Zenn​—Ki ou pou fer avek ou Lavi?

“MON anvi byen reisi dan lavi.” En zenn fiy adolesan i dir. Sirman ou osi ou anvi menm keksoz. Me konman ki ou kapab “byen reisi” dan lavi? Medya ek ou kanmarad lekol, petet menm ou ansennyan, i kapab dir ki pour byen reisi ou bezwen ganny en kantite larzan ek en plas travay ki fer ou ganny rekonnet dan lasosyete—ganny konsidere konman en dimoun ki’n byen reisi dan lavi!

Sepandan, Labib i averti bann zenn ki rod reisit materyel i konmsi ou pe “tay deryer divan.” (Eklezyast 4:4) En rezon pour sa, i akoz napa bokou zenn ki vreman arive ganny larises ek popilarite. E bann ki reisi fer li, finalman zot tre dezapwente, i pa ditou sa ki zot ti pe ekspekte. En zenn ki reste Langleter e ki’n arive ganny en bon ledikasyon akademik ki fer li ganny rekonnet dan lasosyete, i dir: “Reisi lo plan materyel i parey en bwat vid, omoman ki ou reflesir ki sa in anmennen pour ou, ou vwar ki napa nanryen ladan.” I vre, en dyob i kapab parler fer ou ris e fer lezot dimoun rekonnet ou. Me i pa kapab satisfer ou “bezwen spirityel.” (Matye 5:3, New World Translation) Anmenmtan, 1 Zan 2:17 i averti ki “lemonn pou disparet.” Menm si ou ti pou arive reisi dan sa monn, i pa pou dir pour lontan.

Alor Eklezyast 12:1 i enplor bann zenn: “Mazin ou Kreater pandan ki ou ankor zenn.” (Today’s English Version) Wi, pli bon fason pour servi ou lavi i dan servis Zeova Bondye. Me avan sa, ou bezwen kalifye pour antre dan servis Bondye. Ki mannyer ou kapab fer sa? E kwa ki enplike dan servis Bondye?

Kalifye pour vin en Temwen Zeova

Premyerman, ou bezwen vreman anvi servi Bondye—e sa pa vin otomatikman, menm si ou paran i Kretyen. I depan lo ou pour ou arive annan en relasyon personnel avek Zeova. En fiy adolesan i dir: “Priye i ed ou pour annan en relasyon personnel avek Zeova.”—Psonm 62:8; Zak 4:8.

Romen 12:2 (NW) i fer resorti en lot keksoz ki ou bezwen fer. I dir: “Vwar pour zot menm ki lavolonte Bondye i bon, agreab e parfe.” Eski i’n deza arive ki ou pa’n tro tro dakor avek serten keksoz ki ou’n ganny ansennyen? Si wi, alor swiv sa konsey ki Labib i donnen, e ‘vwar pour ou menm’ si sa bann keksoz i vre! Fer ou prop resers. Lir Labib ek bann piblikasyon ki baze lo Labib. Me aprann lo Bondye pa vedir zis servi ou lespri pour etidye lenformasyon zis pour konnen ki i annan ladan. Pran letan pour reflesir lo sa ki ou lir afen ki i antre byen e ki i tous ou leker. Sa pou fer ou lanmour pour Bondye grandir.—Psonm 1:2, 3.

Apre, lo ou menm esey partaz sa ki ou pe aprann, petet avek ou kanmarad lekol. Apre sa, ou kapab pres port-an-port. Petet ler ou pe prese ou kapab rankontre en kanmarad lekol, e sa i kapab fer ou anbarase okonmansman. Me Labib i ankouraz nou pour “pa onte pour anons Levanzil.” (Romen 1:16) Ou pe anmenn en mesaz ki donn lavi ek lespwar! Akoz ou bezwen onte?

