Premye lerwa Izrael

Zeova ti donn bann Izraelit bann ziz pour gid zot, me zot ti oule en lerwa. Zot ti dir Samyel: ‘Tou lezot nasyon otour nou i annan lerwa. Nou osi nou oule enn.’ Pour Samyel, sa ti mal, alor i ti priy Zeova lo la. Zeova ti dir: ‘Bann dimoun pa pe rezet ou. Zot pe rezet mwan. Dir zot ki zot kapab ganny en lerwa, me sa lerwa pou demann zot en kantite keksoz.’ Kantmenm sa, bann dimoun ti dir: ‘Pa fer nanryen, nou oule en lerwa nou!’

Zeova ti dir Samyel ki en zonm ki apel Sail ti pou vin premye lerwa. Ler Sail ti al vizit Samyel dan lavil Rama, Samyel ti apwent Sail konman lerwa par vid delwil lo son latet.

Pli tar, Samyel ti rasanble bann Izraelit pour montre zot zot nouvo lerwa. Me zot pa ti vwar Sail. Ou konnen akoz? Akoz i ti pe kasyet dan bagaz. Ler zot ti finalman trouv Sail, zot ti anmenn li e fer li debout devan bann dimoun. Sail ti pli gran ki tou dimoun e i ti en zoli garson. Samyel ti dir: ‘La sa enn ki Zeova in swazir!’ Bann dimoun ti kriye: ‘Viv lerwa!’

O konmansman, Sail ti ekout Samyel e obeir Zeova. Me apre i ti sanze. Par egzanp, lerwa ti napa drwa ofer sakrifis. En zour, Samyel ti demann Sail pour esper li vini, me Samyel ti tarde. Alor, Sail ti deside pour ofer sa sakrifis li menm. Ki Samyel ti fer? I ti dir Sail: ‘Ou pa ti devret dezobeir Zeova.’ Eski Sail ti pou aprann en leson atraver sa fot?

Pli tar, ler Sail ti al lager avek bann Amalekit, Samyel ti demann li pour touy zot tou. Me Sail ti deside pour pa touy Lerwa Agag. Zeova ti dir Samyel: ‘Sail in kit mwan e i nepli ekout mwan.’ Samyel ti vreman sagren e i ti dir Sail: ‘Vi ki ou’n aret obeir Zeova, i pou swazir en lot lerwa.’ Ler Samyel ti pe ale, Sail ti tyonbo son lenz e i ti desire. Alor Samyel ti dir Sail: ‘Zeova in aras ou rwayonm.’ Zeova ti pou donn rwayonm en dimoun ki ti pou kontan li e obeir li.