Eski ou annan en Lespri imortel?

ESKI i annan lavi apre lanmor? Sa kestyon in trakas limanite pour bokou milener. Toudilon bann syek, bann dimoun dan tou sosyete in pans lo sa size e zot in aksepte diferan krwayans.

Partou dan lemonn osi byen ki dan rezyon Pasifik an Polinezi, Melanezi, ek Mikronezi, bokou dimoun i panse ki en “lespri” i sirviv apre lanmor en dimoun. Eski vreman i annan en keksoz anndan en dimoun ki kit son lekor e kontinyen viv apre ki i’n mor? Kisisa sa lespri dan en dimoun vivan? Ki i arive avek li letan nou mor? Labib, Parol Bondye, i donn bann repons satisfezan e laverite konsernan sa bann kestyon.

Kisisa sa Lespri?

Dan Labib, sa mo ki’n ganny tradwir “lespri” i annefe vedir “souf.” Me sa i enplik plis ki respirasyon. Par egzanp, Zak en ekriven Labib, ti deklare: “Lekor san lespri i mor.” (Zak 2:26) Alor, se lespri ki fer lekor aktif.

Sa lafors aktif pa kapab senpleman sa souf, oubyen sa ler, ki sirkil dan nou poumon. Akoz non? Se akoz apre ki respirasyon in arete, lavi i reste dan bann selil lekor pour en pti pe letan—“pour plizyer minit,” dapre The World Book Encyclopedia. Se pour sa rezon ki parfwa bann zefor pour redonn lavi en dimoun ki’n fek mor i kapab reisi, e ki bann lorgann dan lekor en dimoun ki’n fek mor, i kapab ganny remete dan lekor en lot dimoun. Me enn fwa ki letensel lavi i tennyen dan bann selil lekor en dimoun, tou zefor pour fer li retourn vivan, i anven. Tou souf ki egziste dan lemonn pa kapab fer ni menm en selil reviv. Lespri, i sa lafors lavi ki envizib—sa letensel lavi—ki gard bann selil vivan. Sa lafors lavi i ganny soutenir par respirasyon.—Zob 34:14, 15.

Eski sa lespri i aktif selman dan imen? Labib i ed nou pour retir en bon konklizyon dan sa domenn. Salomon ki ti en lerwa saz ti ekri: “Lekel ki konn lespri bann garson imen, si i mont anler; e lespri bebet, si i desann anba ver later?” (Eklezyast 3:21) Alor, zannimo konman zonm i annan en lespri. Konman sa?

Lespri, oubyen lafors lavi, i kapab ganny konpare avek kouran elektrik ki sirkile dan en masin oubyen en lekipman. Sa elektrisite ki envizib i kapab ganny servi pour perform plizyer fonksyon, depandan lo kalite lekipman ki i pe donn lenerzi. Par egzanp, en kouker elektrik i kapab ganny servi pour prodwir lasaler, en konpiter pour tret lenformasyon e donn bann kalkilasyon, e en televizyon i ganny progranmen pour donn portre avek son. Pourtan, sa kouran elektrik pa zanmen pran karakteristik sa lekipman ki i pe fer marse. I senpleman reste en lafors. Pareyman, lafors lavi pa pran karakteristik sa kreatir ki i fer vivan. I napa ni personnalite, ni abilite pour mazinen. Imen ek zannimo i annan “enn menm lespri.” (Eklezyast 3:19) Donk, letan en dimoun i mor, son lespri pa sorti pour al viv dan en lot landrwa konman en kreatir spirityel.

Alor, ki kondisyon en dimoun ki’n mor? E ki i arive avek sa lespri letan en dimoun i mor?

“Ou pou retourn an Pousyer”

Letan Adan, sa premye zonm ti dezobei komannman Bondye, Zeova ti dir li: “Dan lasyer ou vizaz ou pou manz dipen ziska ou retourn dan sirfas later, parski se ladan ki ou ti ganny pran. Parski ou lapousyer e ou pou retourn an pousyer.” (Zenez 3:19) Kote Adan ti ete avan ki Zeova ti kree li avek lapousyer? Definitivman, i pa ti okenn par! Senpleman, i pa ti egziste. Alor, letan Zeova Bondye ti dir ki Adan pou “retourn dan sirfas later,” i ti oule dir ki Adan pou mor. Adan pa ti pou ganny anmennen dan en lemonn spirityel. Apre lanmor i ti pou retourn parey avan, letan i pa ti ankor vivan, i ti pou nepli egziste. Son pinisyon ti lanmor—kot napa lavi—pa en transfer dan en lot lemonn.—Romen 6:23.

