Eski par ler ou santi ou tousel e ou per?

Get sa pti garson lo sa portre. I paret ki i tousel e i per, non? Eski ou’n deza santi koumsa ou?— Tou dimoun i santi koumsa par ler. Labib i koz lo bann zanmi Zeova ki ti santi zot tousel e per. Eliya ti enn parmi zot. Annou koz lo li.

Eliya ti reste Izrael en bann letan pase, avan ki Zezi ti ne. Aab, lerwa Izrael pa ti pe ador Zeova sa vre Bondye. Aab ek son madanm Zezabel ti pe ador Baal, en fo bondye. Alor, laplipar dimoun Izrael osi ti konmans ador Baal. Larenn Zezabel ti pa bon e i ti anvi touy tou bann dimoun ki ti ador Zeova. I ti anvi touy Eliya tou. Eski ou konnen ki Eliya ti fer?—

Eliya ti sove. I ti al dan dezer e kasyet dan en kavern ros. Akoz i ti fer sa?— Wi, akoz i ti per. Me, Eliya pa ti devret per. Akoz? Parski i ti konnen Zeova ti kapab ed li. Zeova ti’n montre Eliya ki i ti vreman for avan sa. En fwa, Zeova ti reponn lapriyer Eliya par fer dife desann sorti dan lesyel. Alor, sirman Zeova ti pou’n kapab ed Eliya la osi!

Laba dan sa kavern ros, Zeova ti koz avek li e demann li: ‘Ki ou pe fer la?’ Eliya ti reponn: ‘Zis mwan tousel ki ankor pe ador ou. Mwan mon tousel e mon per ki mon pou ganny touye.’ Eliya ti krwar ki tou lezot adorater Zeova ti’n ganny touye. Me Zeova ti dir Eliya: ‘Non, pa vre sa. I annan 7,000 lezot dimoun osi ki ankor pe ador mwan. Fodre ou brav. Mon annan ankor travay pour donn ou!’ Eski Eliya ti kontan pour tann sa?—

Ki ou kapab aprann avek sa ki ti ariv Eliya?— Ou pa devret zanmen santi ou tousel e per. Ou annan bann zanmi ki kontan Zeova e ki kontan ou. Deplis, Zeova i vreman for e i pou touzour ed ou! Eski ou kontan pour konnen ki ou pa zanmen tousel?—