Bon Konportman—En Kalite ki disteng bann Dimoun ki atase avek Bondye
1 Denozour bon konportman i rar. Akoz sa? Dimoun i telman prese ki zot rarman mazin bann kourtwazi debaz, tel parey pour dir “Silvouple,” “Mersi,” oubyen “Ekskiz mwan.” Parol Bondye ti predir en deteryorasyon dan konportman bann dimoun dan bann dernyen zour kan i ti dir ki dimoun pou vin ‘egois, vantar, arogan, engra, napa lafeksyon natirel, napa kontrol lo zot menm, napa lanmour pour dibyen, e annan karakter vif.’ (2 Tim. 3:1-4) Tou sa bann kalite i anmenn en move konportman. Konman bann dimoun ki atase avek Bondye, bann Kretyen i devret veye ki zot pa adopte latitid sa monn par mank respe pour lezot.
2 Kisisa bon Konportman? Bon konportman i kapab ganny dekrir konman en konsyans profon pour santiman lezot, sa abilite pour viv anpe avek lezot. Bann laspe bon konportman se konsiderasyon, lakourtwazi, labonte, lapolites. Sa bann kalite i sorti dan sa lanmour ki en dimoun i annan pour Bondye ek son vwazen. (Lik 10:27) Zot pa kout nanryen, me zot annan bokou valer dan amelyor nou kontakt avek lezot.
3 Zezi Kri ti donn en legzanp parfe. I ti toultan pratik Lareg-d-or: “Fer pour lezot parey ou ti a kontan, ki lezot i fer pour ou.” (Lik 6:31) Eski nou pa etonnen ki mannyer Zezi ti azir avek konsiderasyon ek lanmour anver son bann disip? (Mat. 11:28-30) Son bon konportman pa ti sorti dan bann liv ki dekrir konman pour viv. I ti sorti dan en leker senser e zenere. Nou devret esey imit son bon legzanp.
4 Kan ki bann Kretyen i bezwen byen konport zot? Zis dan bann lokazyon spesyal, kot zot anvi donn en bon lenpresyon? Eski i neseser zis ler zot pe esey enfliyans lezot? Non! Nou devret toultan annan en bon konportman. Dan ki bann fason an partikilye nou devret santi nou konsernen pour konport nou byen dan nou lasosyasyon avek lezot dan kongregasyon?
5 Dan Lasal Rwayonm: Lasal Rwayonm i nou landrwa ladorasyon. Nou la par lenvitasyon Zeova Bondye. Dan sa ka, nou bann envite. (Ps. 15:1) Eski nou bann envite egzanpler letan nou vin Lasal Rwayonm? Eski nou port latansyon apropriye lo nou labiyman ek kwafir? Sirman nou ti a anvi evit abiye dan en fason ekstravagan ouswa avek bann lenz toulezour ki pa apropriye. Ki swa nou pe asiste diferan lasanble oubyen bann renyon kongregasyon pandan lasemenn, pep Zeova i ganny remarke pour zot bon laparans ki akseptab pour bann ki pe ador Bondye. (1 Tim. 2:9, 10) Alor nou montre konsiderasyon ek respe apropriye pour sa Enn dan lesyel ki’n envit nou e osi lezot envite ki prezan.
6 En lot fason ki nou montre bon konportman an rapor avek bann renyon se par vin aler. I vre ki i pa touzour fasil. Serten i kapab reste tre lwen oubyen i kapab annan en gran fanmiy pour okipe. Dan serten kongregasyon, nou’n obzerve ki plis ki 25 poursan proklanmater i abitye ariv apre kantik ek lapriyer. Sa i en keksoz serye. I bon pour rapel ki konportman i annan pour fer avek respekte santiman lezot. Zeova, sa Enn ki’n kordyalman envit nou, i’n prepar sa bann festen spirityel pour nou benefis. Nou montre nou lapresyasyon ek konsern pour son santiman par ariv aler. Deplis, ariv an retar dan bann renyon i deranz e montre en mank respe pour sa bann ki deza dan lasistans.
7 Letan nou rasanble, eski nou remark sa bann ki nouvo dan lasistans? Akey zot i en par pour montre ki nou annan en bon konportman. (Mat. 5:47; Rom. 15:7) En lakey kordyal, en bon ponnyennmen, en sourir amikal—tou sa i bann pti keksoz, me zot kontribye pour idantifye nou konman bann vre Kretyen. (Zan 13:35) Apre son premye vizit kot en Lasal Rwayonm, en zonm ti dir: “Dan zis en zour mon ti rankontre pli bokou dimoun ki vreman annan lanmour, bann dimoun ki mon pa ti konn ditou, ki zanmen mon’n deza zwenn dan legliz kot mon’n ganny elve. I ti evidan ki mon’n trouv laverite.” An rezilta, i ti sanz son fason viv, e set mwan plitar i ti batize. Wi, bann bon konportman i kapab annan gran lefe!
