“Sa bann zonm ti napa bokou ledikasyon e . . . zot ti bann zonm ordiner”

1, 2. Ki mirak Pyer ek Zan ti fer o bor baro tanp?

I APREMIDI e soley pe tap lo sa lafoul. Bann Zwif ek bann disip Zezi pe antre dan lakour tanp. Byento i pou ariv ler “pour lapriyer.”a (Akt 2:46; 3:1) Pyer ek Zan i dan sa lafoul e zot pe al kot baro tanp ki ti apel Zoli Baro. Menm si i annan tapaz bann dimoun ki pe koze ek tapaz marse, en mandyan dan son 45 an an montan ki paralize depi son nesans, pe demann bann dimoun larzan.​—Akt 3:2; 4:22.

² Anmezir ki Pyer ek Zan i vin pli pre, sa mandyan i kontinyen demann larzan parey i abitye fer. Sa bann zapot i arete e sa mandyan i get zot. Pyer i dir li: “Mon napa ni lor, ni larzan, me sa ki mon annan mon donn ou. O non Zezi Kri sa Nazareen, marse!” Zis mazin sa sok ki lafoul i gannyen ler Pyer i atrap lanmen sa zonm paralize e pour premye fwa dan son lavi, sa zonm i debout! (Akt 3:6, 7) Eski ou kapab imazin sa zonm pe get son lipye ki’n geri e i pe esey konmans marse? I pa drol ki i konmans sote partou e loue Bondye byen for!

3. Ki kado ki annan en kantite valer ki sa lafoul ek sa zonm ki ti’n ganny geri ti kapab gannyen?

³ Sa lafoul i dan lazwa e zot tay kot Pyer ek Zan kot bann kolonn Salomon. Pyer i eksplik zot ki sa ki ti’n fek arive vedir. Ler Zezi ti lo later, i ti debout dan sa menm landrwa e ansenny bann dimoun. (Zan 10:23) Pyer i donn sa lafoul ek sa zonm ki ti paralize, en kado ki annan plis valer ki larzan oubyen lor. Sa kado i osi annan plis valer ki gerizon. Bann dimoun i ganny loportinite pour repantir, pour zot pese ganny efase e pour zot vin bann disip Zezi Kri, “sa Enn ki’n ganny apwente pour donn lavi.”​—Akt 3:15.

4. (a) Ki problenm bann disip Zezi ti gannyen akoz sa gerizon? (b) Ki sa de kestyon nou pou reponn?

⁴ Sa ti en gran zour! En dimoun ti’n ganny geri e aprezan i ti kapab marse. Plizyer milye lezot dimoun in ganny sa loportinite pour ganny konnesans egzakt e konpran Parol Bondye pour zot kapab viv dan en fason ki onor Bondye. (Kol. 1:9, 10) An plis ki sa, sa ki ti arive sa zour ti fer bann dimoun dan lotorite konmans fer problenm pour bann disip Zezi ki ti fidel. Zot ti esey anpes bann disip Zezi obei sa lord ki Zezi ti’n donn zot pour anons sa mesaz Rwayonm. (Akt 1:8) Ki nou kapab aprann avek fason fer ek latitid Pyer ek Zan ki ti “bann zonm [ki] ti napa bokou ledikasyon e ki . . . ti bann zonm ordiner” ler zot ti pe rann temwannyaz avek sa lafoul?b (Akt 4:13) Ki mannyer nou kapab swiv zot legzanp ek legzanp lezot disip ler bann dimoun ti opoz zot?

