Donnen ziska nou nepli kapab

“OU KAPAB apel mwan en mandyan; sa pa fatig mwan. Mon pe mandyan pour Zezi.” Sa parol ki en minis Protestan ti dir i relev en deba lo konman bann larelizyon i devret ganny larzan pour siport zot lekor. Pour ki bann lorganizasyon relizye i kapab kontinyen egziste, i paret ki zot bezwen en kantite larzan. Bann tanp i bezwen ganny konstri e ganny okipe, bann dimoun konsernen i bezwen ganny peye, e bann kanpanny pour pres levanzil i bezwen ganny finanse. Ki mannyer bann larelizyon pou ganny larzan pour fer sa bann keksoz?

Pour bokou legliz, solisyon se ladim.a En paster, apele Norman Robertson i dir: “Ladim i fason ki Bondye i finans Son rwayonm lo later. I mwayen ki Bondye i servi pour ramas larzan pour ki Levanzil i kapab ganny anonse.” Sa paster pa kanmi pour rapel son bann disip zot responsabilite pour donnen. I ti dir klerman: ‘Ou pa donn ladim zis ler ou annan. I en akt lobeisans. Si ou pa donn ladim, i montre klerman ki ou pe vyol lalwa Bondye. I apel vole.’—Tithing—God’s Financial Plan.

Petet ou pou dakor ki tou Kretyen i devret donn en pe son larzan pour son legliz. Me, eski ou santi ki demann larzan zanmen fini i fatigan, petet menm i ofans ou? Inácio Strieder, en Brezilyen ki etidye larelizyon, i akiz bann larelizyon ki servi ladim konman en mwayen pour ganny plis larzan pour kouver bann depans legliz. I dir ki sa pratik i abiz dimoun dan sa bann larelizyon e i en fo enterpretasyon Labib. Dapre li konsekans ladim, se ki “bann ki napa travay, bann vev, bann pli pov, bann ki pa servi zot lespri, i krwar ki Bondye in abandonn zot. Alor zot santi zot oblize pour donn sa ‘paster’ sa kantite larzan e les zot prop fanmiy lafen.”

Petet ou pe demann ou lekor: ‘Eski bann legliz ki ansenny donn ladim pe aplik korekteman sa ki Labib i dir? Oubyen eski serten larelizyon pe fer per zot bann dimoun pour pli byen depouy zot? Fransman, eski Bondye i ekspekte nou pour donnen ziska nou nepli kapab, parey serten in dir?’

[Not anba lo paz]