Vin vye ansanm

1, 2. (a) Ki sanzman ki arive anmezir ki nou laz i avanse? (b) Konman ki bann serviter Bondye dan letan Labib ti gard zot lazwa dan zot vye zour?

I ANNAN bokou keksoz ki sanze anmezir ki nou laz i avanse. Febles fizik i diminyen nou lenerzi. En regar dan laglas i revel bann pli, seve ki pe konmans blan e latet ki pe sov. Petet nou oubliy keksoz fasilman. Nouvo relasyon i devlope ler nou zanfan i marye e osi ler bann pti zanfan i konmans arive. Pran retret i obliz serten pour sanz zot fason viv.

² An realite, ler en dimoun pe vye sa i kapab en moman difisil pour li. (Eklezyast 12:1-8) Me mazin bann serviter Bondye dan letan Labib. Menm si finalman lanmor ti pran zot, zot ti ganny lasazes ek konprenezon ki ti fer zot trouv bokou satisfaksyon dan zot vye zour. (Zenez 25:8; 35:29; Zob 12:12; 42:17) Ki mannyer zot ti kapab gard zot lazwa menm dan zot vye zour? San dout, sa i akoz zot ti viv an armoni avek bann prensip ki nou trouve dan Labib ozordi.​—Psonm 119:105; 2 Timote 3:16, 17.

3. Ki konsey Pol ti donn bann zonm ek fanm aze?

³ Zapot Pol ti donn bon konsey pour bann ki ti pe avanse dan laz. Dan son let ki i ti ekrir Tit, i ti dir: “Dir bann vyeyar ki zot devre modere, respektab, rezonnab e solid dan zot lafwa, zot lanmour ek zot perseverans. Dir egalman, bann vye madanm ki zot devre konport zot konman dimoun ki pe viv en lavi sen. Zot pa devre kolport zaksyon ki fer ditor, ni vin lesklav labwason. Sirtou zot devre donn bon konsey.” (Tit 2:2, 3) Gard antet sa parol i kapab ed ou pour fer fas avek bann problenm ki ou rankontre ler laz pe antre.

ADAPTE LER OU ZANFAN I MARYE E KIT LAKOUR

4, 5. Konman bokou paran i azir kan zot zanfan i kit lakour, e ki mannyer serten i adapte avek sa nouvo sitiasyon?

⁴ Pour en dimoun kapab fer fas avek bann sanzman ki arive dan son lavi, i bezwen pare pour adapte. Pa sa i vre kan bann zanfan ki’n vin adilt i marye e kit lakour! Pour bokou paran, sa i premye keksoz ki fer zot konsyan ki zot pe vin vye. Kantmenm zot kontan ki zot zanfan in vin adilt, bann paran i souvannfwa trakase. Zot mazinen si vreman zot in fer tou sa ki zot kapab pour prepar zot zanfan pour fer fas avek lavi lo zot menm. Zot menm kapab mank zot zanfan kot lakour.

⁵ I normal pour bann paran kontinyen mazin byennet zot zanfan, menm apre ki zot in kit lakour. En manman ti dir: “Si zis mon ti kapab tann zot nouvel souvan, pour ki mon kapab asire ki zot byen, sa ti pou fer mwan kontan.” En papa i rakonte: “I ti en moman vreman difisil, ler nou fiy ti kit lakour. I’n kit en gran lespas vid dan nou fanmiy akoz nou ti abitye fer tou keksoz ansanm.” Ki mannyer sa bann paran in kapab fer fas avek labsans zot zanfan? Dan bokou ka, zot in fer sa par ed e montre lentere dan lezot dimoun.

6. Kwa ki ede gard en bon pwennvi konsernan relasyon familyal?

⁶ Ler bann zanfan i marye, rol bann paran i sanze. Zenez 2:24 i fer resorti: “En zonm pou kit son papa ek son manman e i devret atas avek son madanm e zot devret vin en sel laser.” Rekonnet bann prensip Bondye konsernan lotorite ek lord, pou ed bann paran annan en bon pwennvi.​—1 Korentyen 11:3; 14:33, 40.

7. Ki bon latitid en papa ti devlope ler son de fiy ti marye e kit lakour?

⁷ En koup ti santi en lespas vid dan zot lavi apre ki zot de fiy ti’n marye e kit lakour. Okonmansman, sa papa pa ti kontan son de zann. Me ler i ti reflesir lo prensip lotorite, i ti realize ki aprezan mari son de fiy ki responsab pour zot prop lakour. Alors, ler son de fiy ti demann li konsey, i ti demann zot ki zot mari i panse, e apre i ti fer sir ki i siport zot otan ki i kapab. Aprezan, son de zann i pran li konman en zanmi e zot aksepte son konsey.

