SEKSYON 9
Ador Zeova an fanmir
“Ador sa enn ki’n fer lesyel, [ek] later.”—Revelasyon 14:7
Parey ou’n aprann dan sa brosir, dan Labib i annan bokou prensip ki pou ed ou ek ou fanmir. Zeova i anvi ou zwaye. I promet ki si ou met son ladorasyon premye, ‘i a donn ou an plis tou lezot keksoz osi.’ (Matye 6:33) I vreman anvi ou vin son zanmi. Servi byen tou loportinite ki ou annan pour devlop ou lanmitye avek Bondye. Sa i pli gran privilez ki en dimoun i kapab annan.—Matye 22:37, 38.
1 RANFORSI OU RELASYON AVEK ZEOVA
KI LABIB I DIR: Zeova i dir, “Mon a vin en papa pour zot e zot a vin mon bann garson ek mon bann fiy.” (2 Korentyen 6:18) Bondye i anvi ou vin son zanmi pros. Lapriyer i en fason pour fer sa. Zeova i envit ou pour “priye tou letan.” (1 Tesalonisyen 5:17) I vreman anvi tann sa ki ou pe panse e sa ki pe fatig ou. (Filipyen 4:6) Kan ou priy ansanm avek ou fanmir, zot pou vwar ki kantite reel Zeova i ete pour ou.
Apard ki koz avek Bondye, ou bezwen ekout li. Ou kapab fer sa par etidye son Parol ek bann piblikasyon baze lo Labib. (Psonm 1:1, 2) Reflesir lo sa ki ou aprann. (Psonm 77:11, 12) Ekout Bondye i osi enkli asiste bann renyon Kretyen regilyerman.—Psonm 122:1-4.
Koz avek lezot lo Zeova i en lot fason enportan ki ou kapab ranforsi ou relasyon avek li. Pli ou fer sa, pli ou pou santi ou pli pros avek li.—Matye 28:19, 20.
KI OU KAPAB FER:
Met letan dekote tou le zour pour lir Labib e priye
Konman en fanmir, donn priyorite bann keksoz spirityel olye detant ek divertisman
2 PRAN PLEZIR DAN OU LADORASYON FANMIR
KI LABIB I DIR: “Apros avek Bondye, e i ava apros avek zot.” (Zak 4:8) Ou bezwen fer en progranm regilye pour Ladorasyon Fanmir e swiv li. (Zenez 18:19) Me ou bezwen fer plis ki sa. Bondye i devret form parti ou lavi tou le zour. Ranforsi relasyon ou fanmir avek Bondye par koz avek zot “ler ou pe asize dan ou lakaz, ler ou pe marse lo semen, ler ou pe alonze e ler ou leve.” (Deterononm 6:6, 7) Fer li ou lobzektif pour vin parey Zozye, ki ti dir: “Mwan ek mon fanmir, nou pou servi Zeova.”—Zozye 24:15.
KI OU KAPAB FER:
Fer en progranm konsistan ki pran konsiderasyon bezwen sak manm ou fanmir