SAPIT WIT
Protez ou fanmiy kont bann move lenfliyans
1-3. (a) Kote bann move lenfliyans ki menas fanmiy i sorti? (b) Ki lekilib paran i bezwen devlope pour protez zot fanmiy?
LAPLI pe tonbe e in ariv moman pour ou anvoy ou pti garson lekol. Ki ou pou fer? Eski ou pou les li sot deor san okenn parasol oubyen kapot? Oubyen eski ou pou met li en ta lenz ziska i nepli kapab bouze, zis pour ou protez li? Byensir, ou pa pou fer ni enn ni lot. Ou pou donn li zis sa ki i bezwen pour li pa ganny mouye.
2 Demenm, bann paran i devret trouv en bon fason pour protez zot fanmiy kont bann move lenfliyans ki antour zot, sorti partou kote. Sa bann move lenfliyans i vin atraver distraksyon, medya, kanmarad, e menm parler lekol. Serten paran i fer tro pti gin oubyen zot pa fer nanryen pour protez zot fanmiy. Lezot, i vwar preske tou lenfliyans an deor konman danzere, e zot telman priv zot zanfan ki prezan zanfan i santi konmsi zot pa kapab fer nanryen. Eski i posib pour annan en lekilib?
3 Wi i posib. Si en paran i tro sever, sa ki i pe fer pour protez son fanmiy pa vin efikas e i kapab anmenn bann gro problenm. (Eklezyast 7:16, 17) Me ki mannyer bann paran Kretyen i kapab trouv sa bon lekilib pour protez zot fanmiy? Konsider trwa domenn: ledikasyon, frekantasyon, ek distraksyon.
LEKEL KI POU ANSENNY OU ZANFAN?
4. Ki mannyer paran Kretyen i devret vwar ledikasyon?
4 Bann paran Kretyen i atas en gran lenportans avek ledikasyon. Zot konnen ki lekol i ed bann zanfan pour kapab lir, ekrir, kominike, e osi byen pour rezourd bann problenm. Lekol i devret osi ansenny zot ki mannyer pour aprann. Abilite ki zanfan i gannyen dan lekol i kapab ed zot pour reisi dan zot lavi kantmenm lavi dan sa lemonn ozordi pa fasil. Deplis, en bon ledikasyon i kapab ed zot pour annan en pli bon travay.—Proverb 22:29.
5, 6. Ki mannyer zanfan i kapab ganny ekspoze avek bann move lenformasyon lo sèks kot lekol?
5 Toutfwa, lekol i osi anmenn bann zanfan ansanm avek lezot zanfan. Bokou sa bann zanfan i annan bann fo pwennvi. Par egzanp, konsider zot pwennvi lo sèks ek moralite. Dan en lekol segonder an Nizerya, en zenn fiy ki ti annan en lavi dezord ti kontan donn konsey son bann kanmarad lekol lo sèks. Zot ti ekout li avek bokou lentere, menm si son bann lide ti ranpli avek keksoz ki pa ti fer sans e ki i ti’n trouve dan bann liv pornografi. I ti annan detrwa fiy ki ti swiv son konsey. An rezilta, enn parmi sa bann fiy ti tonm ansent avan marye e ti mor apre ki i ti esey fer avortman.
6 I tris pour dir ki serten sa bann move lenformasyon lo sèks ki egziste kot lekol pa sorti kot bann zanfan, me kot bann ansennyan zot menm. Bokou paran i trakase ler lekol i ansenny bann zanfan lo sèks san prezant lenformasyon lo bann prensip moral ek responsabilite. Manman en fiy 12 an ti dir: “Nou reste dan en landrwa ki atas en gran valer avek larelizyon ek tradisyon, e pourtan dan bann lekol segonder, zot distribye konndonm avek bann etidyan!” Li avek son mari ti trakase ler zot ti aprann ki zot fiy ti pe ganny propoze pour annan relasyon seksyel avek bann garson dan son laz. Ki mannyer paran i kapab protez zot fanmiy kont bann tel move lenfliyans?
7. Ki pli bon fason pour konbat bann move lenformasyon lo sèks?
7 Eski i bon pour kasyet ou zanfan tou keksoz ki annan pour fer avek sèks? Non. I pli meyer pour ansenny ou zanfan konsernan sèks ou menm. (Proverb 5:1) Dan serten rezyon Lerop ek Nor Lanmerik, bokou paran i evite koz lo sa size. Pareyman, dan serten pei Lafrik, bann paran i rarman koz lo sèks avek zot zanfan. En papa an Sera Leonn i dir: “I pa form parti kiltir Afriken pour fer sa.” Serten paran i krwar ki si zot ansenny zot zanfan lo sèks, sa pou donn zot bann lide ki pou fer zot konmans annan relasyon seksyel! Me ki Bondye i panse?
