Bondye ti fer lesyel ek later

Zeova, nou Bondye i nou Kreater. Li ki’n fer tou keksoz, bann keksoz ki nou vwar e sa ki nou pa kapab vwar. Me avan i ti fer bann keksoz ki nou kapab vwar, i ti fer en kantite lanz. Eski ou konnen lekel bann lanz? Zeova in fer bann lanz dan lesyel e bann lanz i parey Zeova. Nou pa kapab vwar zot zis parey nou pa kapab vwar Bondye. Sa premye lanz ki Zeova ti fer ti ed li pour fer tou lezot keksoz. Sa lanz ti ed Zeova ler i ti fer bann zetwal, plannet ek tou lezot keksoz. Zeova ti osi fer later, sa zoli plannet ki nou reste lo la.

Apre sa, Zeova ti prepar later pour ki bann zannimo ek dimoun i reste lo la. I ti fer soley kler lo later. I ti osi fer bann montanny, lanmer ek larivyer.

Ki ti arive apre? Zeova ti dir: ‘Later pou prodwir zerb, bann plant ek pye dibwa.’ En kantite zoli pye fri, legim ek fler ti konmans pouse. Apre Zeova ti fer diferan zannimo. I ti fer bann zannimo ki kapab anvole, naze e marse. I ti fer bann ki ptipti parey lapen e bann ki gro parey lelefan. Ki zannimo ki ou, ou pli kontan?

Apre sa, Zeova ti dir avek sa premye lanz: “Annou fer zonm.” Bann imen i diferan avek zannimo. Zot kapab envant bann keksoz. Zot kapab koze, riye e priye. Zot ti pou pran swen avek later ek bann zannimo. Ou konnen ki mannyer sa premye zonm i apele? Annou gete.