Viv an akor avek nou Dedikasyon
1 Ki swa ou’n fek batize oubyen ou’n batize depi lontan, i tre probab ki ou ankor rapel sa levennman enportan dan ou lavi. Nou batenm i pa lafen, me plito, i konmansman en lavi ki’n dedye pour servis Bondye ki kapab dir pour touzour. (1 Zan 2:17) Kwa ki enplike pour viv an akor avek nou dedikasyon?
2 Swiv Legzanp Zezi: Dek konman i ti batize, Zezi “ti konmans son misyon” pour deklar “Bonn Nouvel konsernan Rwayonm Bondye.” (Lik 3:23; 4:43) Pareyman, omoman ki nou senboliz nou dedikasyon avek Zeova par batenm, nou vin bann minis ordonnen sa bon nouvel. Menm si bokou letan ek zefor i neseser pour nou ganny bann keksoz ki nou bezwen dan lavi, nou karyer, oubyen travay prensipal, i nou minister Kretyen. (Mat. 6:33) Olye fer bokou zefor pour ganny larises oubyen pour vin renonmen, bann ki’n dedye zot lavi avek Bondye i esey ‘glorifye zot minister,’ parey zapot Pol. (Rom. 11:13, NW ) Eski ou seri ou privilez pour servi Zeova e fer tou sa ki ou kapab pour akonpli li?
3 Parey Zezi, nou devret “reziste kont dyab.” (Zak 4:7) Satan ti tant Zezi apre Son batenm. Pareyman, ozordi i pe target bann serviter Zeova ki’n dedye zot lavi. (Lik 4:1-13) Etan donnen ki nou antoure avek lemonn Satan, nou devret annan disiplin lo nou lekor, evit okenn keksoz ki kapab kontamin nou lespri oubyen polye nou leker. (Prov. 4:23; Mat. 5:29, 30) Bann Kretyen i ganny konseye ki “zot pa kapab an menm-tan partisip atab avek Senyer e avek demon.” (1 Kor. 10:21) Pour nou kapab evite fer sa, fodre ki nou fer atansyon move frekantasyon, bann divertisman ki pa apropriye, e danze ki egziste lo Internet. Fodre ki nou osi rezet bann lenformasyon sorti kot bann aposta. Kan nou reste lo nou gard kont sa bann keksoz ek lezot taktik Satan, sa pou ed nou pour viv an akor avek nou dedikasyon.
4 Servi sa ki Bondye in fourni: Zeova in fourni lasistans par mwayen son Parol ek kongregasyon Kretyen pour ed nou kapab viv an akor avek nou dedikasyon. Lektir Labib ek lapriyer i devret vin en par nou lavi toulezour. (Zoz. 1:8; 1 Tesa. 5:17) Pran plezir dan bann renyon kongregasyon. (Ps. 122:1) Asosye avek bann ki annan lakrent pour Zeova e osi ki gard son bann komannman.—Ps. 119:63.
5 Avek led Zeova, ou kapab viv an akor avek ou dedikasyon ki ou’n fer avek li e annan lazwa pour servi li pour touzour.—Ps. 22:26, 27; Fili. 4:13.