8 Si nou konport nou byen avek bann etranze ki nou rankontre, eski nou pa devret fer parey sirtou avek “nou bann frer dan lafwa”? (Gal. 6:10) Sa prensip i aplike: “Ou merit montre konsiderasyon pour en vye dimoun.” (Lev. 19:32) Sa bann dimoun pa devret zanmen ganny inyore dan nou bann rasanbleman.
9 Port byen Latansyon: Pandan bann renyon kongregasyon, bann minis Kretyen Bondye pe koz dan en fason pour transmet serten don spirityel pour batir nou. (Rom. 1:11) Nou pou sirman demontre en move konportman si nou dormi, manz tingonm dan en fason ki deranz lezot, tanzantan koz avek sa dimoun ki pe asiz obor nou, fer bann voyaz ki pa neseser dan twalet, lir bann dokiman ki napa nanryen pour fer avek renyon, oubyen fer lezot keksoz pandan renyon. Bann ansyen i devret egzanpler dan sa domenn. Bon konportman Kretyen pou pous nou pour montre respe pour sa orater ek son mesaz ki baze lo Labib par donn li tou nou latansyon.
10 Deplis, pour rezon konsiderasyon pour sa orater ek lodyans, nou devret kit nou telefonn mobil tennyen pour pa distrer nou bann renyon.
11 Konportman ek Zanfan: Paran i devret touzour vey kondwit zot zanfan. Si en pti zanfan i konmans plere oubyen i konmans azite pandan renyon e sa pe deranz lezot, i bon pour sa paran sorti deor lasal oplivit posib pour kalme sa zanfan. Parfwa sa i kapab difisil, me rapel ki sa i montre ki ou atantif anver santiman lezot. Bann paran ki annan bann pti zanfan ki kapab azite pandan renyon i souvannfwa asiz deryer afen ki pli pti gin dimoun posib i ganny deranze si i neseser pour zot leve pandan renyon. Byensir, lezot dan lasistans i kapab montre konsiderasyon pour bann fanmiy par les bann plas deryer pour zot.
12 Paran i osi devret konnen ki zot zanfan pe fer avan e apre bann renyon. Bann zanfan pa devret pe tay anndan dan lasal, sa i kapab koz aksidan. Taye deor otour Lasal Rwayonm i kapab osi danzere, partikilyerman aswar kot i difisil pour vwar byen tou keksoz. Koz tro for deor i kapab deranz bann vwazen e donn en move lenpresyon lo nou ladorasyon. Bann paran ki fer zefor konsyansye pour sirvey zot zanfan anndan e an deor Lasal Rwayonm i merit ganny felisite akoz sa i kontribye pour donn en latmosfer agreab ler nou rasanble ansanm dan linite.—Ps. 133:1.
13 Dan Letid Liv: Nou apresye lospitalite nou bann frer ek ser ki fer zot lakour disponib pour bann renyon kongregasyon. Kan nou asiste, nou bezwen montre respe ek konsiderasyon pour zot propriyete. Avan antre, nou devret byen eswiy nou soulye pour evite sali ater oubyen karpet. Bann paran i devret sirvey zot zanfan, fer sir ki zot reste dan sa landrwa kot letid liv pe deroule. Vi ki sa group i kapab pti e latmosfer i paret enformel, nou pa devret fer ki mannyer nou anvi dan lakour lezot. Paran i devret akonpanny zot pti zanfan letan i anvi servi kabinen. Deplis, vi ki letid liv i en renyon kongregasyon, nou devret abiy nou parey letan nou pe al Lasal Rwayonm.
14 Bon Konportman i esansyel: Konport nou byen parey bann Kretyen pa zis reflekte byen lo nou minister me osi i promot bann bon relasyon avek lezot. (2 Kor. 6:3, 4, 6) Konman bann adorater en Bondye ere, nou devret trouv li fasil pour sourir, vin agreab, e menm fer bann pti keksoz zantiy, ki anmenn lazwa pour lezot. Sa kalite kondwit i azout labote dan nou lavi konman bann dimoun ki atase avek Bondye.