Eski Labib i kapab ed nou ozordi?

SERTEN I DIR NON. En dokter ti dir ki servi Labib ozordi i parey ou pe servi en liv Chemistry ki date depi 1920 pour ansenny en laklas Chemistry. En dimoun ki pa respekte Labib i kapab menm demande si ou ti pou servi manual en vye konpiter ki’n aret marse pour fer marse en dernyen model konpiter. Andotmo, serten dimoun i vwar Labib konman en liv ki son letan in fini.

Eski i fer sans pour servi en vye liv parey Labib dan en lemonn ki sitan devlope e ranpli avek teknolozi? Apre tou, konmela i annan en kantite sit Enternet ki donn bann konsey ek gidans modern. I osi annan bann progranm ek kozri lo televizyon ki ganny fer par bann psikolog, eksper ek ekriven. Dan bann laboutik ki vann liv, i annan en kantite liv ki donn bann konsey lo lavi e sa lendistri pe fer en kantite larzan.

Avek tou sa bann dernyen lenformasyon ki nou annan ozordi, eski i fer sans pour rod gidans Labib, en liv ki’n ganny ekrir preski 2000 an pase? Eski bann dimoun ki pa respekte Labib i annan rezon pour dir ki rod gidans dan Labib i parey servi en vye liv chemistry oubyen manual en vye konpiter? Anfet sa i pa en bon rezonnman. I vre ki lasyans ek teknolozi i sanze me eski bezwen de baz bann imen in sanze? Dimoun i ankor anvi konnen ki bi lavi, zot anvi ere, an sekirite, annan en bon lavi fanmir e annan bann bon zanmi.

Menm si Labib i en vye liv, i koz lo sa bann topik ek lezot keksoz ankor. I osi dir ki i’n ganny enspire par Bondye. Labib i donn bann konsey lo ki mannyer pour annan en bon lavi e i ed nou pour fer fas avek nenport difikilte dan lavi. (2 Timote 3:16, 17) An plis, i donn bann konsey ki toultan itil! Labib i dir: “Parol Bondye i vivan.”​—Ebre 4:12.

Eski sa ki Labib i dir i vre? Eski i tro vye ouswa eski i sa liv ki pli itil, en liv ki ankor kapab ed nou e donn nou bann konsey ki pratik? Sa Latour Veyer ki premye parmi en seri edisyon spesyal, pou ed ou vwar larepons sa bann kestyon.