Pa “par nou prop pouvwar” (Akt 3:11-26)

5. Ki nou aprann avek lafason ki Pyer ti koz avek sa lafoul?

⁵ Pyer ek Zan ti debout devan sa lafoul e zot ti konnen ki serten dimoun dan sa lafoul ti’n demande pour touy Zezi lo poto. (Mark 15:8-15; Akt 3:13-15) Mazin sa kouraz ki Pyer ti demontre ler i ti dir avek lardyes ki sa zonm ki ti paralize ti’n ganny geri o non Zezi. Pyer ti koz fran avek zot e i ti dir zot laverite. I ti dir sa lafoul ki zot osi zot ti responsab pour lanmor Zezi. Me Pyer pa ti ankoler avek sa bann dimoun akoz zot “pa ti konnen ki zot ti pe fer.” (Akt 3:17) I ti koz avek zot konman son bann frer e i ti konsantre lo bann keksoz ankourazan konsernan sa mesaz Rwayonm. Si zot ti repantir e annan lafwa dan Zezi, Zeova ti pou “donn zot soulazman.” (Akt 3:19) Pareyman, nou osi nou bezwen koz fran e avek lardyes ler nou pe koz lo zizman Bondye. An menm tan, nou pa devret koz dan en fason brit oubyen ziz lezot. O kontrer, nou devret vwar zot konman bann dimoun ki kapab vin nou bann frer ek ser e parey Pyer, nou devret konsantre lo bann keksoz ankourazan konsernan sa mesaz Rwayonm.

6. Ki mannyer Pyer ek Zan ti montre ki zot ti annan limilite e ki zot ti konn zot limit?

⁶ Bann zapot ti konn zot bann limit. Zot pa ti dir ki zot ki ti’n fer sa bann mirak lo zot menm. Pyer ti dir sa lafoul: “Akoz zot pe get nou koumsa, konmsi se par nou prop pouvwar ouswa devosyon pour Bondye ki nou’n fer li marse?” (Akt 3:12) Pyer ek lezot zapot ti konnen ki Bondye ki ti donn zot lafors pour fer tou sa bann bon keksoz ki zot ti fer dan predikasyon me pa akoz zot prop lafors. Alor, avek limilite zot ti fer bann dimoun konnen ki zot devret loue Zeova ek Zezi pour tou sa bann keksoz ki zot ti fer.

7, 8. (a) Ki kado nou kapab donn bann dimoun? (b) Ki mannyer sa promes pour “retabli tou keksoz” pe ganny akonplir ozordi?

⁷ Nou osi nou bezwen montre ki nou konn nou bann limit ler nou pe pres sa bon nouvel lo Rwayonm. I vre, ozordi lespri sen Bondye pa donn bann Kretyen sa abilite pour fer mirak. Me kantmenm sa, nou kapab ed bann dimoun pour annan lafwa dan Bondye ek Zezi e pour ganny sa menm kado ki Pyer ti donn bann dimoun, setadir sa loportinite pour Zeova pardonn zot pese e soulaz zot. Tou le lannen, plizyer santenn milye dimoun i aksepte sa kado e zot batize e vin bann disip Kris.

⁸ Nou pe viv dan sa letan ki Pyer ti koz lo la, setadir “kot Bondye pou retabli tou keksoz.” Parey “[Bondye] ti promet atraver son bann profet sen dan letan lontan,” sa Rwayonm ti ganny etablir dan lesyel an 1914. (Akt 3:21; Ps. 110:1-3; Dan. 4:16, 17) En pe letan apre, Zezi ti konmans diriz sa travay pour retabli vre ladorasyon lo later. Alor, plizyer milyon dimoun in vin dan en paradi spirityel ki Rwayonm Bondye i dirize. Zot in tir sa vye personnalite e zot in “devlop sa nouvo personnalite ki’n ganny kree dapre lavolonte Bondye.” (Efe. 4:22-24) Zis parey lespri sen Bondye ti geri sa zonm ki ti paralize, lespri sen Bondye ki’n fer sa travay ekstraordiner, me pa bann imen. Parey Pyer, nou bezwen annan lardyes e servi byen Parol Bondye pour ansenny lezot. Ler nou ed bann dimoun vin bann disip Zezi, sa i akoz Bondye i donn nou lafors me pa akoz nou prop lafors.

