Zezi Kri, lefe son mesaz

“I kler ki sa ki [Zezi], sa zonm saz sorti Kapernaoum ti dir pe kontinyen annan lefe lo leker ek lespri bann dimoun.”a —EKRIVEN GREGG EASTERBROOK.

PAROL i annan pouvwar. Bann parol ki ganny byen swazir e ki ranpli avek lasazes i kapab tous leker, donn lespwar e fer dimoun fer sanzman dan zot lavi. Napa personn apard Zezi Kri ki son parol in annan sitan lefe lo lezot. En dimoun ki ti la prezan kan Zezi ti pe donn son Sermon byen renonmen lo montanny ti plitar ekrir: “Kan Zezi ti’n fini dir zot sa bann keksoz lafoul ti byen etonnen par mannyer ki i ti ansennyen.”—Matye 7:28.

Ziska ozordi, i annan en kantite parol ki Zezi ti dir ki dimoun dan lemonn antye i konn tre byen. Annou egzamin detrwa legzanp sa bann parol byen ris.

“Ou pa kapab servi Bondye ek larises an menm-tan.”—Matye 6:24.

“Fer pour lezot sa ki ou oule lezot i fer pour ou.”—Matye 7:12.

“Rann Sezar sa ki pour Sezar e rann Bondye sa ki pour Bondye.”—Matye 22:21.

“I annan plis lazwa pour donnen ki pour resevwar.”—Akt 20:35.

Zezi ti fer plis ki zis dir bann keksoz ki gou pour rapel. Sa mesaz ki i ti prese ti pwisan akoz i ti en mesaz ki ti devwal laverite lo Bondye, ansenny dimoun pour trouv vre bi dan lavi e i ti klerman fer resorti sa mwayen atraver ki Bondye pou met en lafen avek tou soufrans ki limanite pe fer fas avek. Sa mwayen i Rwayonm Bondye. Anmezir nou egzamin sa mesaz lo sa lot paz ki swiv, nou pou remarke ki mannyer Zezi i kontinyen “annan lefe lo leker ek lespri” plizyer milyon dimoun.

[Not anba lo paz]