Bann bon lerwa ek bann move lerwa

ZIS parey Zeova ti predir, Izrael ti ganny divize apre ki Salomon ti abandonn vre ladorasyon. Reabam, son garson ek sikseser, ti vreman sever. Alor, dis parmi bann tribi Izrael ti revolte e form en rwayonm dan nor Izrael. De tribi ti reste fidel avek desandans lerwa David ki ti o pouvwar Zerizalenm e zot ti form rwayonm Zida dan sid.

Tou le de rwayonm pa ti stab e zot ti annan bokou problenm akoz zot bann lerwa ti napa lafwa e zot ti dezobeisan. Izrael ti annan plis difikilte ki Zida akoz son bann lerwa ti promot fo ladorasyon depi o konmansman. Malgre mirak ki profet Eliya ek Elisa ti fer, parey resisit dimoun mor, bann Izraelit ti kontinyen swiv sa move semen. Finalman, Bondye ti les bann Asiryen detrir rwayonm nor.

Zida ti reste pour ankor en syek an plis ki Izrael, me li osi i ti sibir pinisyon sorti kot Bondye. Zis en ptigin lerwa Zida ki ti ekout lavertisman bann profet Bondye e esey gid lepep ver Zeova. Par egzanp, Lerwa Yosiya ti konmans retir fo ladorasyon Zida e repar tanp Zeova. Kan en kopi orizinal lo lalwa Bondye ki ti ganny donnen avek Moiz ti ganny dekouver, Yosiya ti vreman touse alor i ti entansifye son kanpanny pour reetablir vre ladorasyon.

Me, malerezman sa bann ki ti siksed Yosiya pa ti swiv son bon legzanp. Sa ti fer alor ki Zeova ti les bann Babilonnyen konkerir Zida e detrir Zerizalenm ek son tanp. Bann sirvivan ti ganny anmennen an egzil Babilonn. Bondye ti predir ki zot ti pou reste an egzil pour 70 lannen. Zida ti reste abandonnen pour tou sa letan, ziska ki bann Izraelit ti ganny sa sans pour retourn Zerizalenm, zis parey ti’n ganny promet.

Parkont, napa lezot lerwa ki ti sorti dan laliny desandans David ki ti pou dirize ziska dominasyon sa Sover oubyen Mesi ki ti’n ganny predir. Laplipar parmi sa bann lerwa ki ti asiz lo tronn David Zerizalenm ti prouve ki bann imen enparfe pa kalifye pour dirize. Zis Mesi ki ti pou vreman kalifye. Alor, Zeova ti dir sa avek sa dernyen lerwa dan laliny desandans David: “Tir sa tirban ek sa kouronn. . . . Sa osi pa pou vin pour personn ziska sa enn ki annan drwa legal i vini, e mon a donn avek li.”—Ezekyel 21:26, 27.

—Baze lo 1 ek 2 Lerwa; 2 Kronik sapit 10 a 36; Zeremi 25:8-11.