I kapab ki ou paran i Kretyen, e petet ou deza pe akonpanny zot dan predikasyon. Me eski ou kapab fer plis ki zis debout devan laport san dir nanryen oubyen senpleman plas magazin ek trak? Eski ou kapab koze devan laport, par servi Labib pour enstri sa met lakour? Si ou pa kapab fer sa, rod led avek ou paran oubyen avek en dimoun pli eksperyanse dan kongregasyon. Fer li ou lobzektif pour kalifye konman en proklanmater non batize!

Avek letan, ou pou santi ou motive pour dedye ou lavi, savedir fer en ve avek Bondye ki depi konmela ou pou servi li. (Romen 12:1) Me, dedikasyon pa zis en zafer personnel. Bondye i ekspekte tou dimoun pour “fer deklarasyon piblik pour delivrans.” (Romen 10:10, NW) E avan ki ou batize, ou pou fer en deklarasyon ou lafwa an piblik. Apre sa, ou pou batize dan delo. (Matye 28:19, 20) I vre ki batenm i en pa serye. Me pa ezite pour pran sa pa akoz ou santi ki kekfwa ou kapab tonbe. Si ou depan lo Bondye pour ganny lafors, i pou donn ou “sa pisans ki napa son parey” pour reste ferm.—2 Korentyen 4:7; 1 Pyer 5:10.

Zour ki ou batize, ou vin en Temwen Zeova. (Izai 43:10) Sa i devret annan en gran lefe lo fason ki ou pou servi ou lavi. Dedikasyon i enplik ‘aret mazin zis ou lekor.’ (Matye 16:24) Petet ou bezwen abandonn serten lobzektif ek lanbisyon personnel e “rod plito Rwayonm Bondye.” (Matye 6:33) Dedikasyon ek batenm i ouver bokou loportinite devan ou. Annou vwar serten.

Loportinite pour servi Bondye aplentan

● Pionye i enn sa bann loportinite. En proklanmater ki pionye i en Kretyen batize egzanpler ki’n organiz son lavi pour depans omwen 70 er-d-tan sak mwan pour pres sa bon nouvel. Pas plis letan dan predikasyon pou ed ou devlop ou abilite pour prese e ansennyen. Bokou pionye in eksperyans sa lazwa pour ed zot etidyan Labib vin bann Temwen batize. Eski i annan en travay dan sa monn ki osi enteresan e satisfezan parey servis pionye?

Laplipar pionye i travay amitan pour kapab kouver zot bann depans toulezour. Bokou i plàn davans pour sa responsabilite par aprann en metye dan lekol oubyen avek zot paran. Si ou ek ou paran, zot santi ki i pou bon pour ou ganny serten formasyon siplemanter apre lekol segonder, fer sir ki ou motivasyon i pa pour fer en kantite larzan, me pour siport ou predikasyon e petet pour ou servi konman en minis aplentan.

Toutfwa, sa ki en pionye i konsantre lo la dan son lavi i pa son travay profann, me son minister—ed lezot pour ganny lavi! Akoz ou pa fer servis pionye vin ou lobzektif personnel? Fer pionye i souvan anmenn lezot privilez. Par egzanp, serten pionye i deplas dan bann landrwa kot i annan en pli gran bezwen pour proklanmater Rwayonm. Lezot i aprann en lot langaz e servi swa dan en kongregasyon lokal ki koz en lot langaz oubyen menm al dan en lot pei. Wi, fer pionye i en fason viv ki anmenn bokou rekonpans!

● Servis Misyonner i en lot loportinite. Depi 1943, Lekol Biblik Gilead in donn bann pionye kalifye loportinite pour swiv en kour ekselan ki form zot pour vin misyonner. Bann ki fini sa lekol i ganny loportinite pour servi konman proklanmater aplentan dan bann pei etranze. Dan bokou sa bann pei, kondisyon lavi pa fasil, alor pour servi konman en misyonner ou bezwen annan en bon lasante ek bokou lenerzi. Toudmenm, bann misyonner i viv en lavi vreman zwaye e enteresan.

