Ed Lezot Asiste Renyon
1 “Okenn zanmi dan zanmirant . . . ki dezir asiste bann renyon i ganny kordyalman envite.” Depi ki sa lanons ti aparet dan nimero Zion’s Watch Tower Novanm 1880, avek lantouzyasm bann Temwen Zeova in envit dimoun pour rasanble ansanm pour ganny lenstriksyon Biblik. (Rev. 22:17) Sa i en par esansyel dan vre ladorasyon.
2 I Esansyel pour Asiste: Ler nou asosye avek kongregasyon sa i anmenn bokou benediksyon. Nou vin pli familye avek nou Bondye merveye, Zeova. Dan kongregasyon, nou zwenn ansanm pour ganny “ansennyen par Zeova.” (Iza. 54:13) Son lorganizasyon in prepar en progranm zeneral pour lenstriksyon Biblik ki anmenn nou pli pros avek li e donn nou led pratik pour aplik “tou konsey Bondye.” (Akt 20:27 NW; Lik 12:42) Bann renyon i fourni en formasyon personnel dan lar pour ansenny Parol Bondye. Bann rapel Biblik i ed nou pour rezwir en bon relasyon avek lezot e avek Zeova li menm. Par asosye avek sa bann ki kontan Bondye sa i ranforsi nou lafwa.—Rom. 1:11, 12.
3 Donn en Lenvitasyon Direk: Kan ou fer ou premye letid avek en dimoun, envit li renyon. Donn li en fey lenvitasyon. Evey son lentere par partaz en pwen ki’n ankouraz ou dan dernyen renyon e osi par koz lo en size ki pou ganny diskite dan lot renyon. Dekrir konman ki Lasal Rwayonm i ete, e fer sir i konnen kote i ete.
4 Si en etidyan pa asiste renyon tou deswit, kontinyen envit li. Pran detrwa minit sak semenn pour montre li konman nou lorganizasyon i fonksyonnen. Servi brosir Les Témoins de Jéhovah—Unis ek video Les Témoins de Jéhovah—Un Nom, Une Organisation pour familyariz li avek nou e avek nou bann renyon. Anmenn lezot proklanmater avek ou pour fer sa etidyan konn zot. Dan lapriyer, remersi Zeova pour lorganizasyon e mansyonn lenportans pour sa etidyan asosye avek sa lorganizasyon.
5 Pa ezite pour ed bann nouvo ki enterese pour rasanble avek nou. Anmezir ki zot lapresyasyon pour Zeova i grandir, zot pou ganny motive pour aplik sa ki zot aprann e pour form par lorganizasyon ini Bondye.—1 Kor. 14:25.