Diferan Fason ki zot partaz sa bon Nouvel
BANN Kretyen i ganny demande pour “fer tou pep vin bann disip,” me sa pa vedir ki zot servi presyon oubyen konverti lezot par-d-fors. Zeova ti demann Zezi pour “anons bon nouvel bann ki annan limilite,” “pour pans sa bann ki annan leker brize,” e pour “konsol tou bann ki an dey.” (Matye 28:19; Izai 61:1, 2; Lik 4:18, 19) Bann Temwen Zeova i esey fer sa par anons sa bon nouvel ki sorti dan Labib. Parey profet Ezekyel dan lepase, bann Temwen Zeova ozordi i fer zefor pour trouv sa bann ki pe “zemir e plennyen akoz sa bann move keksoz ki pe arive.”—Ezekyel 9:4.
Al devan laport sak dimoun i fason pli popiler ki zot servi pour trouv sa bann ki pe soufer akoz kondisyon ki egziste ozordi. Alor zot fer en zefor serye pour rankontre sak dimoun, zis parey Zezi ti fer ler i ti “vwayaz dan plizyer lavil ek vilaz pour pres Bonn Nouvel Rwayonm Bondye.” Son bann premye disip ti fer parey zot osi. (Lik 8:1; 9:1-6; 10:1-9) Ozordi, kot i posib, bann Temwen Zeova i fer bokou zefor pour vizit sak lakour plizyer fwa pandan lannen. Zot rod fason pour koz avek en met lakour pour detrwa minit lo en keksoz enteresan ki’n arive lokalman oubyen dan lemonn. Petet zot kapab montre enn oubyen de verse Labib, e si sa dimoun i montre lentere, sa Temwen i kapab aranze pour retourn en lot ler konvenab pour fer lezot diskisyon. Zot ofer Labib ek piblikasyon baze lo Labib e si sa dimoun i oule, en letid Labib kot lakour pour nanryen i ganny fer. Plizyer milyon sa bann letid Labib ki itil i ganny fer regilyerman avek bann dimoun ek fanmiy atraver lemonn.
En lot fason ki lezot dimoun i antann “sa Bonn Nouvel Rwayonm” i atraver bann renyon ki fer kot bann Lasal Rwayonm. Bann Temwen i fer zot renyon tou le semenn. Dan en renyon i annan en diskour piblik ki baze lo en topik ki enteres piblik. Apre sa, zot servi magazin Latour Veyer konman sours lenformasyon pour etidye en topik baze lo Labib oubyen en profesi. En lot renyon i en lekol pour form bann Temwen pour vin bann pli bon proklanmater sa bon nouvel, swivi par en renyon ki diskit travay predikasyon dan sak teritwar. Bann Temwen i osi zwenn ansanm dan bann pti group kot en lakour pour fer letid Labib.
Tou dimoun i kapab asiste sa bann renyon. Napa laket. Sa bann renyon i benefisye tou dimoun. Labib i dir: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.” Fer letid ek resers kot nou an prive i neseser, me zwenn avek lezot i ankouraz nou: “Feray i fit feray, pareyman en zonm i fit lespri en lot.”—Ebre 10:24, 25; Proverb 27:17, The New English Bible.
Bann Temwen i osi servi byen bann loportinite pour koz lo sa bon nouvel ler zot zwenn lezot dimoun dan zot lavi toulezour. I kapab zis detrwa parol avek en vwazen oubyen avek en dimoun dan en bis oubyen dan en avyon. I osi kapab en pli gran konversasyon avek en zanmi oubyen en fanmiy, oubyen en diskisyon avek en kanmarad travay pandan zot brek. Ler Zezi ti lo later i ti pres bokou dan sa fason. Par egzanp, ler i ti marse obor lanmer, asize lo en montanny, manz kot en dimoun, asiste en maryaz, oubyen vwayaz lo en bato lapes lo Lanmer Galile. I ti ansenny dan sinagog e kot tanp Zerizalenm. Nenport landrwa i ti ete, i ti trouv loportinite pour koz lo Rwayonm Bondye. Bann Temwen Zeova i fer zefor pour swiv son legzanp dan sa laspe osi.—1 Pyer 2:21.
PRES PAR NOU LEGZANP
Tou sa bann fason pour koz lo sa bon nouvel pa ti pou fer sans pour ou si sa dimoun ki ti pe koz avek ou pa ti pe fer sa ki i dir. Dir en keksoz e apre fer en lot keksoz i lipokrizi, e lipokrizi relizye in fer plizyer milyon dimoun rezet Labib. Pa Labib ki merit ganny blanmen. Bann profeser Lalwa ek Farizyen ti annan Lekritir Ebre, me Zezi ti dir ki zot ipokrit. I ti dir ki zot ti lir Lalwa Moiz, me apre i ti dir son bann disip: “Fer tou sa ki zot dir fer, me pa imit sa ki zot fer. Akoz zot prese, me zot pa met an pratik sa ki zot prese.” (Matye 23:3) En kondwit Kretyen egzanpler i annan plis pwa ki fer bann gran sermon. En zapot ti fer resorti sa avek bann madanm ki zot mari pa ti Kretyen: “Zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.”—1 Pyer 3:1, 2.
Alor, bann Temwen Zeova i esey ankouraz dimoun pour aksepte sa bon nouvel dan sa menm fason osi. Zot menm zot pratik sa ki zot dir lezot e alor annan en kondwit Kretyen egzanpler. Zot esey ‘fer pour lezot sa ki zot oule lezot i fer pour zot.’ (Matye 7:12) Zot esey viv sa fason avek tou dimoun, pa zis avek zot konpanyon Kretyen, zanmi, vwazen, oubyen fanmiy. Lefe ki zot enparfe, zot pa toultan fer sa ki byen 100 poursan. Me zot senserman anvi fer dibyen tou dimoun, pa zis par anons zot sa bon nouvel lo Rwayonm me osi par ofer led pratik ler i posib.—Zak 2:14-17.
[Portre lo paz 19]
Awai
[Portre lo paz 19]
Venezwela
[Portre lo paz 19]
Yougoslavi
[Portre lo paz 20]
Lasal Rwayonm, en landrwa senp ki ganny servi pour koz lo Labib
[Portre lo paz 21]
Bann Temwen Zeova i senserman esey pratik sa ki zot ansennyen dan zot lavi fanmiy e avek lezot dimoun