Zeova—“Sa Enn ki [ti] anmenn delivrans” dan letan lontan
“O Bondye, azir vitman pour mwan. Ou sa enn ki ed mwan e sa Enn ki anmenn delivrans pour mwan.”—PS. 70:5.
1, 2. (a) Kan ki bann adorater Bondye i rod led avek zot Kreater? (b) Ki kestyon ki ganny souleve e kote nou kapab trouv son larepons?
PANDAN ki zot dan vakans, paran en fiy 23-z-an ki’n marye i aprann ki zot fiy in disparet. Lapolis i sispekte ki sa i en ka mert. Deswit zot anmas tou zot zafer pour retourn se zot. Tou dilon semen zot sipliy Zeova pour ed zot. En zenn garson Temwen Zeova ki annan 20-t-an i dekouver ki i annan en maladi ki alafen di zour pou fer li vin konpletman paralize. Deswit i konmans priy Zeova. En manman tousel ki pe fer tou son posib pour ganny en travay, napa ase larzan pour aste manze pour li ek son fiy 12 an. I devid son leker avek Zeova. Wi, kan zot pas atraver bann gro leprev oubyen difikilte, normalman bann adorater Bondye i rod led avek li. Eski ou’n deza sipliy Zeova pour ed ou dan en moman kot ou ti vreman dezespere?
2 En kestyon enportan i ganny souleve: Eski nou vreman kapab ekspekte ki Zeova pou reponn lapriyer ki nou fer pour demann li led? Psonm 70 i donn nou en larepons ki kapab ranforsi nou lafwa. Sa psonm vreman tousan ti ganny ekrir par David, en adorater ki ti fidel avek Zeova e ki ti fer fas avek en kantite defi ek leprev difisil dan son lavi. Sa psalmis ki ti’n ganny enspire ti ganny motive pour dir sa lo Zeova: “O Bondye, . . . ou sa enn ki ed mwan e sa Enn ki anmenn delivrans pour mwan.” (Ps. 70:5) En bon analiz lo Psonm 70 i kapab ed nou pour vwar akoz nou osi nou kapab tourn ver Zeova dan bann letan kot nou dan bezwen e annan konfyans total ki i pou vin “sa Enn ki anmenn delivrans” pour nou.
“Ou . . . sa Enn ki anmenn delivrans”
3. (a) Ki demann vreman irzan ki ganny trouve dan Psonm 70? (b) Ki konfyans David ti eksprimen dan Psonm 70?
3 Konmansman ek finisyon Psonm 70 i baze lo en demann vreman irzan pour ganny led avek Bondye. (Lir Psonm 70:1-5.) David ti sipliy Zeova pour “azir vitman” e “fer vit” pour delivre li. Apartir verse 2-4 David ti enplor Zeova senk fwa par konmans avek sa mo ki nou ti kapab tradwir konman “fer ki . . .” pour eksprim en dezir ouswa en swe. Sa trwa premye demann i konsernan bann ki ti anvi touy li. David ti sipliy Zeova pour ranport laviktwar lo sa bann lennmi e fer zot onte pour zot move aksyon. Sa lot de demann dan verse 4 i annan pour fer avek pep Bondye. David ti priye pour ki bann ki ti pe rod Zeova i ganny motive pour rezwir e glorifye li. Pour termin sa psonm, David ti dir Zeova: “Ou sa enn ki ed mwan e sa Enn ki anmenn delivrans pour mwan.” Remarke ki David pa ti dir: “Fer ki ou vreman . . .” konmsi i ti pe fer en lot demann. O kontrer i ti dir: “Ou sa enn,” pour montre ki i ti pe eksprim son konfyans. David ti annan konfyans ki i ti pou ganny led sorti kot Bondye.
4, 5. Ki nou aprann lo David dan Psonm 70 e ki konfyans nou kapab annan?
4 Ki Psonm 70 i endike lo David? Rafal i ti pe fer fas avek bann lennmi ki ti determinen pour touy li, David pa ti depan lo son prop lekor pour rezourd sa problenm. Plito, i ti annan konfyans ki Zeova ti pou azir kont son lennmi dan sa fason ki li i ti oule ek moman ki i ti deside. (1 Sam. 26:10) David ti reste san poursan konvenki ki Zeova pou delivre e ed bann ki rod li. (Ebr. 11:6) David ti annan konfyans ki sa bann vre adorater ti annan tou rezon pour zot rezwir e glorifye Zeova par fer lezot konnen ki i sa enn ki pli siperyer.—Ps. 5:11; 35:27.
