PARTI 3

Ki mannyer lavi ti ete dan Paradi?

Zeova ti donn Adan ek Ev en kantite bon keksoz. Zenez 1:28

Apre ki Zeova ti kre Ev, i ti anmenn li kot Adan

Zeova ti fer Ev, sa premye madanm e anmenn li kot Adan pour li vin son madanm.—Zenez 2:21, 22.

Zeova ti kree zot avek en lekor ek lespri parfe, san okenn defo.

Adan ek Ev pe get zot Paradi kot zot reste

Zot ti reste dan zarden Edenn, en zoli landrwa kot i ti annan en larivyer, pye fri ek zannimo.

Zeova ti koz avek zot e ansenny zot. Si zot ti ekout li, zot ti pou viv pour touzour dan Paradi lo later.

Bondye ti dir pa manz fri dan enn sa pye fri. Zenez 2:16, 17

Sa pye dibwa dan zarden ki Zeova ti’n dir Adan ek Ev pa manz son fri

Zeova ti montre Adan ek Ev en pye fri dan zarden e i ti dir zot ki si zot manz sa fri ki lo la, zot ti pou mor.

Sa move lanz ki apel Satan Dyab ti servi en serpan pour koz avek Ev

En lanz ti rebel kont Bondye. Sa move lanz i Satan oubyen Dyab.

Satan pa ti anvi ki Adan ek Ev i obeir Zeova. Alor, i ti servi en serpan pour koz avek Ev e dir li ki si i manz sa fri dan sa pye dibwa, i pa ti pou mor, me i ti pou vin parey Bondye. Sirman sa ti en mansonz.—Zenez 3:1-5.