Sa bon fason pour ador Bondye

1. Lekel ki kapab dir nou konman nou devret ador Bondye?

LAPLIPAR larelizyon i dir ki zot ansenny laverite lo Bondye. Me sa pa posib, parski sak larelizyon i ansenny bann keksoz vreman diferan lo Bondye e lo konman nou devret ador li. Alor ki mannyer nou kapab konn sa bon fason pour ador Bondye? Zis Zeova ki kapab dir nou konman nou devret ador li.

2. Ki mannyer ou kapab konn sa bon fason pour ador Bondye?

² Zeova in donn nou Labib pour ki nou konn sa bon fason pour ador li. Alor etidye Labib. Zeova i kontan ou e i pou ed ou benefisye avek son lansennyman.​—Izai 48:17.

3. Ki Bondye i oule nou fer?

³ Serten dimoun i dir ki Bondye i aksepte tou larelizyon, me pa sa ki Zezi ti dir. Zezi ti dir: “Pa tou dimoun ki dir mwan, ‘Senyer, Senyer,’ ki pou antre dan Rwayonm lesyel, me zis sa enn ki pe fer lavolonte mon Papa.” Alor nou bezwen aprann kisisa lavolonte Bondye e apre fer li. Sa i serye parski Zezi ti konpar bann dimoun ki pa obei Bondye avek bann kriminel, setadir bann “ki fer lemal!”​—Matye 7:21-23.

4. Ki Zezi ti dir konsernan lavolonte Bondye?

⁴ Zezi ti dir ki i pa pou fasil pour fer lavolonte Bondye. I ti dir: “Pas par pti baro, parski sa gran baro e sa semen ki fasil i anmenn ver destriksyon e bokou pe pas par la, tandis ki sa pti baro e sa semen ki difisil i anmenn ver lavi, me pa bokou ki pe trouv li.” (Matye 7:13, 14) Sa semen ki difisil, andotmo sa bon fason pour ador Bondye i anmenn ver lavi eternel. Sa semen ki fasil, andotmo sa move fason pour ador Bondye i anmenn ver lanmor. Me Zeova pa oule ki personn i mor. I donn tou dimoun sa loportinite pour aprann konn li.​—2 Pyer 3:9.

SA BON FASON POUR ADOR BONDYE

5. Ki mannyer ou kapab rekonnet bann ki ador Bondye dan sa bon fason?

⁵ Zezi ti dir ki i posib pour konnen lekel ki pe ador Bondye dan sa bon fason. Nou kapab fer sa par egzamin sa ki zot krwar e fer. Zezi ti dir: “Zot pou rekonnet sa bann dimoun par zot fri.” I ti osi dir: “Tou bon pye fri i raport bon fri.” (Matye 7:16, 17) Sa pa vedir ki bann ki ador Bondye i parfe. Me bann serviter Bondye i toultan esey fer sa ki byen. Aprezan annou vwar kwa ki pou ed nou rekonnet bann ki ador Bondye dan sa bon fason.

6, 7. Akoz vre ladorasyon i baze lo Labib? Ki nou aprann avek legzanp Zezi?

⁶ Nou ladorasyon i devret baze lo Labib. Labib i dir: “Tou Lekritir i enspire par Bondye e itil pour ansennyen, pour reprimande, pour remet keksoz drwat, pour disiplinen dapre ladrwatir Bondye, pour ki en serviter Bondye i byen konpetan e byen ekipe pour fer bann bon keksoz.” (2 Timote 3:16, 17) Zapot Pol ti ekri bann Kretyen: “Ler nou ti anons parol Bondye avek zot, zot ti aksepte li konman parol Bondye parey i vreman ete, non pa konman parol zonm.” (1 Tesalonisyen 2:13) Vre ladorasyon i baze selman lo Parol Bondye, Labib. I pa baze lo pwennvi imen, ni lo bann tradisyon ouswa lo okenn lezot keksoz.

⁷ Tou sa ki Zezi ti ansennyen ti baze lo Parol Bondye. (Lir Zan 17:17.) I ti souvan sit Labib. (Matye 4:4, 7, 10) Bann vre serviter Bondye i swiv legzanp Zezi e baz tou zot lansennyman lo Labib.

