Sa “letan fikse” i pros

PAREY profet Abakouk, bann disip Zezi ti vreman anvi vwar en lafen avek soufrans. Apre ki zot ti’n aprann konsernan sa ki Rwayonm Bondye ti pou fer pour rezourd bann problenm lo later, zot ti demann Zezi: “Kan ki tousala pou arive e ki siny ki pou endik ou prezans [konman Lerwa] ek konklizyon sa sistenm?” (Matye 24:3, NW) Pour reponn zot Zezi ti dir ki zis Zeova tousel ki konn ler egzakt kan sa Rwayonm pou pran kontrol total lo later. (Matye 24:36; Mark 13:32) Par kont, Zezi ensi ki lezot dimoun osi ti predir sa ki ti pou arive lo later ki ti pou montre ki sa letan ti pros.—Vwar bwat ki dan kote drwat.

Eski pa ou pou dakor ki sa bann keksoz i partou kote ozordi? Zezi ti osi predir ki i ti pou annan en travay lansennyman ki ti pou ganny fer dan lemonn antye. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14.

Se sanmenm ki pe arive ozordi. Temwen Zeova pe fer sa travay. I annan plis ki set milyon Temwen dan 236 pei ki pe dir bann dimoun sa ki sa Rwayonm pou fer e zot pe ed sa bann dimoun pour viv an armoni avek bann standar drwat Bondye, akoz son lavolonte i ki soufrans ek douler i ganny eliminen pour touzour. Kontinyen aprann lo Rwayonm Bondye e ou pou annan sa lespwar pour viv pour touzour, dan en lemonn kot pou napa soufrans.

[Bwat lo paz 8]

Bann verse Labib ki koz lo dernyen zour

MATYE 24:6, 7; REVELASYON 6:4

• Plis lager ki oparavan.

MATYE 24:7; MARK 13:8

• Gran tranblemandter.

• Mankman manze.

LIK 21:11; REVELASYON 6:8

• Bann maladi.

MATYE 24:12

• Dimoun ki kas lalwa i ogmante.

• Lanmour ki diminyen.

REVELASYON 11:18

• Later ki ganny detrir.

2 TIMOTE 3:2

• Lanmour pour larzan.

• Dezobeisans anver paran.

• Dimoun ki egois.

2 TIMOTE 3:3

• Annan leker dir.

• Dimoun ki pa tonm dakor avek kanmarad.

• Lamazorite dimoun napa kontrol lo zot lekor.

• Partou kote dimoun napa lanmour pour sa ki byen.

2 TIMOTE 3:4

• Kontan plezir plis ki Bondye.

2 TIMOTE 3:5

• Bokou ipokrit ki dir zot Kretyen.

MATYE 24:5, 11; MARK 13:6

• Bokou fo profet ki aktif.

MATYE 24:9; LIK 21:12

• Vre Kretyen i ganny persekite.

MATYE 24:39

• Bann dimoun pa pran kont lavertisman sorti dan Labib.

[Portre lo paz 8]

Dan lemonn antye, Temwen Zeova i ansenny lezot lo Rwayonm Bondye