LESON 15
Lekel Zezi?
Zezi i enn parmi bann dimoun pli popiler ki’n deza viv lo later. Pourtan, bokou dimoun pa konn tro gran keksoz lo li apard ki son non. Zot annan diferan pwennvi lo Zezi. Me ki Labib i dir lo li?
1. Lekel Zezi?
Zezi i en lanz pwisan ki reste dan lesyel. Bondye ti kree li avan i ti kree tou lezot keksoz. Pour sa rezon, i ganny apele “premye ne tou kreasyon.” (Kolosyen 1:15) Labib i dir ki Zezi i “sel Garson” Bondye akoz zis Zezi ki Bondye ti kree li tousel. (Zan 3:16) Zezi ti travay tre pros ansanm avek son papa Zeova, pour ed li kree lezot keksoz. (Lir Proverb 8:30.) Zezi i annan en relasyon tre pros avek Zeova. I “Parol” oubyen port parol Bondye setadir i anmenn mesaz ek lenstriksyon Bondye.—Zan 1:14.
2. Akoz Zezi ti vin lo later?
Apepre 2,000 an pase, Zeova ti servi son lespri sen pour transfer lavi Zezi dan vant en zenn fiy vyerz ki ti apel Mari. Koumsa Zezi ti kapab ne konman en imen. (Lir Lik 1:34, 35.) Zezi ti vin lo later konman sa Mesi oubyen Kris ki Bondye ti’n promet pour vin sov limanite.a Tou sa ki Zeova ti’n predir dan Labib konsernan Mesi ti ganny realize atraver Zezi e sa ti ed bann dimoun pour idantifye Zezi konman “Kris, Garson sa Bondye vivan.”—Matye 16:16.
3. Kote Zezi i ete aprezan?
Apre ki Zezi ti mor konman en imen, i ti ganny resisite konman en lanz e i ti retourn dan lesyel. Laba, “Bondye in donn li en pozisyon pli siperyer.” (Filipyen 2:9) Aprezan, Zezi i en lanz vreman pwisan, zis Zeova ki pli pwisan ki li.
AL PLI O PROFON
Dekouver lekel Zezi e akoz i sitan enportan pour konn li.
4. Zezi pa Bondye Tou Pwisan
Labib i montre ki menm si Zezi i en lanz pwisan dan lesyel, i bezwen obei son Papa ek Bondye Zeova. Akoz nou dir sa? Zwe sa VIDEO pour vwar ki Labib i dir konsernan pozisyon Zezi an rapor avek Bondye Tou Pwisan.
Sa bann verse Labib ki swiv i ed nou konpran relasyon ant Zeova ek Zezi. Lir sak verse e apre reponn sa bann kestyon:
Lir Lik 1:30-32.
Ki mannyer sa lanz ti dekri relasyon Zezi ek Zeova Bondye, “sa Enn Tre O”?
Lir Matye 3:16, 17.
Ler Zezi ti batize, ki sa lavwa sorti dan lesyel ti dir?
Dapre ou, lekel ki ti pe koze?
Lir Zan 14:28.
Lekel ki pli vye e annan plis lotorite, en papa oubyen son garson?
Zezi ti apel Zeova son Papa. Ki sa i vedir?
Lir Zan 12:49.
Eski Zezi i krwar ki li ek son Papa i menm personnaz? Ki ou panse?
5. Zezi ti prouve ki li menm li Mesi
Dan Labib i annan bokou profesi ki ti pou ed dimoun idantifye sa Mesi ki Bondye ti’n swazir pour sov limanite. Zwe sa VIDEO pour vwar serten profesi ki Zezi ti akonpli ler i ti vin lo later.
Lir sa bann profesi Labib e apre reponn sa bann kestyon:
Lir Mika 5:2 pour vwar kote Zezi ti pou ne.b
Eski nesans Zezi ti akonpli sa profesi?—Matye 2:1.
Lir Psonm 34:20 ek Zekarya 12:10 pour vwar bann detay ki ti ganny predir konsernan lanmor Mesi.
Eski sa bann profesi ti ganny akonplir?—Zan 19:33-37.
Eski ou krwar ki i posib ki Zezi ti’n kapab fer sa bann keksoz arive?
Ki sa i prouve konsernan Zezi?
6. Nou benefisye ler nou aprann konsernan Zezi
Labib i met lanfaz lo lenportans pour aprann konsernan Zezi e rol ki i annan. Lir Zan 14:6 ek 17:3 e apre reponn sa kestyon:
Akoz i tre enportan pour aprann konsernan Zezi?
Zezi i semen, setadir i fer li posib pour nou vin zanmi Bondye. I ti ansenny laverite lo Zeova e atraver li nou kapab ganny lavi eternel
SERTEN DIMOUN I DIR: “Temwen Zeova pa krwar dan Zezi.”
Ki mannyer ou ti pou reponn zot?
REZIMEN
Zezi i en lanz pwisan. I Garson Bondye e li menm li Mesi.
Revizyon
Akoz Zezi i ganny apele “premye ne tou kreasyon”?
Ki Zezi ti fer avan i ti vin lo later?
Ki mannyer nou konnen ki Zezi li menm li Mesi?
FER PLIS RESERS
Aprann plis konsernan rol Zezi konman sa Mesi.
“Eski bann profesi konsernan Mesi i prouve ki Zezi ti Mesi? (Lartik lo jw.org)
Vwar si Labib i dir ki Bondye ti vin papa Zezi dan en sans literal zis parey bann imen i vin papa zot zanfan.
Vwar akoz Trinite i en krwayans ki pa sorti dan Labib.
Lir ki mannyer lavi en madanm ti sanze apre ki i ti al rode ki Labib i dir konsernan Zezi.
“A Jewish Woman Explains Why She Reexamined Her Faith” (Veye! Me 2013 an Angle)
b Vwar Lezot lenformasyon No. 2 konsernan en profesi ki ti predir egzakteman kan Zezi ti pou vin lo later.