Akoz i enportan pour Zeova ki nou dir “Amenn”?

ZEOVA i apresye nou ladorasyon. I pe “ekout” son bann serviter e i “antann zot.” I apresye tou sa ki nou fer pour loue li, menm sa pli pti keksoz. (Mal. 3:16) Par egzanp, annou vwar en mo ki i tre probab nou’n servi plizyer fwa. Sa mo i “amenn.” Eski Zeova i apresye menm sa pti mo? Wi! Pour konpran akoz, annou vwar ki savedir sa mo e ki mannyer i ganny servi dan Labib.

“LEPEP AVA DIR: AMENN!”

Sa mo “amenn” i vedir “dakor” oubyen “sirman.” Sa mo i sorti dan en mo Ebre ki vedir “fidel, diny konfyans.” Parfwa i ti ganny servi dan bann ka legal. Apre ki en dimoun ti fer en serman, i ti pou dir “amenn” pour konfirmen ki sa ki i’n dir i egzakt e ki i ti pou aksepte konsekans son serman. (Nom. 5:22) Ler i ti dir “amenn” an piblik, i ti annan plis rezon pour gard son promes.—Nee. 5:13.

En legzanp remarkab dan lafason ki sa mo “amenn” ti ganny servi i trouve dan Deterononm sapit 27. Apre ki bann Izraelit ti’n antre dan Later Promiz, zot ti pou bezwen rasanble ant Montanny Ebal ek Montanny Garizim pour ekout Lalwa. Zot pa ti laba zis pour ekoute me osi pour dir ki zot in aksepte Lalwa. Zot ti fer sa par dir “Amenn!” ler konsekans pour dezobeisans ti ganny lir. (Det. 27:15-26) Imazin lavwa sa plizyer milye zonm, madanm ek zanfan pe dir amenn byen for! (Zoz. 8:30-35) Sirman, zot pa ti zanmen oubliy sa ki zot ti dir sa zour. Nou konnen ki sa bann Izraelit ti gard zot parol parski Labib i dir: “Izrael ti servi [Zeova] tou dilon lavi Zozye, e tou dilon lavi bann ansyen ki ti reste vivan apre Zozye e ki ti konn tou bann mervey ki [Zeova] ti’n fer an faver Izrael.”—Zoz. 24:31.

Zezi osi ti servi “amenn” pour konfirmen ki sa ki ti’n ganny dir ti vre, me i ti fer sa dan en lot fason. Olye servi li pour reponn apre ki en dimoun ti’n dir en keksoz, i ti dir “amenn” (ki’n ganny tradwir konman “vreman”) avan ki i ti dir en keksoz pour konfirmen ki sa ki i ti pe al dir i vre. Parfwa i ti repet sa mo par dir “amenn amenn” (ki’n ganny tradwir konman “vreman . . . laverite”). (Mat. 5:18; Zan 1:51) Alor i ti asir sa bann ki ti pe ekout li ki son parol ti vreman laverite. Zezi ti kapab koz avek en tel lasirans parski i ti sa enn ki ti’n ganny otorize pour realiz tou promes Bondye.—2 Kor. 1:20; Rev. 3:14.

“LEPEP ANTYE TI DIR: AMENN! LOUE [ZEOVA]”

Bann Izraelit ti osi dir “amenn” ler zot ti pe fer lapriyer e loue Zeova. (Nee. 8:6; Ps. 41:13) Ler zot ti dir sa mo apre en lapriyer, sa bann ki ti pe ekoute ti montre ki zot ti dakor avek sa ki ti’n ganny dir. Alor tou sa ki ti la ti kapab partisipe e zot ti kontan pour ador Zeova dan sa fason. Sanmenm ki ti arive ler Lerwa David ti anmenn Lars lalyans Zeova Zerizalenm. Pandan sa selebrasyon ki ti swiv, i ti fer en zoli lapriyer dan laform en kantik ki ganny rikorde dan 1 Kronik 16:8-36. Sa lapriyer ti pous “lepep antye [pour] dir: Amenn! Loue [Zeova].” Zot ti kontan pour ador Zeova ansanm.

Pareyman, bann Kretyen dan premye syek ti dir “amenn” ler zot ti pe loue Zeova. Souvandfwa bann ekriven Labib ti enkli li dan zot bann let. (Rom. 1:25; 16:27; 1 Pyer 4:11) Liv Revelasyon i menm dekrir bann lanz dan lesyel ki pe glorifye Zeova e dir: “Amenn! Loue Ya!” (Rev. 19:1, 4) Bann Kretyen dan premye syek ti abitye dir “amenn” apre ki lapriyer ti’n ganny fer kot bann renyon. (1 Kor. 14:16) Par kont, i pa ti zis en mo ki zot ti dir san reflesi.

