Dezyenm krwayans: Bann move dimoun i soufer dan lanfer
Kote sa krwayans i sorti? “Parmi tou bann ansyen filozof Grek, Plato i sa enn ki’n annan plis lenfliyans lo bann pwennvi konsernan lanfer.”—Histoire des enfers (Listwar lo lanfer), par Georges Minois, paz 50.
“Ver milye dezyenm syek apre Zezi, bann Kretyen ki ti’n ganny en pe formasyon dan filozofi Grek ti konmans santi sa nesesite pour eksprim zot lafwa an rapor avek sa ki zot ti’n aprann . . . Filozofi ki zot ti aksepte ti Platonism [sa enn ki ti baze lo bann lansennyman Plato].”—The New Encyclopædia Britannica (1988), Volim 25, paz 890.
“Lansennyman Legliz i konfirmen ki lanfer i egziste e i eternel. Deswit apre lanmor, nanm bann ki’n mor akoz pese i desann dan lanfer, kot zot ganny pini e soufer dan ‘dife eternel.’ Pli gran pinisyon dan lanfer i kan en dimoun i ganny separe avek Bondye pour touzour.”—Catechism of the Catholic Church, edisyon 1994, paz 270.
Ki Labib i dir? “Annefe bann vivan i konnen ki zot pou mor, me bann mor pa konn nanryen, . . . parski napa travay ni panse ni konnesans ni lasazes dan Seol, kot ou pe ale.”—Eklezyast 9:5, 10, Revised Standard Version.
Sa mo Seol an Ebre, ki ti refer avek “landrwa bann mor,” i ganny tradwir “lanfer” dan serten versyon Labib. Ki sa verse Labib dan Eklezyast i montre konsernan kondisyon bann mor? Eski zot soufer dan Seol pour pey pour zot bann fot? Non, parski zot pa “konn nanryen.” Sa i rezon akoz ler patrias Zob ti pe soufer avek en maladi terib, i ti sipliy Bondye: “Protez mwan dan lanfer [an Ebre, Seol].” (Zob 14:13; Douay-Rheims Version) Eski i ti pou fer sans pour Zob demande pour al dan lanfer [Seol] si i ti en landrwa kot dimoun i ganny tourmante pour touzour? Dapre Labib, lanfer i senpleman latonm kot tou bann mor i ete e kot napa okenn aktivite.
Pa sa definisyon konsernan lanfer i pli lozik e an armoni avek Labib? Ki kalite pese ki kapab fer en Bondye lanmour tortir en dimoun eternelman? (1 Zan 4:8) Me si lanfer i en fo krwayans, eski sa i vedir ki lavi dan lesyel osi i fo?
Konpar sa bann verse Labib: Psonm 146:3, 4; Akt 2:25-27; Romen 6:7, 23
REALITE:
Bondye pa pini dimoun dan lanfer