8. Ki Zezi ti dir konsernan ador Zeova?

⁸ Nou devret ador zis Zeova. Psonm 83:18 (NWT) i dir: “Dimoun i devret konnen ki ou, ki apel Zeova, zis ou tousel ki Tre O lo later antye.” Zezi ti anvi ki dimoun i konnen lekel sa vre Bondye e i ti fer zot konn son non. (Lir Zan 17:6.) Zezi ti dir: “Se Zeova ou Bondye ki ou devret adore e zis li tousel ki ou devret servi.” (Matye 4:10) Alor, konman bann serviter Bondye, nou swiv legzanp Zezi. Nou ador zis Zeova, nou servi e fer lezot konn son non e nou ansenny lezot sa ki Bondye pou fer pour nou.

9, 10. Ki mannyer nou montre ki nou kontan kanmarad?

⁹ Nou devret kontan lezot senserman. Zezi ti demann son bann disip pour kontan kanmarad. (Lir Zan 13:35.) Nou devret kontan kanmarad, nenport ki landrwa kot nou sorti, nou kiltir ouswa si nou ris oubyen pov. Nou lanmour i devret fer nou ini konman frer ek ser. (Kolosyen 3:14) Alor nou pa al lager e touy dimoun. Labib i dir: “Sa ki pa kontinyen fer sa ki drwat pa sorti kot Bondye e ni sa enn ki pa kontan son frer.” Labib i osi dir: “Nou devret kontan kanmarad. Nou pa devret parey Kaen ki ti zanfan Dyab e ki ti touy son frer.”​—1 Zan 3:10-12; 4:20, 21.

¹⁰ Nou servi nou letan, lenerzi ek bann keksoz materyel pour ed e ankouraz kanmarad. (Ebre 10:24, 25) Nou “fer sa ki byen anver tou dimoun.”​—Galat 6:10.

11. Akoz nou bezwen aksepte ki se gras a Zezi ki nou kapab ganny sove?

¹¹ Nou bezwen obei Zezi parski se gras a li ki nou kapab ganny sove. Labib i dir: “Napa en lot dimoun ki kapab sov nou, parski Bondye pa’n donn pouvwar personn ankor lo later pour sov nou apard ki li.” (Akt 4:12) Dan Sapit 5, nou ti aprann ki Zeova ti anvoy Zezi pour donn son lavi konman en ranson pour bann imen obeisan. (Matye 20:28) Zeova in swazir Zezi pour ki i vin sa Lerwa ki pou diriz later. Se pour sa ki Labib i dir nou ki nou bezwen obei Zezi si nou oule viv pour touzour.​—Lir Zan 3:36.

12. Akoz nou pa mel dan bann zafer politik?

¹² Nou pa devret mel dan bann zafer politik. Zezi pa ti partisip dan politik. Ler i ti pe ganny zize, i ti dir Pilat en dirizan Romen: “Mon Rwayonm pa form parti sa lemonn.” (Lir Zan 18:36.) Parey Zezi, nou fidelman siport Rwayonm Bondye ki dan lesyel e i pour sa rezon ki nenport ki landrwa kot nou reste, nou pa mel dan bann zafer politik. Kantmenm sa, Labib i demann nou pour obei “bann lotorite,” setadir bann gouvernman. (Romen 13:1) Nou obei lalwa sa pei kot nou reste. Me byensir ler en lalwa i demann nou pour fer en keksoz ki kont lalwa Bondye, nou imit bann zapot ki ti dir: “Nou devret obei Bondye plito ki zonm.”​—Akt 5:29; Mark 12:17.

13. Ki nou anonse konsernan Rwayonm Bondye?

¹³ Nou krwar ki zis Rwayonm Bondye ki pou rezourd nou bann problenm. Zezi ti dir ki sa “bon nouvel Rwayonm” ti pou ganny anonse partou lo later. (Lir Matye 24:14.) Napa okenn gouvernman imen ki kapab fer sa ki Rwayonm Bondye pou fer pour nou. (Psonm 146:3) Zezi ti montre nou konman pour priy pour Rwayonm Bondye ler i ti dir: “Ki ou Rwayonm i vini. Ki ou lavolonte i ganny fer lo later parey dan lesyel.” (Matye 6:10) Labib i dir nou ki Rwayonm Bondye pou detri tou bann gouvernman imen e ki zis li ki “pou reste pour touzour.”​—Danyel 2:44.

