Byenfe ki Servis Pionye i anmennen
1, 2. Ki byenfe ki asosye avek servis pionye, e akoz?
1 En pionye ti dir: “Mon konnen ki napa okenn lot travay ki pou kapab donn mwan sa satisfaksyon ki mon gannyen ler mon partaz laverite avek lezot.” En lot ser ti dir: “Alafen sak lazournen, mon dormi byen e mon leker i ranpli avek lazwa.” Sa de pionye i koz pour bann frer ek ser partou dan lemonn ki’n gout bann byenfe ki servis pionye i anmennen.—Prov. 10:22.
2 Ed lezot pour ganny konnesans ki donn lavi dan Parol Bondye, i anmenn vre satisfaksyon. (Akt 20:35; 1 Tesa. 2:19, 20) En frer ki fer pionye depi lontan ti ekrir: “I eksitan e fortifye lafwa pour vwar konman Parol Bondye i pwisan pour kapab motiv dimoun pour fer bann sanzman dan zot lavi.” Wi, par fer zot disponib pour ed dimoun e kondwir bann letid Labib, bann pionye pou rezwir bann tel byenfe.
3, 4. Konman ki fer pionye i ansenny en dimoun pour depan lo Zeova, e konman ki i ed en dimoun pour grandi spirityelman?
3 Depan lo Zeova: Par depan lo lespri Bondye toulezour ler zot dan zot servis, i ed bann pionye pour devlop “fri Lespri” e i servi konman en proteksyon pour zot. (Gal. 5:16, 22, 23) Deplis, vi ki zot toultan pe servi Parol Bondye, bann pionye i souvan kapab byen servi Labib pour defann laverite e pour fortifye lezot. (2 Tim. 2:15) En frer ki’n fer pionye pour plizyer lannen ti dir: “Fer pionye in ed mwan pour ganny en konnesans oprofon lo Labib, en konnesans ki mon’n servi pour ed bokou dimoun aprann konn Zeova ek son plan.” Pa i vreman satisfezan!
4 Bann pionye ordiner i bezwen osi depan lo Zeova dan plizyer lezot fason. Zot lafwa i ganny fortifye ler zot vwar konman Zeova i beni zot zefor pour fourni zot bezwen materyel. En frer 72 an ki’n fer pionye ordiner pour 55 an ti dir: “Zeova pa’n zanmen dezapwent mwan.” Anplis ki sa, par gard zot lavi senp, bann pionye i protez zot lekor avek bokou traka lavi. Eski sa i atir ou?—Mat. 6:22; Ebr. 13:5, 6.
5. Konman ki fer pionye i ed en dimoun apros avek Zeova?
5 Apros avek Bondye: Nou relasyon avek Zeova i en keksoz tre presye ki nou annan. (Ps. 63:3) Ler nou partisip plennman dan predikasyon akoz nou lanmour pour Zeova, sa relasyon i grandi plis. (Zak 4:8) En frer ki’n fer pionye pour plis ki 18 an ti dir: “Servis pionye i donn nou loportinite pour ‘goute e vwar konman Zeova i bon,’ e pour batir en relasyon pli for avek nou Kreater sak zour.”—Ps. 34:8.
6. Ki bann pionye i devret annan, e lekel ki benefisye apard ki bann pionye zot menm?
6 Apard ki annan en sitiasyon favorab pour kapab fer pionye, bann pionye i devret annan lafwa for, lanmour senser pour Bondye ek zot prosen, e pare pour fer bann sakrifis. (Mat. 16:24; 17:20; 22:37-39) Me zot figir zwaye partou dan lemonn, i endike ki byenfe ki servis pionye i anmennen i bokou pli gran ki bann sakrifis ki zot fer. (Mal. 3:10) Sa bann byenfe i pa zis pour bann pionye, me zot fanmiy ek kongregasyon i osi benefisye en kantite avek sa bon leta lespri ki bann pionye i demontre.—Fili. 4:23.