PWENNVI BONDYE LO SÈKS
8, 9. Ki bon lenformasyon lo bann size seksyel ki trouve dan Labib?
8 Labib i fer kler ki i pa en laont pour koz lo sèks dan en moman apropriye. An Izrael, pep Bondye ti ganny demande pour rasanble ansanm, enkli zot “bann pli pti,” pour ekout Lalwa Moiz ganny lir aotvwa. (Deterononm 31:10-12; Zozye 8:35) Lalwa ti fransman mansyonn plizyer keksoz ki annan pour fer avek sèks, ki enkli reg (peryod), sperm, fornikasyon, adilter, omoseksyalite, relasyon seksyel avek en manm fanmiy, ek relasyon seksyel avek zannimo. (Levitik 15:16, 19; 18:6, 22, 23; Deterononm 22:22) Apre ki sa bann keksoz ti’n ganny lir, bann paran ti bezwen eksplik zot zanfan ki ti san dout anvi konn sa bann keksoz.
9 I annan bann pasaz dan Proverb sapit senk, sis, ek set ki kontyen bann bon konsey lo danze bann relasyon seksyel imoral. Sa bann verse i montre ki parler nou kapab ganny tante pour komet imoralite seksyel. (Proverb 5:3; 6:24, 25; 7:14-21) Me zot ansennyen ki i en keksoz ki mal pour fer e i anmenn bann konsekans grav. Sa bann verse i osi ofer gidans pour ed bann zenn evit bann kondwit imoral. (Proverb 5:1-14, 21-23; 6:27-35; 7:22-27) Deplis, i opoz imoralite seksyel avek satisfaksyon ek plezir ki relasyon seksyel i anmennen dan maryaz, son kad apropriye. (Proverb 5:15-20) Pa sa i en bon legzanp lansennyman pour bann paran swiv!
10. Akoz ki donn bann zanfan konnesans Bondye konsernan sèks pa ankouraz zot konmans annan relasyon seksyel?
10 Eski en tel lansennyman i ankouraz bann zanfan pour konmans annan relasyon seksyel? Okontrer, Labib i ansennyen: “Par konnesans sa bann ki drwat i ganny delivre.” (Proverb 11:9) Eski pa ou anvi delivre ou zanfan avek bann lenfliyans sa lemonn? En papa ti dir: “Depi nou bann zanfan ti ankor pti, nou’n esey koz fran avek zot konsernan sèks. Alors, kan zot tann lezot zanfan pe koz lo sèks, zot pa anvi ale pour ekoute. I pa en keksoz nouvo pour zot.”
11. Ki mannyer bann zanfan i kapab ptit-a-pti ganny ansennyen lo bann keksoz entim dan lavi?
11 Parey nou’n vwar dan bann sapit avan, edik zanfan lo sèks i en keksoz ki devret konmans byen boner. Ler ou pe ansenny bann pti zanfan pour nonm bann parti lekor, pa inyor zot parti prive konmsi sa i fer onte. Dir zot bann non egzakt pour sak sa bann parti. Anmezir ki letan i pase, i enportan ki ou ansenny bann zanfan pour pa montre zot parti prive avek lezot dimoun e pour aprann pour met serten limit. Si i posib, papa ek manman ansanm i devret ansenny zanfan ki sa bann parti lekor i spesyal, ki zot pa devret ganny touse oubyen ganny ekspoze avek lezot dimoun. I pa devret osi zanmen ganny koz lo la dan en move fason. Ofiramezir ki zanfan i grandi, zot devret ganny enformen konman ki en zonm ek en fanm i ini ansanm pour fer en zanfan. Lemoman ki zot lekor i konmans antre dan ladolesans, zot devret deza konsyan bann sanzman ki pou ariv avek zot lekor. Parey ti ganny diskite dan Sapit 5, en tel ledikasyon i osi kapab ede pour protez bann zanfan kont labi seksyel.—Proverb 2:10-14.
DEVWAR PARAN
12. Ki bann move pwennvi ki souvannfwa ganny ansennyen dan bann lekol?
12 Bann paran i bezwen pare pour ranplas lezot fo krwayans ki kapab ganny ansennyen dan lekol avek sa ki bon. Par egzanp, bann filozofi lemonn tel parey evolisyon, nasyonalism, oubyen sa krwayans ki dir napa laverite absoli. (1 Korentyen 3:19; vwar Zenez 1:27; Levitik 26:1; Zan 4:24; 17:17.) Bokou ansennyan lekol i atas en kantite lenportans avek letid avanse. Kantmenm ledikasyon siplemanter i en swa personnel, serten ansennyan i dir ki sa i sel mwayen pour en dimoun reisi.a—Psonm 146:3-6.
