Sapit Kat
Sa Enn ki tou bann Profet in koz lo la
1. Ki bann fe konsernan legzistans Zezi avan ki i ti vin lo later, i montre konsernan son relasyon avek Zeova?
“PAPA i kontan son Garson e i montre li tou sa ki i pe fer.” (Zan 5:20) Vreman sa Garson in rezwir en relasyon entim avek son Papa, Zeova! Sa lentimite dan sa relasyon ti konmanse ler i ti ganny kree, bokou bokou milener avan son nesans konman en zonm. I ti sel Garson Bondye, sa enn ki zis li tousel ki’n ganny kree direkteman par Zeova li menm. Tou lezot keksoz dan lesyel e lo later ti ganny kree par mwayen sa premye Garson byenneme. (Kolosyen 1:15, 16) I ti osi servi konman Parol Bondye, oubyen son Portparol, sa Enn atraver ki lavolonte Bondye ti ganny kominike avek lezot. Sa Garson, li menm ki Bondye ti annan en lafeksyon partikilye pour li, ti vin sa zonm, Zezi Kri.—Proverb 8:22-30; Zan 1:14, 18; 12:49, 50.
2. Ziska ki degre bann profesi Labib in refer avek Zezi?
2 Avan ki Garson premye-ne Bondye ti ganny konsevwar dan en fason mirakile konman en imen, bokou bann profesi enspire ti’n ganny ekri konsernan li. Zapot Pyer ti afirm avek Korney: “Tou bann profet in koz lo li.” (Akt 10:43) Rol Zezi ti sitan ganny dekrir dan Labib ki en lanz ti dir avek zapot Zan: “Rann temwannyaz lo Zezi se sa ki enspir profesi.” (Revelasyon 19:10, NW) Sa bann profesi i klerman idantifye li konman Mesi. Zot diriz latansyon lo plizyer rol ki i ti pou zwe dan lakonplisman plan Bondye. Tousala i devret vreman enteres nou ozordi.
Sa ki bann Profesi in revele
3. (a) Dan profesi Zenez 3:15, ki sa serpan, “sa fanm,” ek ‘semans sa serpan’ i reprezante? (b) Akoz ‘kraz latet sa serpan’ i tre enportan pour bann serviter Zeova ozordi?
3 Premye parmi sa bann profesi ti ganny anonse apre rebelyon an Edenn. Zeova ti dir avek sa serpan: “Mon pou met en ostilite ant ou ek sa fanm, ant ou semans ek son semans. I pou kraz ou latet e ou pou kraz son talon.” (Zenez 3:15) An realite, sa profesi ti pe ganny adrese avek Satan, sa enn ki ti ganny reprezante par sa serpan. “Sa fanm” se lorganizasyon fidel Zeova dan lesyel, ki parey en fanm fidel pour li. ‘Semans sa serpan’ i enkli tou bann lanz ek imen ki demontre lespri Satan, sa bann ki opoz Zeova ek Son pep. ‘Kraz latet sa serpan’ i vedir destriksyon final rebelyon Satan, ki ti kalonmni Zeova e anmenn bokou soufrans lo limanite. Me lekel lidantite parti prensipal sa ‘semans’ ki pou kraz latet sa serpan? Pour plizyer syek, sa in reste en “sekre.”—Romen 16:20, 25, 26.
4. Konman ki laliny desandans Zezi i ede pour idantifye li konman sa Semans promiz?
4 Apre ki anviron 2,000 an dan listwar imen ti’n pase, Zeova ti fourni plis detay. I ti revele ki sa Semans ti pou aparet dan desandans Abraam. (Zenez 22:15-18) Sepandan, desandans ki ti pou anmenn ziska sa Semans ti pou depan lo swa Bondye, non pa dapre desandans natirel. Kantmenm, Abraam ti annan lanmour pour son garson Ismael, piti Agar, Zeova ti dir: “Mon pou etablir mon lalyans avek Izaak, ki Sara pou donn ou.” (Zenez 17:18-21) Plitar sa lalyans ti ganny konfirmen, pa avek premye garson Izaak, Ezai, me avek Zakob, zanset sa 12 tribi Izrael. (Zenez 28:10-14) Plitar, ti ganny revele ki sa Semans ti pou ne dan tribi Zida, dan desandans David.—Zenez 49:10; 1 Kronik 17:3, 4, 11-14.