‘Nou pa kapab aret koze’ (Akt 4:1-22)

9-11. (a) Ki bann sef Zwif ti fer ler zot ti tann sa ki Pyer ek Zan ti pe ansennyen? (b) Ki bann zapot ti deside fer?

⁹ I ti annan en kantite tapaz, pa zis akoz sa diskour ki Pyer ti’n fer me osi akoz sa zonm ki ti paralize ki ti’n ganny geri ti pe sote e kriye. Alor sef gard tanp, ki ti’n ganny swazir pour vey kot tanp ek bann sef pret ti degaze pour al rode ki pe pase. I paret ki sa bann zonm ti bann Sadiseen. Zot ti en group larelizyon ki ti ris e ki ti annan en kantite pouvwar politik e zot ti fer tou sa ki zot ti kapab pour reste anpe avek bann Romen. Zot pa ti aksepte bann lalwa ki bann Farizyen ti swiv e zot pa ti krwar dan rezireksyon.c Zot ti bezwen byen mekontan ler zot ti vwar Pyer ek Zan dan tanp pe ansenny bann dimoun ki Zezi ti’n resisite!

¹⁰ Zot ti ankoler e zot ti met Pyer ek Zan dan kaso e son lannmen zot ti anmenn zot devan lakour siprenm Zwif. Sa bann zonm ki ti krwar ki zot ti pli siperyer ki tou lezot dimoun ti konsider Pyer ek Zan konman “bann zonm [ki] ti napa bokou ledikasyon” e konman “bann zonm ordiner.” Zot ti krwar ki Pyer ek Zan ti napa drwa pour ansenny dan tanp. Pyer ek Zan pa ti’n al etidye dan okenn lekol relizye ki ti popiler. Me kantmenm sa, vi ki zot ti pe koz fran e avek lasirans, bann dimoun kot lakour ti etonnen. Akoz Pyer ek Zan ti kapab koz byen koumsa? En rezon i akoz zot “ti bann disip Zezi.” (Akt 4:13) Zot Met ti ansenny zot sa ki ti sorti kot Bondye me pa parey bann profeser lalwa ti fer.​—Mat. 7:28, 29.

¹¹ Lakour ti donn lord bann zapot pour aret prese. Sa lakour ti annan en kantite lotorite lo bann Zwif. Zis detrwa semenn avan, ler Zezi ti vin devan sa lakour, zot ti dir ki Zezi i “merit lanmor.” (Mat. 26:59-66) Me kantmenm sa, Pyer ek Zan pa ti per. Zot ti debout devan sa bann zonm ki ti ris, ki ti annan bon ledikasyon e ki ti annan lotorite. San lafreyer me avek respe zot ti dir: “Si zot krwar ki i byen devan Bondye pour ekout zot plito ki Bondye, zize zot menm. Me nou, nou pa kapab aret koz lo keksoz ki nou’n vwar e tande.”​—Akt 4:19, 20.

12. Kwa ki kapab ed nou pour ganny plis kouraz e pour pli konfidan?

¹² Eski ou kapab demontre sa menm kouraz? Ki mannyer ou santi ler ou ganny sa loportinite pour pres sa bon nouvel avek bann dimoun ki ris, bann ki annan bon ledikasyon oubyen bann ki annan lotorite dan ou kominote? Ki ou pou fer si ou fanmir, kanmarad lekol oubyen koleg travay i sikann ou akoz ou krwayans? Eski ou per? Si wi, ou kapab sirmont sa lafreyer. Ler Zezi ti lo later, i ti ansenny son bann zapot ki mannyer pour defann zot krwayans avek konfidans ek respe. (Mat. 10:11-18) Apre ki Zezi ti’n resisite, i ti promet son bann disip ki i ti pou avek zot “tou le zour ziska lafen sa lemonn.” (Mat. 28:20) Anba gidans Zezi, “lesklav fidel e pridan” i ansenny nou ki mannyer pour defann nou krwayans. (Mat. 24:45-47; 1 Pyer 3:15) Sa i ganny fer atraver bann lenstriksyon ki nou gannyen dan bann renyon parey dan Nou minister ek lavi Kretyen e atraver bann piblikasyon ki baze lo Labib parey bann lartik lo jw.org “Larepons sorti dan Labib.” Eski ou pe al sa bann renyon? Eski ou pe servi byen sa bann piblikasyon? Si ou pe fer sa, ou pou ganny plis kouraz e ou pou pli konfidan. Parey bann zapot, ou pa pou les nanryen anpes ou koz lo bann laverite merveye ki ou’n aprann dan Labib.