13. Konman ki bann zanfan ki pe al lekol i kapab ganny proteze avek bann fo krwayans?
13 Pour ki paran i kapab ranplas bann move lansennyman avek sa ki bon, zot bezwen konnen ki kalite lenstriksyon zot zanfan pe gannyen. Alor paran, mazinen ki ou osi ou annan en devwar! Montre en lentere senser dan travay lekol ou zanfan. Koz avek zot apre lekol. Demann zot ki zot pe aprann, ki zot pli kontan, ki zot trouv difisil pour fer fas avek. Get zot devwar lakour, bann not, ek rezilta legzanmen. Esey fer konnesans avek zot ansennyan. Les bann ansennyan konnen ki ou apresye zot travay e ki ou anvi ede kot ou kapab.
BANN ZANMI OU ZANFAN
14. Akoz i enportan ki bann zanfan ki servi Bondye i swazir bon zanmi?
14 “Kote ou’n aprann sa?” Ki kantite paran ki’n demann sa kestyon, soke par en keksoz ki zot zanfan i dir oubyen fer ki zot pa ti pe ekspekte? Konbyen fwa larepons i ki i’n aprann avek en nouvo zanmi kot lekol oubyen dan vwazinaz? Wi, ki swa nou zenn oubyen aze, nou frekantasyon i afekte nou en kantite. Zapot Pol ti averti: “Pa les zot ganny anbete: ‘Move frekantasyon i gat repitasyon.’” (1 Korentyen 15:33; Proverb 13:20) Bann zenn sirtou, zot pli fasilman ganny enfliyanse avek zot kanmarad. Zot tant pour pa tro sir dan zot menm e parfwa zot kapab ganny dominen avek en dezir pour fer plezir e enpresyonn zot zanmi. I tre enportan, alor, ki zot swazir bann bon zanmi!
15. Ki mannyer paran i kapab gid zot zanfan pour swazir bann bon zanmi?
15 Parey tou paran i konnen, bann zanfan pa pou touzour fer bann bon swa. Zot bezwen serten gidans. I pa en kestyon swazir zot zanmi pour zot. Plito, anmezir ki zot grandi, ansenny zot pour servi zot bon zizman e ed zot pour vwar ki bann kalite zot devret rode dan en zanmi. Kalite prensipal se en lanmour pour Zeova e pour fer sa ki byen dan son lizye. (Mark 12:28-30) Ansenny zot pour annan lanmour ek respe pour bann dimoun ki annan lonnekte, labonte, zenerozite, e ki pare pour travay. Pandan letid lo Labib an fanmiy, ed zanfan pour rekonnet sa bann kalite dan bann personnaz Labib e apre pour rod sa menm kalite dan lezot dimoun dan kongregasyon. Montre legzanp par servi menm kriter pour swazir ou prop zanmi.
16. Ki mannyer paran i kapab vey kalite zanmi ki zot zanfan i swazir?
16 Eski ou konn bann zanmi ou zanfan? Akoz ou pa demann ou zanfan pour anmenn zot kot lakour afen ki ou kapab rankontre zot? Ou kapab osi demann ou zanfan ki lezot zanfan i panse lo sa bann zanmi. Eski zot annan repitasyon konman bann dimoun fidel oubyen konman bann dimoun ki viv de kalite lavi? Si vreman zot viv de kalite lavi, rezonn avek ou zanfan pour fer li vwar akoz en tel frekantasyon i kapab fer li ditor. (Psonm 26:4, 5, 9-12) Si ou remark bann sanzman ki pa apropriye dan konportman ou zanfan, dan son resanz, latitid, oubyen fason koze, petet ou bezwen koz avek li lo son bann zanmi. Ou zanfan i kapab pe pas letan avek en zanmi ki annan en move lenfliyans lo li.—Vwar Zenez 34:1, 2.
17, 18. Apard ki averti zot zanfan kont bann move frekantasyon, ki led pratik paran i kapab donnen?
17 Me i pa ase pour zis ansenny ou zanfan pour evit bann move frekantasyon. Ed zot pour trouv sa bann ki bon. En papa i dir: “Nou ti toultan esey rod ranplasman. Alor kan lekol ti anvi nou garson vin dan tim foutbol, mon madanm ek mwan, nou ti asiz avek li e diskite akoz ki sa pa pou en bon lide. Nou ti fer li vwar ki bann nouvo zanmi ki i ti pou gannyen ti a kapab vin en danze pour li. Me apre nou ti sizere pour pran serten lezot zanfan dan kongregasyon e anmenn zot tou zwe foutbol lo laplenn. Sa ti mars byen.”