5. Kan Zezi ti konmans son minister lo later, ki levidans ti annan ki i ti Mesi?
5 Ki lezot lendikasyon ki ti ganny donnen konsernan lidantite sa Semans? Plis ki 700 lannen avan, Labib ti nonm Betleenm konman landrwa nesans sa Semans promiz. I ti osi revele ki sa Semans ti’n deza egziste “depi bann zour letan endefini,” depi ler i ti ganny kree dan lesyel. (Mika 5:2) Letan egzakt son laparisyon lo later konman Mesi ti’n osi ganny predir, atraver profet Danyel. (Danyel 9:24-26) E kan Zezi ti ganny swazir avek lespri sen, anfet i ti vin sa Enn ki Zeova in swazir, lavwa Bondye li menm ki ti sorti dan lesyel ti klerman idantifye li konman Son Garson. (Matye 3:16, 17) Sa Semans ti’n ganny revele! Donk, Filip ti kapab dir avek konviksyon: “Nou’n trouv li sa enn ki Moiz ek bann profet ti ekri lo li. I apel Zezi.”—Zan 1:45.
6. (a) Dapre Lik 24:27, ki bann disip Zezi ti realize? (b) Lekel ki parti prensipal ‘semans sa fanm,’ e ki i oule dir par kraz latet sa serpan?
6 Apre sa, bann disip Zezi ti realize ki bokou referans profetik konsernan li ti’n ganny enkli dan bann Lekritir enspire. (Lik 24:27) Ti vin pli evidan ki Zezi i parti prensipal ‘semans sa fanm,’ sa enn ki pou kraz latet sa serpan, setadir elimin Satan konpletman. Par mwayen Zezi, tou bann promes Bondye pour limanite, tou bann keksoz ki lontan nou pe esper avek enpasyans, pou ganny akonpli.—2 Korentyen 1:20.
7. Apard ki idantifye sa Enn ki bann profesi i koz lo la, ki lezot keksoz ki itil pour analize?
7 Vi ki nou konn sa, ki lefe i devret fer lo nou? Labib i koz lo en zofisye Etyopyen ki ti’n lir serten profesi konsernan sa Liberater ek Mesi. I ti vwar li difisil pour konpran sa ki i ti pe lir, alor i ti demann evanzelis Filip: “Lo lekel ki sa profet pe koze?” Me sa zofisye pa ti les sa zafer dan en kwen letan i ti’n ganny larepons. Apre ki i ti’n ekout atantivman sa leksplikasyon ki Filip ti donnen, sa zonm ti realize ki i bezwen fer kek keksoz apre ki i ti’n konpran e apresye sa profesi ki ti’n ganny akonpli. I ti konpran ki i ti bezwen ganny batize. (Akt 8:32-38; Izai 53:3-9) Eski nou reazir dan sa menm fason?
8. (a) Ki lesey Abraam pour ofer Izaak ti endike? (b) Akoz Zeova ti dir avek Abraam ki tou nasyon pou ganny beni par mwayen sa Semans, e konman ki sa i aplik pour nou ozordi?
8 Reflesir, osi, lo sa resi tousan kan Abraam ti pe al ofer Izaak, son sel Garson ki Sara ti gannyen. (Zenez 22:1-18) Sa ti endik sa ki Zeova ti pou fer—ofer son sel Garson: “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Sa i donn nou konfyans ki zis parey Zeova in donn son sel Garson pour akonpli Son plan, I pou osi “donn nou tou keksoz.” (Romen 8:32) Ki nou bezwen fer lo nou par? Parey i ganny rikorde dan Zenez 22:18, Zeova ti dir Abraam ki tou nasyon pou ganny beni par mwayen sa Semans, “parske [Abraam ti] ekout lavwa [Bondye].” Nou osi nou bezwen ekout Zeova ek son Garson: “Tou dimoun ki krwar dan son Garson i ganny lavi eternel. Tou dimoun ki pa obei son Garson pa pou war lavi, me i ekspoz li anba lakoler Bondye.”—Zan 3:36.