8, 9. Konman ki serten paran in adapte ler zot zanfan ki’n grandi i marye e kit lakour?

⁸ Me ki pou arive si bann nouvo marye pa pe fer sa ki zot paran i krwar i pli meyer, menm si zot pa pe fer nanryen ki kont Labib? En koup ki annan bann zanfan ki’n marye i eksplike: “Nou toultan ed zot pour vwar pwennvi Zeova. Me si nou pa dakor avek en desizyon ki zot in fer, nou aksepte e nou donn zot nou sipor ek lankourazman.”

⁹ Dan serten pei Lazi, serten manman i trouv li difisil pour aksepte kan zot garson i marye e kit lakour. Toutfwa, ler zot respekte lord ek lotorite Kretyen, zot dekouver ki dezakor avek zot belfiy i diminyen. Pour en madanm Kretyen, depar son bann garson kot lakour in vin en sours lazwa. I ti kontan pour vwar konman zot kapab pran swen avek zot lakour. An retour, sa in redwir sa fardo ki li ek son mari in bezwen anmennen fizikman e mantalman anmezir ki laz i antre.

DONN OU LINYON MARYAZ EN NOUVO DEPAR

10, 11. Ki konsey Labib ki pou ed bann dimoun evit serten pyez mwayenn az?

¹⁰ Dimoun i reazir diferan fason ler zot antre dan mwayenn az. Serten zonm i abiy dan bann fason ki fer zot paret pli zenn. Bokou madanm i trakase avek bann sanzman ki menopoz i anmennen. Malerezman, serten dimoun sa laz i eksit zalouzi ek mekontantman zot msye ouswa madanm par fer zekar avek bann dimoun lot sèks ki pli zenn ki zot. Parkont, bann zonm alaz ki servi Bondye i “rezonnab,” e zot met bann dezir ki pa apropriye anba kontrol. (1 Pyer 4:7) Pareyman, bann fanm matir i fer zefor pour gard zot maryaz stab, akoz lanmour pour zot mari ek en dezir pour fer plezir Zeova.

¹¹ Anba lenspirasyon ki sorti kot Bondye, Lerwa Lemouel ti felisit sa fanm debrouyer ki rekonpans son mari “avek lebyen, non pa lemal, toudilon son lavi.” En mari Kretyen pou apresye zefor ki son madanm i esey fer pour fer fas avek bann troub emosyonnel ki i eksperyanse pandan son mwayenn az. Son lanmour pou pous li pour “loue li.”​—Proverb 31:10, 12, 28.

12. Ki mannyer bann koup i kapab vin pli pre avek kanmarad anmezir ki lannen i pase?

¹² Pandan bann lannen ki zot tou le de zot ti pe elve zot zanfan, zot ti met zot bann dezir personnel dekote pour okip bezwen zot zanfan. Aprezan ki zanfan in ale, la i lemoman pour zot konsantre ankor lo zot lavi maryaz. En mari i dir: “Ler mon bann fiy ti kit lakour, mon ti rekonmans pwente avek mon madanm.” En lot mari i dir: “Nou ti enterese avek lasante kanmarad e nou ti rapel kanmarad sa nesesite pour fer legzersis.” Pour zot pa santi zot tousel, li ansanm avek son madanm, zot montre lospitalite anver lezot manm dan kongregasyon. Wi, i anmenn bokou byenfe kan nou montre lentere anver lezot. Deplis, i fer plezir Zeova.​—Filipyen 2:4; Ebre 13:2, 16.

13. Ki rol kominikasyon fran e onnet i zwe kan en koup pe antre dan laz?

¹³ Pa les en lespas devlope ant ou ek ou msye ouswa ou madanm. Koz avek kanmarad fransman. (Proverb 17:27) En mari ti dir: “Nou aprann konn kanmarad pli byen par pran swen e annan konsiderasyon pour kanmarad.” Son madanm i azoute: “Anmezir ki nou antre dan laz, nou’n arive apresye bann moman kot nou pran en tas dite ansanm, koze, e korpere ansanm.” Ler ou fran e onnet, sa i kapab ede pour ranforsi ou linyon maryaz. Sa pou donn li en serten lafors ki pou ede reziste bann latak Satan, sa enn ki kas maryaz.