● Lekol Formasyon Ministeryel ti ganny kree pour form bann ansyen ek asistan ministeryel selibater. Sa kour entansif ki dir pour wit semenn, i kouver bann topik parey responsabilite bann ansyen ek asistan ministeryel, lorganizasyon, ek lar pour ansennyen an piblik. Serten i ganny demande pour servi dan zot prop pei. Lezot i ganny demande pour servi dan lezot pei.

● Servis Betel i enplik servi konman en volonter dan en biro brans Temwen Zeova. Serten manm lafanmiy Betel i servi direkteman dan prodiksyon bann piblikasyon ki baze lo Labib. Lezot i ganny lezot travay, parey okip Betel ek bann lekipman oubyen okip bezwen fizik lafanmiy Betel. Tou sa bann travay i bann privilez sakre dan servis Zeova. Deplis, bann ki dan Betel i kontan pour konnen ki nenport kwa ki zot fer, i benefisye en gran kantite zot bann frer ek ser partou dan lemonn.

Parler serten frer ek ser ki annan bann abilite spesyal i ganny envite pour vin servi dan Betel. Sepandan, laplipar i resevwar zot formasyon apre ki zot in antre dan Betel. Bann ki dan Betel pa pe servi pour ganny keksoz materyel me zot kontant zot avek manze ki zot gannyen, landrwa reste ki zot ganny ofer, e avek en pti ranboursman pour zot bann depans personnel. En zenn manm lafanmiy Betel i dekrir son servis dan sa fason: “I gou! I pa fasil pour swiv son progranm routin, me mon’n benefisye en kantite par servi dan Betel.”

● Servis enternasyonal i permet en dimoun pour partisip dan konstriksyon bann Betel ek Lasal Rwayonm. Parey zot ganny apele, serviter enternasyonal, zot vwayaz dan lezot pei pour ede dan travay konstriksyon. Sa i en kalite servis sakre ki parey avek travay sa bann ki ti konstri tanp Salomon. (1 Lerwa 8:13-18) Laranzman pour okip bezwen bann serviter enternasyonal i parey avek pour lafanmiy Betel. I vreman en privilez pour bann frer ek ser servi dan sa laspe aktivite an loner Zeova!

Servi Zeova avek tou ou Leker

Napa en pli bon fason pour ou servi ou lavi ki dan servis Zeova. Akoz ou pa reflesir lo servi Bondye aplentan e fer li ou lobzektif personnel? Diskit servis aplentan avek ou paran, bann ansyen dan ou kongregasyon, ek ou sirveyan rezyonal. Si ou enterese dan servis Betel, Gilead, oubyen Lekol Formasyon Ministeryel, asiste bann renyon ki ganny fer pour bann ki enterese pandan bann diferan lasanble.

I vre, pa tou dimoun ki kalifye oubyen kapab fer servis aplentan. Parler bann problenm lasante, sitiasyon finansyel, ek lobligasyon fanmiy i limit lakantite ki en dimoun i kapab fer. Kantmenm sa, tou Kretyen ki’n dedye zot lavi i devret pran aker sa komannman Labib: “Kontan Senyer ou Bondye avek tou ou leker, avek tou ou lam, e avek tou ou lespri.” (Matye 22:37) Zeova i ekspekte ki ou fer tou sa ki ou kapab dapre ou sitiasyon. Alor nenport sitiasyon ki ou ladan, fer servis Zeova vin laspe pli enportan dan ou lavi. Etablir bann lobzektif teokratik ki ou kapab akonpli. Wi, “mazin ou Kreater pandan ki ou ankor zenn”—e an fezan sa, ou pou ganny beni eternelman!

Eksepte kan i endike, bann sitasyon Lekritir Ebre dan sa trak in ganny tradwir apartir New World Translation of the Holy Scriptures e bann sitasyon dan Lekritir Grek in ganny retire dan Nouvo Testaman an Kreol Seselwa.