“Zot ti priy Bondye” (Akt 4:23-31)

13, 14. Si lezot i opoz nou, ki nou devret fer e akoz?

¹³ Deswit apre ki zot ti’n ganny large, Pyer ek Zan ti zwenn avek lezot frer ek ser dan kongregasyon. “Zot ti priy Bondye” pour zot ganny kouraz pour kontinyen anons sa bon nouvel. (Akt 4:24) Pyer ti konn tre byen ki i bet pour en dimoun depan lo son prop lafors pour li fer lavolonte Bondye. Zis detrwa semenn avan, i ti’n dir Zezi avek konfidans: “Kantmenm tou lezot pou abandonn ou, mwan mon pa pou zanmen abandonn ou!” Me parey Zezi ti’n predir, deswit Pyer ti konmans per sa ki dimoun ti pou dir e i ti dir ki i pa ti konn Zezi, ki ti son zanmi ek son ansenyan. Par kont, Pyer ti aprann son leson.​—Mat. 26:33, 34, 69-75.

¹⁴ I vre ki ou bezwen determinen pour fer sa travay ki ou’n gannyen konman en temwen Kris, me i annan lezot keksoz ki ou bezwen fer. Ler bann dimoun ki opoz ou i esey afebli ou lafwa oubyen esey anpes ou pres sa bon nouvel, ou devret swiv legzanp Pyer ek Zan. Priy Zeova pour ou ganny lafors. Rod led avek bann frer ek ser dan kongregasyon. Dir bann ansyen ek lezot frer ek ser matir bann problenm ki ou pe gannyen. Ler lezot i fer lapriyer pour ou, sa i kapab donn ou lafors.​—Efe. 6:18; Zak 5:16.

15. Akoz bann ki’n aret anons sa bon nouvel pour en pe letan pa devret dekouraze?

¹⁵ Si ou’n aret anons sa bon nouvel pour en pe letan akoz lezot dimoun ti met presyon lo ou, pa bezwen dekouraze. Rapel ki apre ki Zezi ti’n mor, tou son bann zapot ti aret anons sa bon nouvel pour en pe letan me apre zot ti rekonmanse. (Mat. 26:56; 28:10, 16-20) Olye les bann fot ki ou’n fer dan lepase dekouraz ou, eski ou kapab tir leson dan sa ki’n arive e servi sa pour ankouraz lezot?

16, 17. Ki nou kapab aprann avek sa lapriyer ki bann disip Zezi ti fer Zerizalenm?

¹⁶ Ki nou devret priy lo la ler bann ki annan lotorite i opoz nou? Remarke ki bann disip pa ti demande pour zot pa ganny bann problenm. Zot ti rapel byen ler Zezi ti dir: “Si dimoun in persekit mwan, zot pou persekit zot osi.” (Zan 15:20) Plito, sa bann disip ki ti fidel ti demann Zeova pour “ekout” bann menas bann dimoun ki ti pe opoz zot. (Akt 4:29) Bann disip ti vwar pli lwen ki sa bann problenm e zot ti rekonnet ki sa bann persekisyon ki zot ti pe gannyen ti pe akonpli en profesi. Parey Zezi ti ansenny zot lo ki mannyer pour priye, zot ti konnen ki lavolonte Bondye pou “ganny fer lo later,” malgre nenport keksoz ki bann dirizan i kapab dir.​—Mat. 6:9, 10.

