Zezi i vin Mesi

Zan ti pe prese: ‘En dimoun ki pli gran ki mwan pe vini.’ Ler Zezi ti apepre 30 an, i ti sorti Galile e al Larivyer Zourden kot Zan ti pe batiz dimoun. Zezi ti anvi Zan i batiz li me Zan ti dir: ‘Mon pa kapab batiz ou. Ou ki devret batiz mwan.’ Zezi ti dir Zan: ‘Zeova i anvi ki ou batiz mwan.’ Alor, zot ti al dan Larivyer Zourden e Zan ti plonz Zezi konpletman dan delo.

Ler Zezi ti sorti anba delo, i ti priye. La, lesyel ti ouver e lespri sen Bondye ti desann lo Zezi parey en zwazo ki apel en kolonm. Apre Zeova ti koze dan lesyel: “Ou menm mon Garson, sa enn ki mon kontan e ki mon’n aprouve.”

Ler lespri sen Zeova ti vin lo Zezi, i ti vin Kris oubyen Mesi. Aprezan i ti pou kapab fer sa travay ki Zeova ti anvoy li pour fer lo later.

Deswit apre son batenm, Zezi ti al dan dezer. I ti fer 40 zour laba. Ler i ti retournen, i ti al kot Zan. Ler Zezi ti pe vin kot li, Zan ti dir: ‘Sa i Pti Mouton Bondye ki pou tir pese lemonn.’ Zan ti dir sa pour fer bann dimoun konnen ki Zezi i Mesi. Eski ou konnen ki ti arive avek Zezi ler i ti dan dezer? Annou vwar.