Aplik korekteman bann Verse

LER pe ansenny lezot, i demann plis ki zis lir bann verse Labib. Zapot Pol ti ekrir son asosye Timote: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.”—2 Tim. 2:15.

Pour fer sa i vedir ki nou leksplikasyon lo bann verse i devret touzour an akor avek sa ki Labib li menm i ansennyen. Sa i egzize ki nou pran kont sa konteks, olye ki senpleman swazir bann lekspresyon ki atiran pour nou e azout nou prop lide. Atraver profet Zeremi, Zeova ti averti kont sa bann profet ki pretann pour dir sa ki Zeova i dir me ki an realite pe prezant “vizyon zot prop leker.” (Zer. 23:16) Zapot Pol ti averti bann Kretyen kont kontamin Parol Bondye avek bann filozofi imen ler i ti ekrir: “Nou’n fini rezet tou sa bann keksoz, ki fer onte e ki fer dan kasyet. Nou pa anbet dimoun, e nou pa fer Parol Bondye vin fo.” Dan sa letan bann marsan diven malonnet ti koup zot diven avek delo pour ogmant lakantite e pour ganny plis larzan. Nou pa fer Parol Bondye vin fo par melanz li avek bann filozofi imen. Pol ti dir: “Nou pa parey sa kantite lezot dimoun ki fos parol Bondye, me delapar Bondye e devan Bondye nou koz avek senserite dan Kris.”—2 Kor. 2:17; 4:2.

Parler, ou kapab sit en verse pour fer resorti en prensip. Labib i ranpli avek bann prensip ki fourni bann bon gidans pour fer fas avek en gran varyete sitiasyon. (2 Tim. 3:16, 17) Me ou devret fer sir ki ou laplikasyon i egzakt e ki ou pa pe mal servi en verse, par fer li aparet pour dir sa ki ou anvi fer li dir. (Pson. 91:11, 12; Mat. 4:5, 6) Sa laplikasyon i devret an armoni avek plan Zeova, konsistan avek tou Parol Bondye.

“Anons byen mesaz” i osi enkli konpran leta lespri sa ki Labib i dir. I pa en “baton” pour servi pour fer dominer avek lezot. Bann ansennyan relizye ki ti opoz Zezi Kri ti sit Lekritir, me zot ti ferm zot lizye lo bann keksoz pli enportan—ki ti enplik lazistis, pitye ek fidelite—ki Bondye ti demande. (Mat. 22:23, 24; 23:23, 24) Ler i ti pe ansenny Parol Bondye, Zezi ti reflekte personnalite son Papa. Son zel pour laverite ti zwenn ansanm avek son profon lanmour pour dimoun ki i ti ansennyen. Nou devret swiv son legzanp.—Mat. 11:28.

Konman nou kapab asire ki nou pe byen aplik en verse? Lir Labib regilyerman pou ede. Nou osi bezwen apresye provizyon Zeova atraver ‘lesklav fidel e pridan,’ sa group Kretyen swazir atraver ki i fourni nouritir spirityel pour nou fanmiy spirityel. (Mat. 24:45) Letid personnel osi byen ki asiste regilyerman e partisip dan bann renyon kongregasyon i enportan pour ou kapab benefisye atraver lenstriksyon ki sa group lesklav fidel e pridan i fourni.

Par aprann servi byen liv Comment raisonner à partir des Écritures, ou pou annan akse avek gidans ki ou bezwen pour fer laplikasyon korek lo plizyer santenn verse ki souvan ganny servi dan nou minister. Si ou pe deside pour servi en verse ki pa familye, modesti pou motiv ou pour fer resers neseser afen ki ler ou koze, ou pou anons byen mesaz laverite.—Prov. 11:2.

Fer sa Laplikasyon kler. Ler pe ansenny lezot, fer sir ki zot klerman vwar konneksyon ant sa topik ki ou pe diskite avek sa bann verse ki ou pe servi. Si ou prepar lentrodiksyon en verse par servi en kestyon, sa bann ki pe ekout ou i devret vwar ki mannyer sa verse i reponn sa kestyon. Si ou pe servi sa verse pour siport serten deklarasyon, fer sir ki sa etidyan i klerman vwar konman ki sa verse i prouv sa pwen.

Zis lir sa verse—menm avek lanfaz—i ordinerman pa sifi. Mazinen, ki dimoun ordiner pa familye avek Labib e probableman zot pa pou konpran sa pwen ki ou anvi fer resorti par zis lir sa verse enn fwa. Atir latansyon lo sa porsyon dan sa verse ki direkteman aplik avek sa ki ou pe diskite.