14. Dapre ou, lekel ki ador Bondye dan sa bon fason?

¹⁴ Apre ki ou’n etidye sa bann pwen, demann ou lekor: ‘Lekel ki baz zot lansennyman lo Labib? Lekel ki fer lezot konn non Bondye? Lekel ki kontan lezot senserman e ki krwar ki Bondye ti anvoy Zezi pour sov nou? Lekel ki pa mel dan bann zafer politik? Lekel ki anonse ki zis Rwayonm Bondye ki kapab rezourd nou bann problenm?’ I selman Temwen Zeova.​—Izai 43:10-12.

KI OU POU FER?

15. Ki nou bezwen fer si nou anvi ki Bondye i aksepte nou ladorasyon?

¹⁵ I pa ase pour zis krwar ki Bondye i egziste. Menm bann demon i krwar ki Bondye i egziste, me zot pa obei li. (Zak 2:19) Si nou anvi ki Bondye i aksepte nou ladorasyon, nou bezwen fer plis ki zis krwar ki i egziste, nou bezwen osi fer sa ki i dir.

16. Akoz nou devret rezet fo larelizyon?

¹⁶ Si nou anvi ki Bondye i aksepte nou ladorasyon, nou bezwen rezet fo larelizyon. Profet Izai ti ekri: “Sorti parmi zot! . . . Pirifye zot!” (Izai 52:11; 2 Korentyen 6:17) Sanmenm sa nou bezwen rezet tou keksoz ki i annan pour fer avek fo ladorasyon.

17, 18. Ki “Gran Babilonn” i reprezante? Akoz i sitan irzan pour sorti dan fo larelizyon?

¹⁷ Kisisa fo larelizyon? I nenport larelizyon ki ansenny dimoun pour ador Bondye dan en fason ki pa annakor avek son Parol. Labib i apel tou sa bann fo larelizyon “Gran Babilonn.” (Revelasyon 17:5) Akoz? Apre Deliz dan letan Noe, bokou fo krwayans relizye ti konmans ganny ansennyen dan lavil Babilonn. Sa bann fo lansennyman in propaz partou lo later. Par egzanp, bann dimoun ki ti pe viv Babilonn ti ador trwa bondye ansanm. Ozordi osi, bokou larelizyon i krwar dan Trinite, zot dir ki Bondye i en Bondye an trwa personn. Me Labib i montre klerman ki i annan zis en sel vre Bondye, Zeova e ki Zezi i son Garson. (Zan 17:3) Bann dimoun ki ti viv Babilonn ti osi krwar ki i annan en keksoz dan dimoun ki kontinyen viv apre ki son lekor in mor e ki sa keksoz i kapab soufer dan lanfer. Sa pa vre.​—Vwar Lezot lenformasyon nimero 14, 17 ek 18.

¹⁸ Bondye in predir ki byento tou fo larelizyon pou ganny detrir. (Revelasyon 18:8) Eski ou konpran akoz i sitan irzan ki ou sorti dan fo larelizyon? Zeova nou Bondye i anvi ki ou fer sa avan ki i tro tar.​—Revelasyon 18:4.

19. Ki mannyer Zeova pou pran swen avek ou ler ou deside servi li?

¹⁹ Ler ou deside sorti dan fo larelizyon e servi Zeova, petet serten ou bann zanmi ek fanmir pa pou konpran ou desizyon e zot menm kapab fer ou lavi difisil. Me Zeova pa pou abandonn ou. Ou pou form parti en fanmir enternasyonal kot i annan plizyer milyon dimoun ki vreman kontan kanmarad e ou pou ganny sa lespwar pour viv pour touzour dan nouvo lemonn Bondye. (Mark 10:28-30) Petet serten parmi ou bann zanmi ek fanmir ki pa kontan akoz ou’n deside servi Zeova pou anvi etidye Labib pli tar.

20. Akoz i sitan enportan pour ador Bondye dan sa bon fason?

²⁰ Tre byento, Bondye pou retir tou sa ki mal e son Rwayonm pou diriz later pour touzour. (2 Pyer 3:9, 13) Pa i pou gou pour viv dan en lemonn koumsa! Tou dimoun pou ador Zeova dan sa fason ki i oule. Alor i enportan pour pran aksyon la konmela e ador Bondye dan sa bon fason.