SEKSYON 25
Konsey lo lafwa, kondwit ek lanmour
Zak, Pyer, Zan ek Zid i ekrir let pour ankouraz lezot Kretyen
ZAK ek Zid ti demi frer Zezi. Pyer ek Zan ti parmi sa 12 zapot Zezi. An tou, sa kat zonm in ekrir set let ki ganny trouve dan Lekritir Grek Kretyen. Sak let i port non son ekriven. Bann konsey enspire ki ganny trouve dan sa bann let ti annan pour bi ed bann Kretyen gard zot lentegrite anver Zeova ek son Rwayonm.
Demontre lafwa. I pa ase zis pour dir ki nou annan lafwa. Vre lafwa i ganny demontre par aksyon. Zak ti ekrir: “Lafwa san bann laksyon i mor.” (Zak 2:26) En Kretyen i kapab devlop landirans si i azir avek lafwa kan i rankontre bann leprev. Pour reisi, i pou bezwen demann Bondye lasazes e reste konvenki ki Bondye pou donn li. Landirans i fer en dimoun ganny laprouvasyon Bondye. (Zak 1:2-6, 12) Si en adorater Bondye i gard son lentegrite akoz i annan lafwa, Bondye pou azir. Zak i dir: “Apros avek Bondye, e i ava apros avek [ou].”—Zak 4:8.
Lafwa en Kretyen i devret ase for pour ed li reziste tantasyon ek bann lenfliyans imoral. Zid ti viv dan en lanvironnman kot degradasyon moral ti partou kote e sa ti pous li pour ankouraz lezot Kretyen pour “lite . . . pour lafwa.”—Zid 3.
Gard en bon kondwit. Zeova i ekspekte ki son bann adorater i sen, setadir ki zot pir dan tou laspe. Pyer ti ekrir: “Vin sen dan tou zot kondwit. Annefe, Lekritir i dir, ‘Vin sen parey mwan [Zeova] mon sen.’” (1 Pyer 1:15, 16) Bann Kretyen i annan en legzanp ki vreman byen pour imite. Pyer ti dir: “Kris limenm in soufer pour zot, an lesan pour zot en legzanp pour zot swiv.” (1 Pyer 2:21) Menm si bann Kretyen i kapab soufer akoz zot viv an armoni avek standar Bondye, zot “gard en bon konsyans.” (1 Pyer 3:16, 17) Pyer ti enplor bann Kretyen pour touzour anmenn en lavi sen e fer bann keksoz ki reflekte devosyon pour Bondye anmezir ki zot esper son zour zizman ek sa promes konsernan en nouvo lemonn kot “pou annan lazistis.”—2 Pyer 3:11-13.
“Apros avek Bondye, e i ava apros avek [ou].” —Zak 4:8.
Demontre lanmour. Zan i ekrir: “Bondye i lanmour.” Sa zapot i montre ki Bondye ti demontre son gran lanmour par anvoy son garson Zezi konman en sakrifis oubyen “viktim pour ki par li nou ganny pardon nou bann pese.” Ki mannyer bann Kretyen i devret reazir? Zan i eksplike: “Byenneme, si Bondye in kontan nou avek en tel lanmour, nou osi nou bezwen kontan kanmarad.” (1 Zan 4:8-11) En fason pour demontre sa kalite lanmour i kan nou demontre lospitalite anver lezot frer ek ser Kretyen.—3 Zan 5-8.
Me ki mannyer bann adorater Zeova i kapab prouv zot lanmour pour li? Zan i donn larepons: “La lanmour Bondye: ki nou obei son konmannman; e son bann konmannman i pa en fardo.” (1 Zan 5:3; 2 Zan 6) Bann ki obeir Bondye dan sa fason i kapab asire ki Bondye pou kontinyen kontan zot an atandan “lavi eternel.”—Zid 21.