9. Si nou apresye lesperans pour lavi eternel ki’n vin en realite par sakrifis Zezi, ki nou pou fer?
9 Si nou apresye lesperans lavi eternel ki’n vin en realite par sakrifis Zezi, nou pou anvi fer bann keksoz ki Zeova in dir nou atraver Zezi. Sa i relye etrwatman avek nou lanmour pour Bondye e pour nou prosen. (Matye 22:37-39) Zezi ti montre ki nou lanmour pour Zeova pou motiv nou pour ansenny lezot ‘pour obei tou sa ki [Zezi in] konmann [nou].’ (Matye 28:19, 20) E nou anvi partaz sa lanmour avek nou bann konpanyon ki servi Zeova par regilyerman ‘rasanble’ avek zot. (Ebre 10:25; Galat 6:10) Osi, par ekout Bondye ek son Garson, nou pa devret panse ki zot ekspekte perfeksyon avek nou. Ebre 4:15 i dir ki Zezi, konman nou Gran Pret, i kapab “senpatiz avek nou febles.” Pa sa i rekonfortan, sirtou kan nou apros Bondye dan lapriyer atraver Kris pour demann led pour sirmont nou bann febles!—Matye 6:12.
Montre Lafwa dan Kris
10. Akoz napa okenn lot non apard ki Zezi Kri par ki nou kapab ganny sove?
10 Apre ki i ti’n eksplik lakour siprenm Zwif dan Zerizalenm ki profesi Labib in ganny akonpli dan Zezi, zapot Pyer ti konklir avek kouraz: “Napa okenn lot non dan lemonn ki Bondye in donnen par lekel nou kapab ganny sove.” (Akt 4:12) Vi ki tou desandans Adan i bann peser, zot lanmor napa okenn valer ki kapab ganny servi konman en ranson pour personn. Me Zezi ti parfe, e son lavi ti annan valer sakrifisyel. (Psonm 49:6-9; Ebre 2:9) I ti ofer Bondye en ranson ki ti koresponn egzakteman avek valer sa lavi parfe ki Adan ti’n perdi. (1 Timote 2:5, 6) Sa i donn nou loportinite pour ganny lavi eternel dan nouvo monn Bondye.
11. Eksplike konman sakrifis Zezi i kapab benefisye nou bokou.
11 Sa ranson i osi donn nou loportinite pour resevwar lezot benefis, menm konmela. Par egzanp, kantmenm nou bann dimoun ki fer pese, sakrifis Zezi i fer li posib pour nou annan en konsyans kler akoz nou ganny pardonnen nou pese. Sa i plis ki bann Izraelit ti gannyen par sakrifis zannimo ki Lalwa Mozaik ti demande. (Akt 13:38, 39; Ebre 9:13, 14; 10:22) Sepandan, pour ganny en tel pardon nou bezwen admet onnetman ki kantite nou bezwen sakrifis Kris: “Si nou dir ki nou san pese, nou pe anbet nou lekor e laverite pa dan nou. Si nou konfes nou pese, Bondye ki fidel e zis, pou pardonn nou pese e pirifye nou avek tou sa ki mal.”—1 Zan 1:8, 9.
12. Akoz batenm i en fakter enportan pour ganny en konsyans kler devan Bondye?
12 Ki mannyer bann peser i kapab eksprim lafwa dan Kris ek son sakrifis? Kan bann dimoun dan premye syek ti vin krwayan, zot ti demontre sa piblikman. Konman? Zot ti batize. Akoz? Parski Zezi ti demande ki tou son disip i ganny batize. (Matye 28:19, 20; Akt 8:12; 18:8) Napa nanryen ki pou anpes en dimoun fer sa kan son leker in vreman ganny touse par provizyon ki Zeova in donn avek lanmour atraver Zezi. I pou fer nenport sanzman neseser dan son lavi, dedye li avek Bondye dan lapriyer, e senboliz son dedikasyon par batenm. Se par demontre lafwa dan sa fason ki i fer ‘demann avek Bondye pour en konsyans kler.’—1 Pyer 3:21.