REZON KI OU “AMENN” I ENPORTAN

Apre ki nou’n vwar lafason ki bann serviter Zeova ti servi sa mo “amenn,” nou kapab konpran akoz i enportan pour dir amenn a lafen en lapriyer. Ler nou dir amenn a lafen nou prop lapriyer, nou montre ki nou vreman senser dan sa ki nou’n dir. Ler nou dir “amenn” a lafen en lapriyer piblik, ki swa aotvwa ouswa dan nou leker, nou montre ki nou dakor avek sa ki’n ganny dir. Annou vwar lezot rezon akoz i enportan pour dir “amenn.”

I form parti nou ladorasyon. Pandan lapriyer nou ador Zeova par sa ki nou dir e osi par nou konportman. Vi ki nou anvi dir “amenn” senserman, sa i ed nou pour gard en bon latitid e konsantre lo sa lapriyer.

I inifye nou konman bann adorater. Bann lapriyer ki ganny fer an piblik i ed nou pour konsantre lo sa ki kongregasyon antye pe tande. (Akt 1:14; 12:5) Ler nou ganny pouse pour reponn ansanm avek nou bann frer ek ser, nou vin pli ini. Ler nou dir “amenn” ansanm, ki swa aotvwa ouswa dan nou leker, nou lapriyer i kapab pous Zeova pour fer sa ki nou’n demann li.

En ser i bes son latet pour lapriyer anmezir ki i ekout renyon par telefonn — Nou loue Zeova ler nou dir “amenn”

Nou loue Zeova. Zeova i remark tou sa ki nou fer dan nou ladorasyon. (Lik 21:2, 3) I vwar kwa ki motiv nou e sa ki dan nou leker. Menm ler nou bezwen ekout renyon par telefonn, nou kapab asire ki Zeova i remarke ler nou dir “amenn.” Ler nou dir “amenn,” nou loue Zeova ansanm avek lezot ki dan renyon.

Nou “amenn” i kapab paret pa enportan, me pour Zeova i enportan. En ansiklopedi lo Labib i dir: “Zis par servi sa mo,” bann serviter Bondye i kapab eksprim “zot konfyans, montre ki zot vreman aksepte sa ki’n ganny dir e sa lespwar senser ki dan zot leker.” Ki tou “amenn” ki nou dir i fer plezir Zeova!—Ps. 19:14.

Eski ou devret toultan dir “amenn”?

“Amenn” pa en mo ki nou devret pran alalezer. Par kont, ki nou pou fer si sa enn ki pe fer lapriyer i mal dir en keksoz? Eski nou pa devret dir “amenn”? Pa neseserman. Apre tou, Zeova i konnen ki nou tou parfwa nou dir en keksoz mal e i les pase sa bann fot. Alor ler lezot pe fer lapriyer, si nou konsantre lo nide par deryer sa ki zot pe dir olye lo bann mo, nou pou santi nou konfortab pour dir “amenn.”

De lot kote, nou pa dir “amenn” aotvwa ouswa dan nou leker, ler en non krwayan i fer lapriyer. Me ki nou pou fer si nou trouv nou dan sa sityasyon? Par egzanp, petet nou dan en levennman kot en dimoun i ganny demande pour fer lapriyer. Ouswa petet nou dan en fanmir kot pa tou dimoun ki Temwen Zeova e sef lakour, ki pa en Temwen, i deside fer lapriyer pour lafanmir. Ki nou pou fer?

Nou kapab reste trankil, me demontre respe. Nou pa pou partisipe par dir “amenn” e nou pa pou ni menm atrap lanmen lezot pandan sa lapriyer, parski sa pou donn lenpresyon ki nou pe partisip avek zot. Nou kapab swazir pour fer nou prop lapriyer an silans, me nou pou evite dir “amenn” aotvwa pour ki nou pa donn lezot lenpresyon ki nou pe partisip avek zot. Si zot debout pour fer lapriyer, i depan lo nou pour deside si nou pou debout ouswa non. I pa mal pour fer sa, parski debout ouswa bes latet pa en akt ladorasyon. Sak Kretyen i bezwen deside ki i pou fer dan en tel sityasyon e personn pa devret kritik li pour son swa.

Sa bann sityasyon ki nou’n koz lo la i osi montre akoz i enportan pour Zeova ler nou dir “amenn.”