5 Parey David, nou osi nou kapab annan konfyans total ki Zeova i sa Enn ki ed nou e “sa Enn ki anmenn delivrans” pour nou. Alor, kan nou rankontre bann leprev difisil ouswa nou santi ki nou vreman bezwen led, i byen pour nou priye pour ki Zeova i vin ed nou deswit. (Ps. 71:12) Me ki Zeova i kapab fer pour reponn nou lapriyer ki nou’n fer pour ganny led? Avan nou diskit lo fason Zeova i kapab ed nou, annou egzamin trwa fason Zeova ti delivre David e ed li dan letan kot i ti vreman dezespere.
Delivre dan lanmen son lennmi
6. Kwa ki ti ed David pour konnen ki Zeova i delivre bann dimoun drwat?
6 Vi ki serten liv dan Labib ti disponib dan son letan, David ti konnen ki bann dimoun drwat ti kapab depan lo Zeova pour zot ganny son led. Kan Zeova ti anmenn Deliz lo sa lemonn ki ti napa respe pour li, i ti protez Noe ek son fanmir ki ti annan lakrent pour li. (Zen. 7:23) Ler Zeova ti fer tonbe dife ek souf lo bann move zabitan Sodonm ek Gomor, i ti sov e ed Lot ki ti en zonm drwat ek son de fiy. (Zen. 19:12-26) Kan I ti detrir Faraon, en zonm fyer ek son larme dan Lanmer Rouz, Zeova ti protez son pep e ed zot pour zot pa ganny detrir. (Egz. 14:19-28) Eski i drol alor ki dan en lot Psonm, David ti loue Zeova konman en “Bondye ki sov [nou]”?—Ps. 68:20.
7-9. (a) Akoz David ti met son konfyans dan pouvwar ki Zeova i annan pour sov li? (b) Lekel ki David ti donn laglwar pour son delivrans?
7 David ti osi annan en rezon pour met tou son konfyans dan pouvwar ki Zeova i annan pour sov li. Zeova i touzour pare pour delivre bann ki servi Li e David ti personnelman eksperyans sa. (Det. 33:27) Plizyer fwa, Zeova ti sov David kont “bann lennmi ki ti ankoler.” (Ps. 18:17-19, 48) Egzamin en legzanp.
8 Kan bann madanm Izrael ti konmans rann glwar David pour son abilite konman en gerye, Lerwa Sail ti telman zalou ki de fwa i ti anvoy son lans lo David. (1 Sam. 18:6-9) Dan tou le de ka, David ti reisi sove san ganny blese avek sa lans. Eski David ti reisi sove akoz son abilite ek lavites konman en gerye eksperyanse? Non. Sa resi dan Labib i eksplike ki “Zeova ti avek li.” (Lir 1 Samyel 18:11-14.) Pli tar, kan son konplo pour fer bann Filisten touy David pa ti marse, “Sail ti vwar e i ti konnen ki Zeova ti avek David.”—1 Sam. 18:17-28.
9 Lekel ki David ti donn laglwar pour son delivrans? Sa pti lentrodiksyon dan Psonm 18 i dir ki David “ti dir Zeova sa bann parol dan sa kantik zour ki Zeova ti delivre li . . . dan lanmen Sail.” David ti eksprim son santiman dan sa kantik par dir: “Zeova i mon ros, mon lafors ek sa Enn ki anmenn delivrans pour mwan. Mon Bondye i mon ros. Mon pou pran refiz dan li.” (Ps. 18:2) Lefet ki nou konnen Zeova i kapab delivre son pep, pa sa i ranforsi nou lafwa?—Ps. 35:10.
Ganny soutenir kan i ti malad
10, 11. Kwa ki ed nou idantifye moman ki David ti’n kapab ganny sa maladi ki ganny mansyonnen dan Psonm 41?
10 Psonm 41 i mansyonn en letan kot Lerwa David ti ganny en maladi vreman grav. Akoz son maladi, i ti bezwen reste lo lili pour en serten letan. I ti sitan malad ki serten son bann lennmi ti krwar ki i pa ti pou zanmen “lev ankor.” (Verse 7, 8) Kan ki David ti ganny sa maladi grav? Dapre bann levennman ki ganny mansyonnen dan sa psonm, i kapab ki sa ti dan sa moman enkyetan dan lavi David, kan son garson Absalonm ti pe esey pran pouvwar dan son plas.—2 Sam. 15:6, 13, 14.