13. Si nou realize ki nou’n komet en pese, ki nou devret fer, e akoz?
13 Byensir, menm apre sa pa, nou pou annan ankor bann tandans pour fer pese. Ki ou pou fer alor? Zapot Zan ti dir: “Mon pe ekri zot sa pour ki zot pa fer pese, me si okenn antre zot i arive fer pese nou annan en avoka kot Bondye, Zezi-Kri, nou Lazistis. Limenm, viktim sakrifis ki permet nou ganny pardon nou pese.” (1 Zan 2:1, 2) Eski sa i vedir ki okenn pese ki nou komet si nou priy avek Bondye pour pardon, i pou ganny pardonnen? Pa neseserman. Lakle pour ganny pardonnen se repantans senser. Osi, petet i neseser pour rod led avek bann ki pli aze e pli eksperyanse dan kongregasyon Kretyen. Nou devret rekonnet ki sa ki nou’n fer i mal e senserman regrete afen ki nou pou fer en vre zefor pour evite repet sa ki nou’n fer. (Akt 3:19; Zak 5:13-16) Si nou fer sa, nou kapab asire ki Zezi pou ed nou e nou pou reganny faver Zeova.
14. (a) Eksplik en fason enportan kot sakrifis Zezi in benefisye nou. (b) Si nou vreman annan lafwa, ki nou pou fer?
14 Sakrifis Zezi in ouver semen pour lavi eternel dan lesyel pour en “pti troupo,” parti segonder sa semans dan Zenez 3:15. (Lik 12:32; Galat 3:26-29) I’n osi donn plizyer bilyon imen loportinite pour ganny lavi eternel dan paradi lo later. (Psonm 37:29; Revelasyon 20:11, 12; 21:3, 4) Lavi eternel i “don gratwit ki Bondye i donnen . . . dan Kris-Zezi nou Senyer.” (Romen 6:23; Efezyen 2:8-10) Si nou annan lafwa dan sa don ek lapresyasyon pour fason dan ki i’n ganny fer posib, nou pou demontre li. Si nou rekonnet konman ki dan en fason merveye Zeova in servi Zezi pour akonpli Son lavolonte e konman i esansyel pour ki nou tou nou swiv byen legzanp Zezi, nou pou fer minister Kretyen vin en aktivite pli enportan dan nou lavi. Nou lafwa pou vin evidan par sa konviksyon ki nou koz avek, konsernan sa don merveye ki sorti kot Bondye.—Akt 20:24.
15. Konman ki lafwa dan Zezi Kri i fer nou ini?
15 En tel lafwa i vreman fer nou ini! Par mwayen lafwa, nou apros pli pre avek Zeova, son Garson, ek lezot frer ek ser dan kongregasyon Kretyen. (1 Zan 3:23, 24) I fer nou rezwir ki Zeova dan son labonte in donn son Garson “en non pli enportan ki tou lezot non [eksepte non Bondye], pour ki devan non Zezi tou sa ki dan lesyel, lo later e dan lemonn pli ba ki later i tonm azenou, e ki tou lalang i proklanmen, ki Zezi-Kri i Senyer pour laglwar Bondye, Papa.”—Filipyen 2:9-11.
Revizyon
• Kan Mesi ti aparet, akoz son lidantite ti evidan pour sa bann ki ti vreman krwar dan Parol Bondye?
• Ki serten keksoz nou devret fer pour montre nou lapresyasyon pour sakrifis Zezi?
• Dan ki fason sakrifis Zezi in deza benefisye nou? Konman ki sa i ed nou kan nou priy avek Zeova pour pardon pese?
[Portre lo paz 36]
Zezi ti dir avek son bann disip ki zot devret ansenny lezot pour obeir bann komannman Bondye