APRESYE OU BANN PTI ZANFAN

14. Ki rol granmanman Timote ti zwe pour fer li grandi konman en Kretyen?

¹⁴ Bann pti zanfan i “kouronn” bann dimoun aze. (Proverb 17:6) Zot konpanni i agreab, vivan, e rafresisan. Labib i koz an byen lo en granmanman apele Lois, ki ansanm avek son fiy Enis, ti partaz son krwayans avek son pti zanfan, Timote. Anmezir ki sa zenn garson ti grandi, i ti konnen ki son manman osi byen ki son granmanman ti apresye laverite ki dan Labib.​—2 Timote 1:5; 3:14, 15.

15. An rapor avek zot pti zanfan, ki kontribisyon itil ki bann gran paran i kapab fer, me ki zot devret evite?

¹⁵ Sa i en laspe spesyal kot bann gran paran i kapab fer en bon kontribisyon. Bann gran paran, menm si zot in deza fini partaz zot konnesans lo plan Zeova avek zot zanfan, aprezan zot kapab fer menm parey avek en lot zenerasyon. Bokou pti manrmay i kontan tann zot gran paran rakont bann zistwar Labib. Byensir ou pa pou pran responsabilite sa papa pour ansenny laverite Labib dan son zanfan. (Deterononm 6:7) Plito, ou pou donn li lanmen. Fotespere ki ou lapriyer i parey pour sa psalmis: “Menm ziska lavyeyes ek seve blan, O Bondye, pa kit mwan, ziska ki mon koz lo ou [lafors] avek sa zenerasyon, lo ou pwisans avek tou sa bann ki pou vini.”​—Psonm 71:18; 78:5, 6.

16. Konman ki bann gran paran i kapab evite vin lakoz konfli dan zot fanmiy?

¹⁶ Malerezman, serten gran paran i tro gat zot bann pti zanfan ki fer ki konfli i devlope ant gran paran ek zot zanfan. Toutfwa, i kapab ki akoz ou vreman zantiy, ou bann pti zanfan i vwar li fasil pour konfye dan ou serten keksoz ki zot pa santi zot anvi dir zot paran. Parfwa sa bann zanfan i ekspekte ki zot gran paran ki abitye gat zot pou pran kote avek zot kont zot paran. Ki ou pou fer dan sa ka? Demontre lasazes e ankouraz ou pti zanfan pour koz fran avek son paran. Ou kapab eksplik zot ki sa i fer plezir Zeova. (Efezyen 6:1-3) Si i neseser, ou kapab volonter pour koz avek paran ou pti zanfan, ki pou fer li pli fasil pour zot apros zot paran apre. Koz fran avek ou bann pti zanfan lo sa ki ou’n aprann pandan tou sa bann lannen ki’n pase. Ou lonnekte ek senserite i kapab anmenn bokou byenfe pour zot.

ADAPTE OU AVEK OU LAZ

17. Ki determinasyon en psalmis ti annan ki bann Kretyen aze i devret imite?

¹⁷ Anmezir ki lannen i pase, ou pou vwar ki ou pa kapab fer tou sa ki ou ti abitye fer oubyen tou sa ki ou anvi fer. Konman ki en dimoun i kapab aksepte e fer fas avek lavyeyes? Kekfwa dan ou lespri ou ankor santi ki ou annan 30 an, me en kou-d-ey dan laglas i montre vre realite. Pa dekouraze. En psalmis ti enplor Zeova: “Pa rezet mwan pandan letan lavyeyes; zis letan mon lafors in afebli, pa kit mwan.” Fer li ou rezolisyon pour imit determinasyon sa psalmis. I ti dir: ‘Mon pou espere konstaman, e mon pou loue ou deplizanpli.’​—Psonm 71:9, 14.

18. Ki mannyer en Kretyen matir i kapab byen servi son retret?

¹⁸ Bokou dimoun in prepare davans pour loue Zeova plis apre ki zot in pran retret. En papa ki’n pran retret i eksplike: “Mon ti plàn davans ki mon ti pou fer ler nou fiy i kit lekol. Mon ti deside ki mon pou konmans minister aplentan, e mon ti vann mon biznes afen ki mon kapab lib pour servi Zeova pli plennman. Mon ti priy Zeova pour diriz mwan.” Si ou pre pour pran retret, tir rekonfor dan sa deklarasyon ki nou Gran Kreater i fer: “Ziska ou lavyeyes mon sanmenm sa Enn; e ziska ou seve blan mon pou kontinyen soutenir [ou].”​—Izai 46:4.

