Zeremi pa ti aret koz lo Zeova

Par ler dimoun i sikann nou ouswa ankoler avek nou kan nou koz avek zot lo Zeova. Sa i kapab fer nou anvi aret koz lo Bondye. Eski ou’n deza santi koumsa?— Labib i koz lo en zenn onm ki ti kontan Zeova me ki ti pros pour aret koz lo li. I ti apel Zeremi. Annou koz plis lo li.

Kan Zeremi ti en zenn onm, Zeova ti dir li al dir son pep aret fer sa ki mal. I ti difisil pour Zeremi fer sa e i ti per. I ti dir Zeova: ‘Mon pa konnen ki pour dir. Mon tro zenn.’ Me, Zeova ti dir: ‘Pa bezwen per. Mon pou ed ou.’

Alor, Zeremi ti konmans dir son pep ki zot pou ganny pini si zot pa sanze. Eski sa pep ti fer sa ki Zeremi ti dir?— Non. Zot ti sikann li ouswa ankoler avek li. Serten ti menm anvi touy li! Ki mannyer Zeremi ti santi li?— I ti per e i ti dir: ‘Mon pa pou koz ankor lo Zeova.’ Me eski vreman i ti arete?— Non, i pa ti arete. I ti telman kontan Zeova ki i pa ti kapab aret koz lo li. Vi ki Zeremi pa ti aret koz lo li, Zeova ti protez li.

Par egzanp, en fwa, bann zonm vreman pa bon ti zet Zeremi dan en gran trou ranpli avek labou. I ti napa ni delo pour bwar, ni manze pour manze. Sa bann zonm ti anvi kit Zeremi laba pour li mor. Me i ti reisi sove avek led Zeova!

Ki nou kapab aprann avek legzanp Zeremi?— Menm si i ti per par ler, i pa ti aret koz lo Zeova. Kan ou koz lo Zeova, dimoun i kapab sikann ou oubyen ankoler avek ou. Petet ou kapab santi ou kanmi ouswa per. Me, pa zanmen aret koz lo Zeova. I pou touzour ed ou parey i ti fer pour Zeremi.