Mesi i vin lo later

ESKI Zeova ti pou ed bann dimoun pour idantifye sa Mesi ki ti’n ganny promet? Wi. Get sa ki Bondye ti fer. Kat syek ti’n pase apre ki Lekritir Ebre ti’n fini konplete. Dan en lavil dan rezyon nor Galile ki ti apel Nazaret, Mari, en zenn fiy, ti ganny en vizit ekstraordiner. Lanz Gabriyel ti aparet avek li e dir li ki Bondye ti pou servi son lafors pwisan, setadir son lespri sen pour fer li donn nesans en garson menm si i ti ankor en vyerz. Sa garson ti pou vin sa Lerwa ki ti’n ganny promet depi lontan, sa enn ki ti pou rennyen pour touzour! Sa zanfan ti pou Garson Bondye menm. Bondye ti pou transfer son lavi sorti dan lesyel dan vant Mari.

Avek limilite Mari ti aksepte sa privilez enportan. Zozef, son fiyanse ki ti en sarpantye ti marye avek li apre ki Bondye ti’n anvoy enn son lanz kot li pour rasir li konsernan lansentman Mari. Me pa i ti annan en profesi ki ti dir ki Mesi ti pou ne Betleenm? (Mika 5:2) Sa pti lavil ti apepre 140 kilomet pli lwen!

En dirizan Romen ti donn lord ki en resansman i devret ganny fer. Bann dimoun ti devret al anrezistre dan zot pei natal. Tou le de, Mari ek Zozef ti sorti Betleenm, alor Zozef ti pran son madanm ansent e anmenn li laba. (Lik 2:3) Mari ti donn nesans dan en park bef e i ti met sa pti baba dan en loz. Apre sa Bondye ti anvoy en kantite lanz dir en group berze ki ti lo montanny ki sa zanfan ki ti fek ne ti sa Mesi ouswa Kris ki ti’n ganny promet.

Pli tar, lezot osi ti konfirmen ki Zezi ti sa Mesi ki ti’n ganny promet. Profet Izai ti’n profetize ki en zonm ti pou prepar semen pour travay enportan ki Mesi ti annan. (Izai 40:3) Sa zonm ti Zan Batis. Kan i ti vwar Zezi, i ti kriye: “La Lanyo Bondye ki efas pese lemonn.” Deswit serten disip Zan ti swiv Zezi. Enn parmi zot ti dir: “Nou’n trouv Mesi.”—Zan 1:29, 36, 41.

I ti annan ankor lezot konfirmasyon. Kan Zan ti batiz Zezi, Zeova li menm ti koze dan lesyel. Atraver son lespri sen, i ti apwent Zezi konman sa Mesi e dir: “Sa mon Garson byenneme, ki donn mwan bokou lazwa.” (Matye 3:16, 17) Sa Mesi ki ti’n ganny promet depi lontan ti’n arive!

Kan ki sa ti arive? Lannen 29 N.L., egzakteman alafen sa 483-z-an ki Danyel ti’n predir. Wi, sa ti form parti en levidans konvenkan ki Zezi i Mesi ouswa Kris. Me ki mesaz i ti pou anonse pandan ki i ti pou lo later?

—Baze lo Matye sapit 1 a 3; Mark sapit 1; Lik sapit 2; Zan sapit 1.