E ki’n arive avek lezot ki’n mor? Kondisyon bann dimoun mor in ganny klerman eksplike dan Eklezyast 9:5, 10, kot nou lir: “Bann mor pa konn nanryen . . . Napa ni travay, ni plan, ni konnesans, ni lentelizans dan latonm.” (Moffatt) Ler nou mor, nou nepli egziste. Psalmis ti ekrir ki letan en dimoun i mor, “son lespri i sorti, [sa dimoun] i retourn dan son sirfas later; sanmenm sa zour son bann panse i disparet.”—Psonm 146:4.

Klerman, bann mor pa konsyan nanryen, zot inaktif. Zot pa konn nanryen. Zot pa kapab vwar ou, tann ou, oubyen koz avek ou. Zot pa ni kapab ed ou oubyen fer ou ditor. Sertennman ou pa devret per dimoun mor. Me konman ki “lespri i sorti” avek en dimoun letan i mor?

Lespri “i retourn kot sa vre Bondye”

Labib i endike ki letan en dimoun i mor, “sa lespri i retourn kot sa vre Bondye ki’n donn li.” (Eklezyast 12:7) Eski i vedir ki en keksoz spirityel i vreman travers lespas pour al kot Bondye? Pa ditou! Lafason ki Labib i servi sa mo “retourn” i pa vedir en senp mouvman sorti dan en landrwa pour al dan en lot. Par egzanp, bann Izraelit enfidel ti ganny demande: “‘Retourn ver mwan, e mon pou retourn ver ou,’ Zeova bann larme ti dir.” (Malaki 3:7) Kan Izrael ti pou “retourn” ver Zeova sa ti vedir ki i ti pou kit en move semen e konform ankor avek semen drwat Bondye. E letan Zeova ti pou “retourn” ver Izrael sa ti vedir ki i ti pou tourn son latansyon favorab ankor lo son pep. Dan tou le de ka, sa ‘retour’ ti enplik en latitid, pa en vre deplasman sorti dan en landrwa pour al dan en lot.

Pareyman, kan en dimoun in mor napa okenn keksoz ki deplase sorti lo later pour al dan lesyel letan lespri sa dimoun i “retourn” kot Bondye. Mazinen ki lespri i lafors lavi. Enn fwa ki sa lafors in sorti dan en dimoun, zis Bondye ki annan sa abilite pour remet li dan sa dimoun. Sa lespri “i retourn kot sa vre Bondye” ki vedir tou lespwar pour lavenir sa dimoun i depan antyerman lo Bondye.

Konsider, par egzanp, sa ki Labib i dir lo lanmor Zezi. Lik, en ekriven levanzil ti rakonte: “Zezi ti kriy avek en lavwa for, an dizan, ‘Papa, dan ou lanmen, mon remet mon lespri!’ Kan i ti’n fini dir sa parol, Zezi ti ekspire.” (Lik 23:46) Kan lespri Zezi ti sorti dan li, i pa ti vreman al dan lesyel. Zezi pa ti ganny resisite parmi bann mor avan trwazyenm zour. E selman 40 zour plitar ki i ti mont dan lesyel. (Akt 1:3, 9) Sepandan, omoman son lanmor, avek lasirans Zezi ti les son lespri dan lanmen son Papa, par konfye antyerman dan abilite Zeova pour redonn li lavi.

Wi, zis Bondye ki kapab fer en dimoun retourn vivan. (Psonm 104:30) Ki lespwar manifik sa i donnen!

En Lesperans asire

Labib i dir: “Ler pe vini kot tou bann ki dan latonm souvenir pou antann son lavwa [lavwa Zezi] e pou sorti.” (Zan 5:28, 29, NW) Wi, Zezi Kri ti promet ki tou bann ki dan memwar Zeova pou ganny resisite, oubyen retourn vivan. Olye antann bann lanons tris ki bann dimoun in mor, bann rapor zwaye pou ganny donnen lo bann ki’n retourn vivan. Pa i en lazwa pour akey bann defen ki nou ti kontan!

Eski ou ti a kontan konn plis konsernan konman ou pou kapab benefisye avek sa lesperans ki Bondye i ofer? Nou envit ou pour ekri an adresan lo enn sa bann ladres pli ba pour en kopi sa brosir Ou Kapab Vin Zanmi Bondye!

Eksepte kan i endike, bann sitasyon Lekritir Ebre in ganny tradwir apartir New World Translation of the Holy Scriptures—With References an Angle e bann referans dan Lekritir Grek in ganny tire dan Nouvo Testaman an Kreol Seselwa. Kan NW i swiv en sitasyon, i endike ki sa verse in ganny tradwir apartir New World Translation of the Holy Scriptures—With References an Angle.