18 Bann paran ki byen servi zot lespri i ed zot zanfan pour trouv bann bon zanmi e apre rezwir bann bon distraksyon avek zot. Toutfwa, pour bokou paran, distraksyon i en keksoz ki prezant difikilte.
KI KALITE DISTRAKSYON?
19. Ki bann legzanp dan Labib ki montre ki i pa en pese pour bann fanmiy anmize?
19 Eski Labib i defann anmize? Sertennman non! Labib i dir ki i annan “en letan pour riye . . . e en letan pour sotaye.”b (Eklezyast 3:4) Pep Bondye dan ansyen Izrael ti kontan lanmizik ek ladans, bann zwe ek devinet. Zezi Kri ti asiste en gran festen maryaz ek “en gran festen” ki Matye Levi ti organize pour li. (Lik 5:29; Zan 2:1, 2) I kler ki Zezi pa ti en dimoun ki ti anpes lezot rezwir. Fotespere ki riye ek lanmizman pa zanmen ganny vwar konman en pese dan ou lakour!
20. Ki paran i devret gard antet kan zot organiz bann distraksyon pour fanmiy?
20 Zeova i en “Bondye ere.” (1 Timote 1:11, NW) Alors ador Zeova i devret vin en sours lazwa, non pa en keksoz ki pa gou. (Vwar Deterononm 16:15.) Normalman, bann zanfan i ranpli avek lantouzyasm ek lenerzi ki kapab ganny depanse dan bann zwe ek distraksyon. Bann distraksyon ki’n ganny byen swazir i plis ki zis en lanmizman. I en fason pour en zanfan aprann e vin matir. En sef fanmiy i responsab pour fourni tou bezwen son lakour, enkli distraksyon. Toutfwa, fodre ki i annan lekilib.
21. Ki bann pyez ki egziste dan bann distraksyon ozordi?
21 Dan sa “bann dernyen zour” troublan, sosyete imen in ranpli avek bann dimoun ki “kontan plezir plis ki Bondye,” zis parey Labib ti profetize. (2 Timote 3:1-5) Pour bokou dimoun, distraksyon i keksoz ki preokip zot lavi. I annan en kantite distraksyon ki kapab fasilman pran plas bann keksoz pli enportan. Deplis, en kantite distraksyon modern i promot imoralite seksyel, vyolans, labi drog, ek lezot pratik danzere. (Proverb 3:31) Ki paran i kapab fer pour protez bann zenn kont sa bann distraksyon danzere?
22. Ki mannyer paran i kapab form zot zanfan pour fer bann bon desizyon konsernan distraksyon?
22 Paran i bezwen etablir bann limit ek bann restriksyon. Me deplis, zot bezwen ansenny zot zanfan konman pour konnen ki kalite distraksyon ki danzere e pour konnen si zot pe diverti tro bokou. En tel formasyon i demann letan ek zefor. Konsider en legzanp. En papa ki annan de garson ti remarke ki son pli gran garson ti pe ekout en nouvo stasyon radyo tre souvan. Alors, en zour kan i ti pe dray son kanmyon pour li al travay, sa papa ti konmans ekout sa menm stasyon. Tanzantan i ti arete pour ekrir bann parol serten sanson. Plitar i ti asiz avek son de garson e diskit sa ki i ti’n tande. I ti demann bann kestyon lopinyon, ki konmans avek “Ki ou panse?” e i ti pran letan pour ekout zot larepons. Apre ki i ti’n rezonn avek zot par servi Labib, sa de garson ti dakor pour pa ekout sa stasyon.
23. Ki mannyer paran i kapab protez zot zanfan kont bann move distraksyon?
23 Bann paran Kretyen ki annan bon zizman i verifye kalite lanmizik, progranm televizyon, kaset video, liv kartoun, zwe video, ek film ki enteres zot zanfan. Zot get sa desen lo kouvertir, parol bann sanson, zot lir bann rapor lo zournal e get bann ekstre. Bokou i soke avek serten “distraksyon” ki ganny fer pour bann zanfan ozordi. Bann ki anvi protez zot zanfan kont bann lenfliyans enpir i asiz avek fanmiy antye e diskit bann danze. Zot fer sa par servi Labib ek bann piblikasyon ki baze lo Labib, tel parey sa liv Les jeunes s’interrogent—Réponses pratiques? ek bann lartik dan magazin Latour Veyer ek Réveillez-vous!c Ler paran i etablir bann limit presi, ki konsistan e rezonnab, zot normalman vwar bann bon rezilta.—Matye 5:37; Filipyen 4:5.
