Ledikasyon ki anmenn ver Lavi
1 Pa nou kontan ler nou vwar lizye dimoun briye letan zot konpran laverite sorti dan Parol Bondye! Partaz konnesans Bondye ek son plan pour limanite avek lezot i vreman ankourazan. En tel ledikasyon i kapab anmenn en dimoun ver lavi eternel.—Zan 17:3.
2 Akoz i siperyer: Ozordi ledikasyon i ganny ofer par tou mwayen posib e lo tou size ki ou kapab mazinen. (Ekle. 12:12) Me en tel konnesans pa kapab ganny konpare avek valer “bann mervey ki Bondye in fer.” (Akt 2:11) Eski sa ledikasyon ki lemonn i ofer in kapab apros limanite pli pre avek Kreater e fer zot konn son plan? Eski i’n ed dimoun pour konpran ki i arive ler nou mor oubyen akoz i annan sa kantite soufrans? Eski i’n donn dimoun lespwar? Eski i’n ede amelyor lavi fanmiy? Non. Zis atraver ledikasyon sorti kot Bondye ki nou kapab ganny vre larepons pour bann kestyon pli enportan dan lavi.
3 Ledikasyon sorti kot Bondye i fourni en keksoz ki vreman manke dan sa lemonn ozordi. Sa i valer moral. Parol Bondye i retir konpletman rasism, lafyerte pour en pei oubyen tribi dan leker bann ki aksepte e aplik son lansennyman. (Ebr. 4:12) I’n pous bann dimoun pour rezet tou kalite vyolans e “met lo zot sa nouvo personnalite.” (Kol. 3:9-11, NW; Mik. 4:1-3) Deplis, ledikasyon sorti kot Bondye in donn plizyer milyon dimoun lafors pour rezet bann pratik ek bann tre ki Bondye pa kontan.—1 Kor. 6:9-11.
4 Akoz la i irzan: Nou Gran Enstrikter i atir nou latansyon lo sinifikasyon sa lepok ki nou pe viv ladan. Son zizman ki i’n donnen atraver bann profesi i kontyen lenformasyon azour ki devret ganny proklanmen partou lo later. (Rev. 14:6, 7) Kris pe dirize dan lesyel, tou bann fo larelizyon pou byento ganny devaste, e Rwayonm Bondye in pare pour detrir tou bann gouvernman lo later. (Dan. 2:44; Rev. 11:15; 17:16) Alor, i irzan pour dimoun konn sa Lerwa ki pe dirize ki Bondye in etablir, pour sorti dan Gran Babilonn, e pour kriy non Zeova avek lafwa. (Ps. 2:11, 12; Rom. 10:13; Rev. 18:4) Annou kontribye otan posib pour fer lezot ganny sa ledikasyon ki anmenn ver lavi.