Zezi i ganny arete

Zezi ek bann zapot ti pas par Vale Kidronn e ariv lo Montanny Pye Zoliv. I ti apre minwi e i ti plennlin. Ler zot ti ariv dan zarden Zetsemane, Zezi ti dir zot: “Reste la e kontinyen veye.” Apre sa, Zezi ti al en pti pe pli lwen e i ti tonm azenou. Zezi ti dan en gran latristes, i ti priye: “Ki ou lavolonte i ganny fer.” Apre Zeova ti anvoy en lanz pour ankouraz Zezi. Ler Zezi ti retourn kot son bann zapot, i ti vwar zot pe dormi. I ti dir zot: ‘Leve! Sa pa en letan pour dormi! Sa ler in arive pour mwan ganny tyonbo par mon bann lennmi.’

Apre, Zida ti arive avek en gran lafoul ki ti annan lepe ek mayos. I ti konnen kot pour zwenn Zezi parski souvan zot ti vin dan sa zarden. Zida ti’n dir bann solda ki i ti pou montre zot lekel Zezi. I ti al kot Zezi e dir: ‘Bonzour Ansenyan’ e apre i ti anbras li. Zezi ti dir: ‘Zida, akoz ou pe trai mwan par anbras mwan?’

Zezi ti avans devan e demann lafoul: “Lekel ki zot pe rode?” Zot ti reponn: “Zezi sa Nazareen.” Apre i ti dir: “Mwan menm sa.” Ler i ti dir sa, sa bann zonm ti dekile e tonm ater. Ankor en fwa, Zezi ti demann lafoul: “Lekel ki zot pe rode?” Zot ti reponn ankor: “Zezi sa Nazareen.” Zezi ti dir: ‘Mon’n dir zot ki mwan menm sa. Les sa bann zonm ale.’

Ler Pyer ti realize ki ti pe arive, i ti tir son lepe e koup zorey Malkis, lesklav granpret. Me Zezi ti tous zorey sa zonm e i ti geri li. Apre i ti dir Pyer: ‘Met ou lepe laba. Si ou lager avek lepe, ou pou mor par lepe.’ Bann solda ti tyonbo Zezi e anmar son lanmen. Son bann zapot ti sove. Sa lafoul ti anmenn li kot Anas, sef pret. Anas ti kestyonn Zezi e apre anvoy li kot lakaz Granpret Kaif. Me ki ti arive avek bann zapot?