19. Ki konsey i annan pour sa bann ki pe antre dan laz?

¹⁹ Ler en dimoun i pran retret i kapab pa fasil pour adapte avek sa sitiasyon. Zapot Pol ti konsey bann zonm aze pour “modere” dan zot latitid. I demande ki zot annan kontrol lo zot lekor, e pa les zot ganny tante pour rod en lavi fasil. Apre ki ou’n pran retret, i kapab annan en pli gran nesesite pour pli byen organize e pli disiplinen ki oparavan. Alors, reste okipe, “montre touzour plis lentere dan travay Senyer, parski zot konnen ki dan Senyer zot travay pa anven.” (1 Korentyen 15:58) Esey fer plis keksoz pour kapab ed lezot. (2 Korentyen 6:13) Bokou Kretyen i fer sa par pres sa bon nouvel avek devouman dapre en degre ki apropriye pour zot. Anmezir ki laz i antre, vin ‘solid dan lafwa, lanmour ek perseverans.’​—Tit 2:2.

LER OU PERDI OU MSYE OUSWA MADANM

20, 21. (a) Dan sa sistenm ki nou pe viv ladan, kwa ki devret finalman separ en koup marye? (b) Konman ki Ann i en bon legzanp pour bann msye ouswa madanm ki an dey?

²⁰ I en keksoz ki tris me ki vre dan sa lemonn ki nou pe viv ladan, kot bann koup marye i finalman separe par lanmor. Bann msye ouswa madanm ki an dey i konnen ki sa dimoun ki zot ti kontan pe dormi, e zot annan sa konfyans ki zot pou revwar li ankor. (Zan 11:11, 25) Me labsans sa dimoun i ankor fer mal pour siporte. Konman ki sa enn ki vivan i kapab fer fas avek sa sitiasyon?a

²¹ I pou itil si ou gard antet sa ki en serten dimoun dan Labib ti fer. Ann ti vin en vev zis set an apre son maryaz, e i ti annan 84 an kan i ti ganny mansyonnen dan Labib. Nou kapab asire ki i ti sagren ler i ti’n perdi son mari. Konman i ti fer fas avek sa sitiasyon? I ti kontinyen servi Zeova dan tanp lizour konman aswar. (Lik 2:36-38) Lavi Ann dan servis Bondye ansanm avek lapriyer ti san dout en gran remed pour soufrans ek lasolitid ki i ti santi konman en vev.

22. Konman ki serten vev ek vef in fer fas avek lasolitid?

²² En madanm 72 an ki’n en vev pour dis an i eksplike: “Pli gro problenm pour mwan se napa personn pour koz avek. Mon mari ti en dimoun ki ti ekout byen. Nou ti koz lo kongregasyon e lo nou partisipasyon dan predikasyon.” En lot vev i dir: “Zot dir ki letan i geri douler. Mwan mon’n vwar ki i pli byen pour dir ki se lafason ki en dimoun i servi son letan ki ede pour geri son douler. Ou dan en pli bon pozisyon pour ed lezot.” En vef 67 an ki dakor avek sa remark, i dir: “En pli bon fason pour fer fas avek dey se pour ofer ou letan pour konsol lezot.”

BONDYE I APRESYE OU DAN VYE OU ZOUR

23, 24. Ki rekonfor Labib i donn bann dimoun aze, sirtou bann ki’n perdi zot msye ouswa zot madanm?

²³ Menm si lanmor i pran nou msye ouswa nou madanm ki nou kontan, Zeova i toultan reste fidel e nou toultan kapab depan lo li. Dan son vye zour, Lerwa David ti sante: “En keksoz ki mon’n demann Zeova, e se sa ki mon pou rode, se ki mon reste dan lakaz Zeova toudilon mon lavi, pour obzerv labote Zeova e pour get son tanp avek lapresyasyon.”​—Psonm 27:4.

²⁴ Zapot Pol ti donn sa konsey: “Okip avek respe bann vev ki vreman vev.” (1 Timote 5:3) Konsey ki i donnen apre sa, i endike ki kongregasyon i devret ed bann vev ki dan bezwen e ki napa fanmiy lo plan materyel. Toutfwa, sa lenstriksyon pour “okip avek respe” i enkli sa lide pour apresye zot. Pa i rekonfortan pour bann vev ek bann vef ki servi Bondye pour konnen ki Zeova i apresye zot e pou soutenir zot!​—Zak 1:27.

25. Ki lobzektif bann dimoun aze i ankor annan?

²⁵ Parol enspire Bondye i deklare: “Labote bann vyeyar se zot seve blan.” Seve blan i “en kouronn labote kan i ganny trouve dan semen ladrwatir.” (Proverb 16:31; 20:29) Alors, ki swa ou’n marye oubyen selibater, kontinyen gard servis Zeova premye dan ou lavi. Ou pou alor annan en bon repitasyon devan Zeova e osi annan sa lespwar pour lavi eternel dan en lemonn kot douler lavyeyes pou nepli egziste.​—Psonm 37:3-5; Izai 65:20.