11 Par egzanp, David ti koz lo traizon enn son zanmi pros ki ti abitye manz dipen avek li. (Verse 9) Sa i kapab fer nou rapel en lensidan ki ti arive dan lavi David. Rafal Absalonm ti pe rebele, Aitofel sa konseye ki David ti annan konfyans ladan ti trai David e zwenn ansanm avek Absalonm dan son konplo kont li. (2 Sam. 15:31; 16:15) Zis mazin sa lerwa ki sa moman ti malad lo lili, i ti napa bokou lafors pour leve e pandan sa letan i ti okouran ki i ti antoure avek bann dimoun ki ti pe fer konplo kont li, bann ki ti pe swet son lanmor pour ki zot ti ava kapab fer marse zot move plan.—Verse 5.
12, 13. (a) Ki konfyans David ti eksprimen? (b) Ki mannyer petet Zeova ti donn David lafors?
12 Konfyans ki David ti annan dan “sa Enn ki anmenn delivrans” pa ti diminyen. Konsernan en adorater drwat Zeova ki malad, David ti dir: “Pandan zour maler Zeova pou delivre li. Zeova li menm pou soutenir li pandan ki i malad lo en divan; sirman ou pou rekonfort li pandan son maladi.” (Ps. 41:1, 3) La osi, remark konfyans ki David ti annan kan i ti dir: “Zeova li menm pou.” David ti asire ki Zeova ti pou delivre li. Ki mannyer?
13 David pa ti ekspekte Zeova fer en mirak e retir sa maladi lo li. Plito, i ti annan konfyans total ki Zeova ti pou “soutenir li” setadir donn li sipor ek lafors pandan ki i ti malad lo lili. Sirman David ti bezwen sa kalite led. Apard son maladi ki ti pe afeblir li, i ti antoure avek bann lennmi ki ti pe dir bann move keksoz lo li. (Verse 5, 6) Pour donn David lafors, i posib ki Zeova ti fer David mazin bann keksoz ki ti rekonfort li. I enteresan pour not sa ki David ti dir: “Akoz mon fidelite ou’n soutenir mwan.” (Verse 12) I kapab ki David ti osi ganny lafors kan i ti reflesir ki malgre son kondisyon fizik ek bann move keksoz ki son bann lennmi ti pe dir, Zeova ti vwar li konman en zonm ki ti fidel. Finalman David ti rekipere. Eski pa i vreman ankourazan pour konnen ki Zeova i kapab soutenir bann ki malad?—2 Kor. 1:3.
Zeova ti fourni li avek provizyon neseser
14, 15. Kan ki David ek son bann zonm ti vwar zot dan sa bezwen pour ganny provizyon neseser e ki led zot ti gannyen?
14 Kan i ti vin lerwa Izrael, David ti kapab apresye bann bon manze ek keksoz pour bwar e menm envit bokou lezot pour manz ansanm avek li lo son latab. (2 Sam. 9:10) Parkont, i ti osi konnen ki savedir napa manze ek bwar. Kan son garson Absalonm ti organiz en rebelyon e esey pran pouvwar dan son plas, David ansanm avek serten zonm ki ti fidelman siport li, ti sove Zerizalenm. Zot ti sove e al Gilead ki ti dan les Larivyer Zourden. (2 Sam. 17:22, 24) Zot ti forse viv konman bann refizye e pa bokou letan apre, David ek son bann zonm ti vwar zot dan en sityasyon kot zot ti vreman bezwen manze ek bwar, ensi ki repo. Alor, kote zot ti pou ganny bann provizyon neseser dan sa dezer?
15 Finalman David ek son bann zonm ti ariv dan lavil Maanaim. Laba zot ti zwenn trwa zonm kouraze ki ti apel Sobi, Makir ek Barzilai. Sa trwa zonm ti pare pour riske zot lavi pour ed sa lerwa ki ti’n ganny swazir par Bondye, akoz si Absalonm ti reisi vin lerwa, sirman i ti pou severman pini nenport ki ki ti’n ed David. Sa trwa zonm ti remarke ki David ek son bann zonm ti napa ase provizyon, alor zot ti rod bann keksoz ki zot ti bezwen parey lili, dible, lorz, lagrenn griye, zariko, lantiy, dimyel, diber ek mouton. (Lir 2 Samyel 17:27-29.) Sirman, fidelite ek lospitalite ki sa trwa zonm ti demontre dan en fason ekstraordiner, ti tous leker David. Ki mannyer David ti pou kapab oubliy sa ki zot ti fer pour li?
