Armagedon​—ki serten i dir lo la?

“Zot ti rasanble . . . dan en landrwa ki apel Armagedon dan langaz Ebre.”​—REVELASYON 16:16, New International Version.

KWA ki vin dan ou lespri letan ou tann sa mo “Armagedon”? Petet i kapab fer ou mazin en katastrof. Menm si sa mo in ganny mansyonnen zis en fwa dan Labib, Armagedon i souvan ganny mansyonnen dan medya e osi par bann sef larelizyon.

Eski sa ki mazorite dimoun i dir lo Armagedon i parey avek sa ki Labib i dir? I enportan pour konn larepons. Akoz? Parski laverite lo Armagedon i kapab anpes ou per pour nanryen, fer ou get lavenir avek plis lespwar e fer ou annan en pli bon pwennvi lo Bondye.

Annou egzamin sa trwa kestyon ki swiv e konpar bann pwennvi popiler ki dimoun i annan lo Armagedon avek sa ki Labib i dir.

1. ESKI ARMAGEDON I EN DEZAS KOZE PAR IMEN?

Souvandfwa bann zournalis ek bann serser i servi sa mo “Armagedon” pour dekrir bann katastrof koze par imen. Par egzanp, tou le de Lager Mondyal ti ganny dekrir konman Armagedon. Apre sa bann lager, imen ti konmans enkyet ki Leta-z-ini ek Linyon Sovyetik ti pou bonbard kanmarad avek bann zarm nikleer, en menas ki Medya ti apel en “Armagedon zarm nikleer.” Denozour, bann serser ki krwar ki polisyon pou afekte klima later en kantite, i averti nou kont en “klima Armagedon.”

Sa ki zot pwennvi i enplike: Tou sa ki pou arive avek later ek tou keksoz vivan lo la i anba kontrol bann imen. Si gouvernman pa fer bann bon desizyon, later pou ganny detrir konpletman.

Sa ki Labib i dir: Bondye pa pou les zonm detrir later. Labib i asir nou ki Zeovaa pa’n kre later “pour nanryen ditou,” o kontrer, i’n fer li “pour dimoun reste lo la.” (Izai 45:18) Olye les imen gat later konpletman, Bondye pou “detri bann ki detri later.”​—Revelasyon 11:18.

2. ESKI ARMAGEDON I EN DEZAS NATIREL?

Parfwa bann zournalis i servi sa mo “Armagedon” kan zot pe refer avek bann gran dezas natirel. An 2010 i ti annan en lartik ki ti koz lo “‘Armagedon’ Ayti.” I ti pe dekrir soufrans, domaz ek sa kantite dimoun ki’n mor akoz en gro tranblemandter ki ti frap sa pei. Bann zournalis ek bann dimoun ki fer film i servi sa mo pa zis avek bann dezas ki’n fini arive me osi avek bann ki zot pe ekspekte i arive. Par egzanp, zot in servi sa mo “Armagedon” pour dekrir lefe ki en ros ki sorti dan lespas i kapab annan si i tap later.

Sa ki zot pwennvi i enplike: Armagedon i en levennman ki kapab arive nenport ki ler e i kapab pran lavi bann dimoun inosan. Napa nanryen ki nou kapab fer pour protez nou lekor.

Sa ki Labib i dir: Armagedon i pa zis en levennman ki ariv par sans e ki detrir tou dimoun. O kontrer, pandan Armagedon se zis bann move dimoun ki pou ganny detrir. Labib i promet ki tre byento “move dimoun pou nepli la, ou pou al get dan son landrwa e i pa pou la.”​—Psonm 37:10.

3. ESKI BONDYE POU DETRIR LATER ZOUR ARMAGEDON?

Bokou dimoun relizye i krwar ki i pou annan en lager final ant lebyen ek lemal e an konsekans, later pou ganny detrir konpletman. En serve ki ti ganny fer Leta-z-ini par Princeton Survey Research Associates i montre ki 40 poursan adilt ki ti partisip dan sa serve i vreman krwar ki lemonn pou ganny detrir dan “lager Armagedon.”

Sa ki zot krwayans i enplike: Imen pa’n ganny kree pour viv pour touzour e later pa pou dir pour touzour. Bondye ti kre imen avek lentansyon pour zot viv zis pour en serten letan.

Sa ki Labib i dir: Labib i dir klerman ki Bondye in “met later dan son landrwa fiks, i pou reste stab pour en letan endefini oubyen pour touzour.” (Psonm 104:5) I osi dir sa konsernan zabitan later: “Bann dimoun drwat pou posed later e zot pou reste lo la pour touzour.”​—Psonm 37:29.

San okenn dout, sa ki Labib i dir ek sa ki laplipar dimoun i panse lo Armagedon i byen diferan. Alor, ki si sa Armagedon?

[Not anba lo paz]