Servi byen Kestyon

VI KI kestyon i demann en reaksyon—swa verbal oubyen mantal—alor zot ede pour enplik sa bann ki ekout ou dan sa diskisyon. Bann kestyon i kapab ed ou pour konmans en konversasyon e pour eksperyans en bon lesanz panse enteresan. Konman en orater ek en ansennyan, ou kapab servi kestyon pour stimil lentere, pour ed en dimoun rezonn lo en topik, oubyen pour aksantye sa ki ou dir. Ler ou byen servi bann kestyon, ou ankouraz lezot pour reflesir aktivman olye ki zis ekoute san fer nanryen. Annan en lobzektif antet, e demann bann kestyon dan en fason ki pou ed ou akonpli sa.

Pour ankouraz Konversasyon. Ler ou dan predikasyon, vey bann loportinite pour envit dimoun eksprim zot lekor si zot pare pour fer li.

Bokou Temwen i konmans bann diskisyon enteresan par senpleman demande, “Eski ou’n deza mazinen . . . ?” Ler zot swazir en kestyon ki lamazorite dimoun pe reflesir lo la, zot pou sertennman pas en bon moman dan predikasyon. Menm si sa dimoun pa’n deza reflesir lo sa kestyon avan sa, e sa kestyon i nouvo pour li, toudmenm i kapab stimil kiryozite. Bokou diferan keksoz i kapab ganny entrodwir par bann lekspresyon parey “Ki ou panse . . . ?,” “Konman ou santi . . . ?,” e “Eski ou krwar . . . ?”

Ler disip Filip ti apros en zofisye lakour Etyopyen ki ti pe lir aotvwa profesi Izai, Filip ti senpleman demande: “Eski ou konpran sa ki ou pe lir?” (Akt 8:30) Sa kestyon ti ouver semen pour Filip eksplik bann laverite konsernan Zezi Kri. Par servi en kestyon parey, serten Temwen dan letan modern in trouv dimoun ki ti vreman annan en gran dezir pour konn pli byen laverite Labib.

Enn fwa ki zot ganny loportinite pour eksprim zot prop pwenn-vi, laplipar dimoun pou pli pare pour ekout ou. Apre ki ou’n demann en kestyon, ekout atantivman. Montre lapresyasyon pour larepons sa dimoun, olye ki kritike. Ofer felisitasyon senser ler ou kapab fer li. Dan en lokazyon apre ki en Skrib ti’n “byen reponn,” Zezi ti felisit li, an dizan: “Ou pa lwen avek Rwayonm Bondye.” (Mark 12:34) Menm si ou pa partaz menm pwenn-vi avek sa lot dimoun, ou kapab remersi li pour eksprim son lekor. Sa ki i dir i kapab fer ou konn en latitid ki ou bezwen pran an konsiderasyon ler ou partaz laverite Labib avek li.

Pour entrodwir bann Lide enportan. Ler ou koz avek en group oubyen diskit avek en dimoun, esey servi bann kestyon ki pou anmenn ver bann lide enportan. Fer sir ki ou kestyon i enplik bann keksoz ki annan vre lenportans pour ou lodyans. Ou kapab osi servi bann kestyon ki stimil kiryozite vi ki larepons i pa klerman evidan. Si ou fer en pti poz apre ki ou’n demann en kestyon, i tre probab ki ou lodyans pou ekout sa ki swiv avek en pli gran lentere.

En rafal, profet Mika ti servi plizyer kestyon. Apre ki i ti’n demann sa ki Bondye i ekspekte avek sa bann ki ador li, sa profet ti demann ankor kat kestyon, tou le kat ti enkli diferan larepons. Tou sa bann kestyon ti ede pour prepar bann lekter pour sa larepons profon ki i ti servi pour konklir sa parti son diskisyon. (Mik. 6:6-8) Eski ou kapab fer en keksoz parey ler ou pe ansennyen? Esey fer li.

Pour rezonn lo en Topik. Kestyon i kapab ganny servi pour ed lezot konpran rezon par deryer en largiman. Zeova ti fer sa ler i ti pe prezant en deklarasyon serye avek Izrael, parey Malaki 1:2-10 ti montre. Premyerman, i ti dir zot: “Mon’n kontan zot.” Zot pa ti arive apresye sa lanmour, alor i ti demande: “Eski pa Ezai ti frer Zakob?” Apre, Zeova ti fer resorti konman Edom ti’n ganny devaste konman levidans pour rezon zot mesanste, Bondye pa ti kontan sa nasyon. Sa ti swiv avek bann ilistrasyon ansanm avek kestyon detanzaot ki i ti servi pour fer resorti fot Izrael pour pa arive byen azir anver son lanmour. Serten kestyon ti ganny prononse konmsi se sa bann pret enfidel ki ti pe demann sa bann kestyon. Lezot kestyon se Zeova ki ti demann bann pret. Sa dyalog i eksit bann lemosyon e mentenir nou latansyon; sa rezonnman i enposib pour konteste; sa mesaz i inoubliyab.

Serten orater i osi servi kestyon enpe dan menm fason. Kantmenm i pa neseser ki lodyans i reponn sa bann kestyon, mantalman zot enplike, konmsi pe partisip dan en dyalog.

