Nou Lafwa i pous nou pour fer bann bon Aksyon
1 Lafwa ti fer Noe, Moiz, ek Raab pran aksyon. Noe ti konstri lars. Moiz ti abandonn bann benefis tanporer ki i ti kapab gannyen dan lakour rwayal Faraon. Raab ti kasyet bann espyon e apre obeir zot lenstriksyon, e son fanmiy ti kapab ganny sove. (Ebr. 11:7, 24-26, 31) Ozordi, ki bann bon aksyon ki nou lafwa i pous nou pour fer?
2 Rann Temwannyaz: Lafwa i motiv nou pour koz lo nou Bondye merveye ek son bann provizyon pour boner eternel. (2 Kor. 4:13) Parler, nou kapab santi nou en pe ezite pour donn en temwannyaz. Me ler nou ‘met Zeova devan nou konstaman,’ sa i fortifye nou e i diminyen lafreyer. (Ps. 16:8) Apre sa nou lafwa i pous nou pour partaz sa bon nouvel avek nou fanmiy, vwazen, koleg travay, kanmarad lekol, ek lezot dimoun dan tou lokazyon apropriye.—Rom. 1:14-16.
3 Rasanble ansanm: Asiste renyon regilyerman i en lot bon aksyon ki ganny motive par lafwa. Konman? I montre nou konviksyon ki Zezi i prezan parmi nou par mwayen lespri sen Bondye ler nou zwenn ansanm dan bann renyon Kretyen. (Mat. 18:20) I demontre nou dezir pour ‘ekout sa ki Lespri i dir kongregasyon.’ (Rev. 3:6) Nou pran oserye lenstriksyon ki nou resevwar akoz nou lizye lafwa i fer nou konpran ki sa enn ki pe ansenny nou i nou Gran Enstrikter, Zeova.—Iza. 30:20.
4 Swa ki nou fer: Konviksyon for ki nou annan lo bann realite ki nou pa vwar i motiv nou pour met bann keksoz spirityel premye dan nou lavi. (Ebr. 11:1) Sa i souvan enplik sakrifye bann keksoz materyel. Par egzanp, en ansyen ti refiz en loportinite pour ganny en pli bon pozisyon dan son travay akoz sa ti pou fer li mank bann renyon, lwen avek son fanmiy, e aret son servis pionye. Fotespere ki nou osi nou met tou nou konfyans dan lasirans ki Labib i donnen, ki Zeova pou fourni bezwen sa bann ki ‘kontinyen rod plito Rwayonm Bondye ek son lazistis.’—Mat. 6:33.
5 Lezot i remark sa lenfliyans pwisan ki lafwa i fer lo nou lavi. Annefe, nou lafwa i ganny rekonnet partou dan lemonn. (Rom. 1:8) Alor, annou demontre par nou bann bon aksyon ki nou lafwa i vivan.—Zak 2:26.