¹⁷ Bann disip ti priy Zeova pour zot kapab fer son lavolonte e zot ti dir: “Ed ou bann lesklav pour kontinyen anons ou parol avek lardyes.” Ki mannyer Zeova ti reponn zot lapriyer? “Sa landrwa kot zot ti’n rasanble ti sekwe e zot tou zot ti ranpli avek lespri sen e zot ti anons parol Bondye avek lardyes.” (Akt 4:29-31) Napa nanryen ki kapab anpes lavolonte Bondye ganny akonplir. (Iza. 55:11) Menm ler i annan en kantite problenm oubyen menm si bann dimoun ki opoz nou i annan en kantite lotorite, si nou priy Bondye, nou kapab asire ki i pou donn nou lafors pour nou kontinyen anons Son parol avek lardyes.

Rann kont, pa “avek zonm, me avek Bondye” (Akt 4:32–5:11)

18. Ki bann frer ek ser dan sa kongregasyon Zerizalenm ti fer pour kanmarad?

¹⁸ Sa kongregasyon ki ti’n fek ganny formen Zerizalenm ti agrandi vitman e i ti annan plis ki 5,000 disip.d Menm si sa bann disip ti sorti dan diferan landrwa, zot “ti ini ansanm.” Zot ti ini dan menm fason panse ek lopinyon. (Akt 4:32; 1 Kor. 1:10) Bann disip ti fer plis ki zis priy Zeova pour beni zot bann zefor. Zot ti ranforsi lafwa kanmarad e zot ti donn kanmarad bann keksoz ki zot ti bezwen ler i ti neseser. (1 Zan 3:16-18) Par egzanp, en disip ki ti apel Zozef, ki bann zapot ti apel li Barnabas, ti vann son later. I ti donn tou sa larzan pour ed bann ki ti sorti dan bann pei ki lwen e ki ti pe reste en pe plis letan Zerizalenm pour zot kapab aprann plis konsernan sa bon nouvel.

19. Akoz Zeova ti touy Ananyas ek Safira?

¹⁹ En zonm ki apel Ananyas ek son madanm Safira ti osi vann en bout later e zot ti fer en kontribisyon. Zot ti fer krwar ki zot ti pe donn tou sa larzan me zot “ti gard an sekre en pe larzan sa lavant.” (Akt 5:2) Zeova ti touy zot, pa akoz sa larzan pa ti ase me akoz zot ti annan en move lentansyon e zot ti triker. Zot “pa’n koz manti avek zonm, me avek Bondye.” (Akt 5:4) Parey sa bann ipokrit ki Zezi ti koz lo la, Ananyas ek Safira ti pli enterese pour rod laglwar avek zonm ki ganny laprouvasyon Bondye.​—Mat. 6:1-3.

20. Ki leson nou aprann konsernan ler nou donn Zeova en keksoz?

²⁰ Ozordi, plizyer milyon Temwen Zeova pe donn bann kontribisyon volonter pour siport sa travay predikasyon ki pe ganny fer partou dan lemonn, zis parey sa bann disip fidel ti fer Zerizalenm dan premye syek. Personn pa ganny forse pour servi son letan oubyen donn larzan pour siport sa travay. Byensir, Zeova pa anvi ki nou servi li kontreker oubyen akoz nou oblize. (2 Kor. 9:7) Nou devret rapel ki Zeova pa get lakantite larzan ki nou donnen me plito nou lentansyon. (Mark 12:41-44) Nou pa devret fer parey Ananyas ek Safira, pour servi Zeova pour bann rezon egois oubyen pour rod laglwar. O kontrer, parey Pyer, Zan ek Barnabas, nou devret toultan servi Zeova akoz nou kontan Zeova ek nou prosen.​—Mat. 22:37-40.