Progranm Konstriksyon Lasal Rwayonm i progrese
1 An 1983, dan lasanble distrik “Kingdom Unity” an Letazini, en lanons ti ganny fer ki pou annan en fon spesyal ki pou ganny etablir. Sa fon ti pou ganny servi pour ede konstri e repar bann Lasal Rwayonm partou dan Letazini ek Kanada. A sa moman nou pa ti ekspekte ki bann benediksyon sa pti konmansman ti pou anmennen. Nou ti konmans eksperyans pli plennman sa ki Psonm 92:4 i dir: “Ou’n fer mwan zwaye, O Zeova, par sa ki ou’n fer; par sa ki ou’n akonpli avek ou lanmen, mon kriye avek lazwa.”
2 Nou rezouir en kantite, letan nou vwar sa ki pe ganny akonplir. Ozordi i annan plis Lasal Rwayonm ki pe ganny konstri. Dan en fason ou en lot, nou tou nou annan sa privilez pour partisip dan sa aktivite. Nou partisipe letan nou fer bann kontribisyon finansyel pour ede konstri plis landrwa ladorasyon partou dan lemonn. Plizyer frer i pare pour servi zot lekipman osi byen ki zot letan, abilite, ek ekspertiz dan sa progranm konstriksyon. Gras a gidans, sipor, ek sa labondans benediksyon ki Zeova i donn nou, sa in anmenn sikse pour sa progranm konstriksyon atraver lemonn.—Psonm 127:1.
3 Plizyer brans in swiv sa model ki ti ganny etablir pour bann kongregasyon an Letazini. Dan bann Lasal Rwayonm dan serten pei, i annan en bwat kot bann proklanmater i met zot kontribisyon pour Fon Lasal Rwayonm. An Letazini, Nou Minister Rwayonm pour Mars 1997 ti anons en azisteman dan sa progranm. I ti deklare: “Depi ki Fon Lasal Rwayonm Lasosyete ti ganny etablir an 1983, bann frer in kontribye bokou, ki’n permet bann lón ganny donnen pour konstriksyon Lasal Rwayonm. Deza apepre 2,700 kongregasyon dan sa pei in benefisye avek sa laranzman. San sa lón plizyer kongregasyon pa ti pou’n kapab konstri nouvo Lasal Rwayonm oubyen repar bann ki fodre ganny repare. Aprezan i annan en bezwen irzan pour servi en pe sa bann larzan ki’n ganny anmase pour donn en lón avek bann kongregasyon ki dan bann pei ki eksperyans gran problenm ekonomik. Ou sipor ki ou pe kontinyen donnen anver sa laranzman i vreman ganny apresye par Lasosyete e par bann kongregasyon ki benefisye avek ou kontribisyon.”
4 Sa lanons ti konman en lenvitasyon pour partisip dan en pli gran progranm konstriksyon Lasal Rwayonm. Sa Fon Lasal Rwayonm pou osi ganny servi pour ed nou bann frer ek ser dan lezot pei, e i pou kontinyen fourni lón pour konstri Lasal Rwayonm an Letazini. Dan en lot lartik dan Nou Minister Rwayonm pour mwan Out 1997 ki ti koz lo sa menm topik, ti deklare: “I toultan annan en bezwen pour konstri Lasal Rwayonm partou dan lemonn. Zis pandan sa dernyen lannen servis, 3,288 nouvo kongregasyon ti ganny formen. Plizyer sa bann kongregasyon i Lafrik, Lazi, Sant ek Sid Lanmerik, ek Les Lerop.”
5 Ki bann rezilta ki’n annan depi sa letan? Annuaire 2001 i raporte: “Avek sa laranzman, dan 30 pei, 453 Lasal Rwayonm in ganny fer ziska prezan, e ankor 727 batiman pe ganny konstri. Lanfaz in ganny mete pour devlop bann plan Lasal Rwayonm standar pour sak pei dapre bann metod ek materyo konstriksyon ki zot servi lokalman. An Kenya, bann ros i ganny servi; an Togo i komen pour servi brik; an Kameroun i popiler pour servi bann blok ki bezwen ganny krepi. Dan sa fason, bann frer lokal i vitman ganny formen pour siperviz sa travay dan zot prop pei.”
6 Nou kapab trouv levidans ki Zeova pe beni sa progranm lo sa gran kontinan Lafrik. Letan ou get portre serten Lasal Rwayonm ki’n ganny konstri, mazin sa lenpak ki bann tel konstriksyon in annan lo bann Temwen Zeova! Sa i vre dan trwa domenn diferan—linite bann frer ek ser dan lemonn, lefe lo kominote lokal, ogmantasyon dan lakantite dimoun ki asiste renyon kongregasyon. Sa sipleman pe fer resorti zis bann Lasal Rwayonm ki’n ganny konstri an Lafrik. Me bann prosenn edisyon Nou Minister Rwayonm pou konsantre lo konman progranm konstriksyon Lasal Rwayonm pe progrese dan lezot rezyon lemonn.
[Portre lo paz 3]
REPIBLIK SANT LAFRIK
Bimbo, Bangui
Begoua, Bangui
[Portre lo paz 4]
Ukonga, Tanzania
[Portre lo paz 4]
Accra, Ghana
[Portre lo paz 4]
Salala, Liberia
[Portre lo paz 4]
Allada, Benin—ansyen Lasal Rwayonm
[Portre lo paz 4]
Allada, Benin—nouvo Lasal Rwayonm
[Portre lo paz 4]
Karoi, Zimbabwe
[Portre lo paz 5]
Kpeme, Togo
[Portre lo paz 5]
Sokodé, Togo
[Portre lo paz 5]
Fidjrosse, Benin
[Portre lo paz 6]
Lyenga, Zambia—ansyen Lasal Rwayonm
[Portre lo paz 6]
Lyenga, Zambia—nouvo Lasal Rwayonm
[Portre lo paz 6]
Kinshasa, Congo
[Portre lo paz 6]
Musambira, Rwanda