Ler nou kondwir bann letid Labib, nou servi en metod ki demann sa etidyan pour partisipe. Byensir, i annan plis benefis si sa etidyan pa zis resit sa bann larepons lo papye. Avek en ton amikal, servi bann kestyon siplemanter pour rezonn avek sa etidyan. Lo bann panse enportan, ankouraz li pour servi Labib konman baz pour son larepons. Ou kapab osi demande: “Ki mannyer sa ki nou pe diskite i relye avek sa lot pwen ki nou’n etidye? Akoz sa pwen i enportan? Konman sa lide i devret afekte nou lavi?” En tel metod i pli efektiv ki olye eksprim ou prop konviksyon oubyen donn en leksplikasyon detaye ou menm. Dan sa fason, ou ed sa etidyan pour servi son “kapasite pour rezonnen” pour ador Bondye.—Rom. 12:1.

Si en etidyan pa sezi en serten lide, annan pasyans. Petet i pe esey konpar sa ki ou pe dir li avek sa ki i’n krwar ladan pour bokou lannen. Petet i bon pour abord sa topik par en lot laliny rezonnman. Parler, bann rezonnman tre senp i sifi. Pa ezite pour servi plizyer verse Labib. Servi bann ilistrasyon. Ansanm avek sa, servi bann senp kestyon ki ankouraz sa dimoun pour rezonn lo bann levidans.

Pour ankouraz eksprim bann Santiman profon. Ler dimoun i reponn bann kestyon, zot pa toultan revel sa ki zot vreman santi. Zot kapab senpleman donn bann larepons ki zot mazinen ou anvi tande. Disernman i neseser. (Prov. 20:5) Parey Zezi ti fer, ou kapab demande: “Eski ou krwar sa?”—Zan 11:26.

Ler bokou disip Zezi ti ofanse lo sa ki Zezi ti dir e ti abandonn li, Zezi ti envit son bann zapot pour eksprim zot santiman. I ti demande: “E zot, zot pa anvi ale, zot osi?” Pyer ti eksprim zot santiman, an dizan: “Senyer, kot lekel nou pou ale? Ou annan parol lavi eternel. Aprezan, nou, nou krwar e nou konnen ki oumenm ou sa Sen ki sorti kot Bondye.” (Zan 6:67-69) Dan en lot lokazyon, Zezi ti demann son bann disip: “Ki dimoun i dir lo Fis-de-Lonm?” I ti swiv avek en lot kestyon ki ti envit zot pour eksprim sa ki ti dan zot prop leker. “Me zot, ki zot dir mon ete?” An repons, Pyer ti dir: “Oumenm Mesi, Garson Bondye vivan.”—Mat. 16:13-16.

Ler ou pe kondwir en letid Labib, ou kapab vwar li itil pour adopte en lapros parey anver serten topik. Ou kapab demande: “Konman ou bann kanmarad lekol (oubyen koleg travay) i vwar sa topik?” Apre ou kapab demande: “Be ou, konman ou santi konsernan sa topik?” Ler ou konn vre santiman en dimoun, sa i fer li posib pour ou aport sa pli gran led dan ou rol konman ansennyan.

Pour azout Lanfaz. Bann kestyon i osi kapab ganny servi pour azout lanfaz avek bann lide. Zapot Pol ti fer sa dan Romen 8:31, 32: “Ki nou kapab dir alor lo sa size? Si Bondye i pour nou, lekel ki pou kapab kont nou? Si i pa’n eparny menm son prop Garson, me i’n donn li pour nou tou, alor konman, avek li, i pa pou donn nou tou keksoz.” Remarke ki, dan sak ka, sa kestyon i elabor lo sa seksyon presedan.

Apre ki i ti’n rikord zizman Zeova kont lerwa Babilonn, profet Izai ti eksprim konviksyon ferm par azoute: “Akoz Zeova bann larme li menm in konsey sa, e lekel ki kapab kas sa? E i’n avans son lanmen, e lekel ki kapab fer li retournen?” (Iza. 14:27) Par zot konteni, sa bann kestyon i sifi pour endike ki sa lide ki’n ganny eksprimen pa kapab ganny demanti. Pa fodre okenn larepons.

Pour devwal bann fo Rezonnman. Kestyon ki ganny byen planifye i osi bann zouti pwisan pour revel bann fo panse. Avan geri en zonm, Zezi ti demann bann Farizyen ek detrwa profeser Lalwa: “Nou Lalwa i permet geri en malad zour saba oubyen non?” Apre ki i ti’n geri sa zonm, i ti kontinyen avek en lot kestyon: “Lekel parmi zot si i annan en garson oubyen en bef ki’n arive tonm dan en pi pa pou tir li deswit, menm zour saba?” (Lik 14:1-6) Pa ti neseser okenn larepons, ni okenn larepons pa ti ganny ofer. Sa bann kestyon ti revele ki zot fason panse ti mal.

Parler, menm bann vre Kretyen i kapab ganny bann fo fason panse. An Korent dan premye syek, serten ti pe anmenn zot frer an kour pour rezoud bann problenm ki ti’n devret kapab rezoud antre zot. Konman ki zapot Pol ti tret sa zafer? I ti demann en seri kestyon direk pour aziste zot panse.—1 Kor. 6:1-8.

Avek labitid, ou kapab aprann servi byen kestyon. Sepandan, mazinen pour montre respe, sirtou ler pe koz avek bann dimoun ki pli aze, dimoun ki ou pa konnen personnelman, ek sa bann ki annan serten lotorite. Servi kestyon pour prezant laverite Labib dan en fason atiran.