24, 25. Ki bann bon form distraksyon ki bann fanmiy i kapab rezwir ansanm?
24 Byensir, restrikte bann distraksyon danzere i zis en bout sa lager. Sa ki move i devret ganny ranplase par sa ki bon. Sansan, zanfan i kapab al dan en move semen. Bokou fanmiy Kretyen i annan en kantite bon souvenir bann distraksyon ki zot in pas ansanm tel parey piknik, bann gran marse lo montanny, kanpe, bann zwe ek sport, vwayaze pour vizit bann fanmiy ek zanmi. Serten in vwar ki senpleman lir aotvwa ansanm pour relaks i en gran sours plezir ek rekonfor. Lezot i kontan rakont bann zistwar anmizan oubyen enteresan. Lezot ankor, in devlop bann pastan ansanm. Par egzanp, travay avek dibwa ek lezot travay artizanal, osi byen ki zwe bann lenstriman lanmizik, penn, oubyen etidye kreasyon Bondye. Bann zanfan ki kontan sa bann kalite distraksyon i ganny proteze kont bann distraksyon enpir, e zot aprann ki rekreasyon i plis ki senpleman asize nanryen fer e les en keksoz distrer zot. Partisipe i pli gou ki zis gete.
25 Bann rankont sosyal i osi kapab en bon form distraksyon. Ler zot ganny byen sipervize e pa annan tro bokou envite oubyen pran tro bokou letan, zot kapab donn ou zanfan plis ki zis lanmizman. Zot kapab ede ranforsi sa lyen lanmour dan kongregasyon.—Vwar Lik 14:13, 14; Zid 12.
OU FANMIY I KAPAB RANPORT LAVIKTWAR LO LEMONN
26. An rapor avek protez fanmiy kont bann move lenfliyans, ki sa kalite pli enportan ki manm fanmiy i devret annan?
26 San dout, protez ou fanmiy kont bann move lenfliyans sa lemonn i demann en kantite travay. Me pour kapab reisi, i annan en keksoz ki pli enportan ki okenn lezot keksoz. Se lanmour! Ler bann manm fanmiy i pros avek kanmarad, sa pou fer ou lakour vin en labri sekirite e pou ankouraz kominikasyon, ki en gran proteksyon kont bann move lenfliyans. Deplis, devlop en lot kalite lanmour i pli enportan ankor. Sa i lanmour pour Zeova. Kan en tel lanmour i egziste dan fanmiy, i tre probab ki bann zanfan pou grandi avek sa profon dezir pour pa anvi depler Bondye par les bann lenfliyans lemonn domin zot. Bann paran ki kontan Zeova avek zot tou zot leker pou esey imit son bon personnalite rezonnab e ekilibre. (Efezyen 5:1; Zak 3:17) Si bann paran i fer sa, zot zanfan pou napa rezon pour vwar ladorasyon Zeova zis konman en lalis keksoz ki zot pa devret fer. Zot pa ni pou vwar li konman en fason viv kot napa lanmizman oubyen lazwa, ki fer zot anvi sove kan zot ganny en loportinite. Okontrer, zot pou vwar ki ador Bondye i fason viv ki anmenn plis lazwa e pli satisfezan ki okenn lezot fason viv.
27. Ki mannyer en fanmiy i kapab ranport laviktwar lo lemonn?
27 Bann fanmiy ki reste ini ansanm pour servi Bondye dan lazwa ek lekilib, ki esey avek tou zot leker pour reste “pir, san defo” kont bann lenfliyans degoutan dan sa lemonn, i fer Zeova kontan. (2 Pyer 3:14; Proverb 27:11) Bann tel fanmiy i swiv lepa Zezi Kri, ki ti reziste tou zefor ki lemonn Satan ti esey fer pour sali li. Ver lafen son lavi konman en imen lo later, Zezi ti kapab dir: “Mon’n ranport laviktwar lo lemonn.” (Zan 16:33) Fotespere ki ou fanmiy osi i ranport laviktwar lo lemonn e rezwir lavi pour touzour!
a Pour en diskisyon lo ledikasyon siplemanter, vwar brosir Les Témoins de Jéhovah et l’instruction, paz 4-7, pibliye par Temwen Zeova.
b Sa mo Ebre ki’n ganny tradwir isi par “riye” i kapab osi ganny tradwir konman “zwe,” “anmize,” “selebre,” oubyen menm “fer fars.”
c Pibliye par Temwen Zeova.