Leson 2

Ki sennla Bondye?

Ki sennla vre Bondye, e konman i apele? (1, 2)

Ki kalite lekor i annan? (3)

Ki son bann kalite ekstraordiner? (4)

Eski i byen pour servi stati ek zimaz pour ador Bondye? (5)

Nonm de fason ki nou kapab konn Bondye. (6)

1. Dimoun i ador bokou keksoz. Me Labib i dir nou ki i annan en sel VRE Bondye. Se li ki’n kree tou keksoz ki annan dan lesyel e lo later. Vi ki i’n donn nou lavi, se li tousel ki nou devret adore.—1 Korentyen 8:5, 6; Revelasyon 4:11.

2. Bondye i annan plizyer tit, me i annan en sel non. I apel ZEOVA. Dan laplipar Labib, non Bondye in ganny ranplase par lezot tit konman SENYER oubyen BONDYE. Me kan Labib ti ganny ekrir, sa non Zeova ti aparet anviron 7,000 fwa.—Egzod 3:15; Psonm 83:18.

3. Zeova i annan en lekor, me i pa parey pour nou. Labib i dir ki “Bondye i Lespri.” (Zan 4:24) En lespri i en lot kalite lavi ki pli siperyer ki pour nou. Personn pa’n deza vwar Bondye. Zeova i viv dan lesyel, me i kapab vwar tou keksoz. (Psonm 11:4, 5; Zan 1:18) Me kisisa Sent-Espri? I pa en dimoun parey Bondye, me i lafors aktif Bondye.—Psonm 104:30.

4. Labib i eksplik nou ki kalite Bondye Zeova i ete. I montre nou ki son bann kalite ekstraordiner se lanmour, lazistis, lasazes ek pwisans. (Deterononm 32:4; Zob 12:13; Izai 40:26; 1 Zan 4:8) Labib i dir nou osi ki i pran pitye, i bon, i zenere e pasyan. Konman bann zanfan obeisan, nou devret esey imit li.—Efezyen 5:1, 2.

5. Eski i byen pour priye devan bann stati oubyen bann zimaz? Non! (Egzod 20:4, 5) Zeova i dir ki se li tousel ki nou devret adore. I pa pou partaz son laglwar avek personn oubyen lezot keksoz. Bann stati pa kapab ed nou.—Psonm 115:4-8; Izai 42:8.

6. Konman nou pou fer pour konn Bondye pli byen? En fason, se ler nou obzerv bann keksoz ki i’n kree e mazin bokou lo sa ki zot ansenny nou. Bann kreasyon Bondye i montre nou ki i annan en gran pouvwar ek en gran lasazes. Nou vwar son lanmour dan tou sa ki i’n fer. (Psonm 19:1-6; Romen 1:20) En lot fason pour byen konn Bondye se etidye Labib. Dan Labib, i eksplik nou plis ankor lo son bann kalite. I dir nou osi sa ki i oule fer e sa ki i ekspekte nou fer.—Amos 3:7; 2 Timote 3:16, 17.

[Portre lo paz 5]

Nou aprann konn Bondye par son kreasyon e par Labib