pour touzour bann byenfe ki sorti kot nou Kreater ki kontan nou bokou.—1 Zan 2:17.

Eksepte kan i endike, bann sitasyon Lekritir Grek in tire dan Nouvo Testaman an Kreol Seselwa.