Normalman pour ou kapab arive fer sa ou bezwen separ bann mo enportan, sa bann ki annan en lefe direk lo sa pwen ki pe ganny diskite. Metod pli senp se pour repet sa bann mo ki kontyen sa lide. Si ou pe koz avek en endividi, ou kapab demann kestyon ki pou ed li pour idantifye bann mo enportan. Ler pe koz avek en group, serten orater i prefer akonpli zot lobzektif par servi lezot mo ki parey avek sa enn oubyen par repet sa lide. Sepandan, si ou deside fer sa, fer atansyon ki lodyans pa perdi konneksyon ant sa pwen ki pe ganny diskite ek sa bann mo dan sa verse.

Apre ki ou’n separ bann mo enportan, ou’n etablir en bon fondasyon. Aprezan kontinyen lo sa menm laliny. Dan lentrodiksyon sa verse eski ou ti klerman endik rezon pour ou servi sa verse? Si i leka, endike konman bann mo ki ou’n fer resorti i relye avek leksplikasyon ki lodyans pe ekspekte. Dir klerman ki sa konneksyon i ete. Menm si ou pa ti servi en lentrodiksyon spesifik pour sa verse, i devret annan serten leksplikasyon siplemanter.

Bann Farizyen ti demann Zezi en kestyon ki zot ti mazinen ti en kestyon difisil, zot ti demann li: “Eski nou lalwa i permet en zonm divors son madanm pour nenport ki rezon?” Zezi ti baz son larepons lo Zenez 2:24. Remarke ki Zezi ti fikse latansyon lo zis en porsyon sa verse, e apre i ti fer laplikasyon neseser. Apre ki i ti’n fer resorti ki sa zonm avek son madanm i vin “en sel laser” Zezi ti konklir: “Alor sa ki Bondye in ini ansanm zonm pa devre separe.”—Mat. 19:3-6.

Ki kantite leksplikasyon ki ou devret donnen pour kapab fer laplikasyon en verse kler? Konpozisyon ou lodyans ek lenportans sa pwen ki pe ganny diskite i devret determin sa. Touzour esey reste senp e direk.

Rezonn apartir Lekritir. Konsernan minister zapot Pol an Tesalonik, Akt 17:2, 3 i dir nou ki i ti ‘rezonn lo Lekritir.’ Sa i en abilite ki tou serviter Zeova i devret esey kiltive. Par egzanp, Pol ti mansyonn sa ki Zezi ti fer dan son lavi ek son minister, i ti demontre ki sa ti’n ganny predir dan bann Lekritir Ebre, e finalman i ti fer en konklizyon pwisan an dizan: “Sa Zezi ki mon pe anons zot limenm Mesi.”

Ler i ti pe ekrir sa let pour bann Ebre, plizyer fwa Pol ti sit Lekritir Ebre. Pour aksantye oubyen klarifye en pwen, i ti souvan fer resorti en mo oubyen en lekspresyon kourt e apre i ti montre son sinifikasyon. (Ebr. 12:26, 27) Dan sa resi ki trouve dan Ebre sapit 3, Pol ti sit Psonm 95:7-11. Remarke ki apre i ti elabor lo trwa porsyon sa verse: (1) referans avek leker (Ebr. 3:8-12), (2) lenportans sa lekspresyon “Ozordi” (Ebr. 3:7, 13-15; 4:6-11), e (3) sinifikasyon sa deklarasyon: “Zot pa pou zanmen antre dan mon repo” (Ebr. 3:11, 18, 19; 4:1-11). Esey imit sa legzanp ler ou fer laplikasyon lo sak verse.

Dan sa resi ki trouve dan Lik 10:25-37 obzerv lefikasite Zezi kan i ti rezonn apartir Lekritir. En zonm ki ti konn byen Lalwa ti demande: “Met, ki fodre mon fer pour leritaz lavi eternel?” Dan son larepons Zezi ti premyerman envit sa zonm pour eksprim son pwenn-vi lo sa size, e apre Zezi ti met lanfaz lo lenportans pour fer sa ki Parol Bondye i dir. Ler i ti vin evidan ki sa zonm pa ti pe konpran sa pwen, Zezi ti diskit afon lo zis en mo dan sa verse—“prosen.” Olye ki senpleman dir ki sa mo i vedir, i ti servi en ilistrasyon pour ed sa zonm ariv lo sa bon konklizyon li menm.

Ti evidan ki ler i ti pe reponn bann kestyon, Zezi pa ti senpleman sit bann verse ki donn en larepons kler e direk. I ti analiz sa ki sa bann verse i dir e apre i ti fer laplikasyon lo sa kestyon ki ti pe ganny demande.

Ler lespwar rezireksyon ti pe ganny met odefi par bann Sadiseen, Zezi ti fikse latansyon lo en porsyon spesifik dan Egzod 3:6. Me i pa ti aret lanmenm apre ki i ti’n sit sa verse. I ti rezonn lo sa verse pour klerman montre ki rezireksyon i form parti plan Bondye.—Mark 12:24-27.

Mannyen byen sa abilite pour rezonn korekteman e dan en fason efikas apartir Lekritir pou vin en fakter enportan pour ou kapab vin en bon ansennyan.