Leson 13

Konman ou kapab trouv vre Larelizyon?

Eski Bondye i dakor avek tou larelizyon oubyen avek zis enn? (1)

Akoz bokou larelizyon i pretann dir ki zot Kretyen? (2)

Konman ou kapab rekonnet bann vre Kretyen? (3-7)

1. Zezi ti konmans vre larelizyon Kretyen. Donk, denozour fodre i annan en sel group vre adorater Zeova Bondye. (Zan 4:23, 24; Efezyen 4:4, 5) Labib i eksplike ki selman en pti group dimoun ki lo semen etrwat ki anmenn ver lavi.—Matye 7:13, 14.

2. Labib ti anonse ki apre lanmor bann zapot, fo pratik ek fo lansennyman ti pou antre ptit-a-pti dan kongregasyon Kretyen. Bann zonm ti pou antrenn bann krwayan pour swiv zot plito ki Kris. (Matye 7:15, 21-23; Akt 20:29, 30) Se pour sa ki nou vwar bokou larelizyon ki deklare ki zot Kretyen. Konman nou kapab rekonnet bann vre Kretyen?

3. Mark pli enportan bann vre Kretyen se lanmour veritab ki zot annan antre zot. (Zan 13:34, 35) Zot pa ganny ansennyen ki zot pli meyer ki bann dimoun en lot ras oubyen en lot kouler. Zot pa pe aprann annan laenn pour bann dimoun ki sorti dan lezot pei. (Akt 10:34, 35) Donk, zot pa partisip dan lager. Bann vre Kretyen i tret kanmarad konman frer ek ser.—1 Zan 4:20, 21.

4. En lot mark vre larelizyon se ki son bann manm i annan en profon respe pour Labib. Zot aksepte Labib konman Parol Bondye e zot krwar sa ki i dir. (Zan 17:17; 2 Timote 3:16, 17) Zot konsider Parol Bondye pli enportan ki bann lide ek koutim zonm. (Matye 15:1-3, 7-9) Zot esey met an pratik sa ki Labib i dir dan zot lavi toulezour. Zot pa ansenny en keksoz epi fer lekontrer.—Tit 1:15, 16.

5. Vre larelizyon i devret osi onor non Bondye. (Matye 6:9) Zezi ti fer lezot konn non Bondye, Zeova. Bann vre Kretyen i devret osi fer parey. (Zan 17:6, 26; Romen 10:13, 14) Lekel dan ou zalantour ki pe dir lezot dimoun konsernan non Bondye?

6. Bann vre Kretyen i devret pres lo Rwayonm Bondye. Se sa ki Zezi ti fer. I ti toultan koz lo sa Rwayonm. (Lik 8:1) I ti demann son bann disip pour pres sa menm mesaz partou lo later. (Matye 24:14; 28:19, 20) Bann vre Kretyen i krwar ki selman Rwayonm Bondye ki pou anmenn vre lape ek sekirite lo later.—Psonm 146:3-5.

7. Bann disip Zezi pa devret fer parti sa lemonn mesan. (Zan 17:16) Zot pa mel zot dan bann zafer politik ek bann lalit sosyal sa lemonn. Zot rezet move kondwit, pratik ek latitid ki nou trouve partou dan sa lemonn. (Zak 1:27; 4:4) Eski ou kapab idantifye en group relizye ki annan sa bann mark bann vre Kretyen?

[Portre lo paz 26, 27]

Bann vre Kretyen i annan lanmour pour kanmarad, zot respekte Labib e zot pres lo Rwayonm Bondye