16. Lekel ki ti vreman responsab pour fourni David ek son bann zonm bann provizyon neseser?
16 Alor, lekel ki ti vreman responsab pour fourni David ek son bann zonm bann provizyon neseser? David ti konvenki ki Zeova i pran swen avek son pep. Sirman Zeova i kapab motiv lezot son serviter pour ed enn zot frer oubyen ser Kretyen ki dan bezwen. Kan i ti pe reflesir lo sa ki ti arive Gilead, san dout David ti vwar labonte sa trwa zonm konman en fason ki Zeova ti demontre son lanmour pour li, par pran swen avek li. Ver lafen son lavi David ti ekrir: “Mon ti en zenn onm, mon’n menm vin vye, e pourtan mon pa’n vwar okenn dimoun drwat [enkli li menm] ganny abandonnen konpletman, ni menm son desandans pe rod dipen.” (Ps. 37:25) Eski pa i rekonfortan pour konnen ki Zeova i toultan ed son bann serviter?—Prov. 10:3.
“Bondye i konnen ki mannyer i pou delivre bann dimoun”
17. Ki Zeova in toultan demontre?
17 David ti zis enn parmi plizyer adorater ki Zeova ti delivre dan letan lontan. Depi letan David, Bondye in toultan demontre ki sa parol ki zapot Pyer ti dir i vre: “Bondye i konnen ki mannyer i pou delivre bann dimoun.” (2 Pyer 2:9) Egzamin ankor de legzanp.
18. Ki mannyer Zeova ti anmenn delivrans dan letan Izkiya?
18 Kan larme pwisan sorti Lasiri ti anvair Zida e menas Zerizalenm dan wityenm syek A.N.L., Lerwa Izkiya ti priye: “O Zeova nou Bondye, delivre nou . . . pour ki tou rwayonm lo later i konnen ki ou, O Zeova, zis ou tousel ki Bondye.” (Iza. 37:20) Repitasyon ek non Bondye ti vreman enportan pour Izkiya. Zeova ti reponn sa lapriyer senser. Dan zis en lannwit, en lanz tousel ti touy 185,000 Asiryen e sa ti anmenn delivrans pour bann serviter Zeova.—Iza. 37:32, 36.
19. Ki lavertisman bann Kretyen dan premye syek ti bezwen pran aker pour zot kapab sov en maler?
19 Detrwa zour avan son lanmor, Zezi ti donn en lavertisman ki plitar ti vin vre, pour benefisye son bann disip ki ti Zida. (Lir Lik 21:20-22.) Bokou lannen ti pase, me an 66 N.L., larme Romen ti vin Zerizalenm akoz bann Zwif ti pe revolte. Sa latroup larme anba konmann Sestis Galis ti reisi andomaz en bout miray tanp me en sel kou apre sa, zot ti ale. Bann Kretyen ki ti fidel ti rekonnet ki sa ti en loportinite pour zot sov sa destriksyon ki Zezi ti predir, alor zot ti sove e al lo montanny. Larme Romen ti retourn Zerizalenm an 70 N.L. Safwasi zot pa ti ale e Zerizalenm ti ganny detrir konpletman. Bann Kretyen ki ti pran aker sa lavertisman ki Zezi ti donnen ti sov sa maler vreman terib.—Lik 19:41-44.
20. Akoz nou kapab annan konfyans dan Zeova konman “sa Enn ki anmenn delivrans” pour nou?
20 Kan nou reflesir lo bann levidans kot Zeova in protez son pep, sa i vreman ranforsi nou lafwa. Sa ki i ti fer lontan i donn nou en baz pour nou annan konfyans dan li. Nenport ki defi nou kapab pe rankontre la konmela oubyen nou kapab rankontre alavenir, nou osi nou kapab met tou nou konfyans dan “sa Enn ki anmenn delivrans.” Alor, ki mannyer Zeova i kapab anmenn delivrans pour nou? Ki mannyer sa bann dimoun ki nou’n mansyonnen o konmansman sa lartik ti devenir? Annou vwar dan lot lartik.
Eski ou rapel?
• Ki konfyans nou kapab annan dapre Psonm 70?
• Ki mannyer David ti ganny sipor ek lafors pandan letan ki i ti malad?
• Ki legzanp ki montre Zeova i kapab delivre son pep kont bann lennmi?
[Portre lo paz 12]
Zeova ti reponn lapriyer Izkiya