Ana i priye pour ganny en garson

Elkana ti en Izraelit e i ti annan de madanm. Enn ti apel Ana e lot Penina. Me Elkana ti pli kontan Ana. Penina ti toultan sifok Ana parski Ana ti napa zanfan e Penina ti annan en kantite. Tou le lannen, Elkana ti anmenn son fanmir pour ador Zeova kot latant ladorasyon Silo. En zour ler zot ti laba, i ti remarke ki son madanm ki i ti byen kontan ti vreman sagren. I ti dir: ‘Silvouple pa bezwen plere Ana. Pa mon la avek ou? Mon kontan ou.’

Pli tar, Ana ti al priye li tousel. I pa ti kapab aret plere anmezir ki i ti sipliy Zeova pour ed li. I ti promet: ‘Si ou donn mwan en garson, mon pou donn ou li e i pou servi ou tou dilon son lavi.’

Granpret Eli ti vwar Ana pe plere asodlarm e i ti krwar ki Ana ti sou. Ana ti reponn li: ‘Non mon senyer, mon pa sou. Mon annan en problenm grav e mon pe koz avek Zeova lo la.’ Eli ti realize ki i ti’n mal koz avek li, alor i ti dir: ‘Ki Bondye i donn ou sa ki ou anvi.’ Apre sa, Ana ti santi li soulaze e i ti ale. Dan mwens ki enn an, Ana ti ganny en pti garson e i ti apel li Samyel. Ou kapab mazinen ki kantite Ana ti kontan?

Ana pa ti bliy promes ki i ti’n fer avek Zeova. Dek ki Samyel ti aret tete, i ti anmenn li pour servi kot latant ladorasyon. Ana ti dir Eli: ‘Sa i sa garson ki mon ti pe priy lo la. Tou son lavi, mon pou pret li avek Zeova.’ Tou le lannen, Elkana ek Ana ti vizit Samyel e anmenn en nouvo lenz pour li. Zeova ti donn Ana ankor trwa garson ek de fiy.