Montre Lentere senser—Par adapte
1 Zapot Pol in kit en bon legzanp pour toultan adapte son prezantasyon avek lorizin ek fason panse son lodyans. (1 Kor. 9:19-23) Nou devret fer zefor pour fer parey. Si nou reflesir davans, nou kapab souvannfwa adapte legzanp prezantasyon ki dan Nou Minister Rwayonm pour satisfer bezwen bann dimoun dan nou teritwar. Ler nou pe apros en lakaz, nou kapab remark bann keksoz ki enteres sa dimoun e enkli zot dan nou prezantasyon. Me i annan en lot fason nou kapab adapte dan nou predikasyon.
2 Aziste dapre sa ki lezot i dir: Ler nou pe prezant sa bon nouvel, nou souvan demann en kestyon e envit bann dimoun pour reponn. Ki mannyer ou vwar zot larepons? Eski ou tant pour felisit zot e apre ou zis kontiny ou prezantasyon ki ou’n prepare? Oubyen eski sa ki ou dir i montre ki ou’n pran zot larepons an konsiderasyon? Si ou montre lentere senser dan sa ki lezot i dir, ou pou kapab demann lezot kestyon ki pa pou ofans zot, pour vwar kwa ki vreman dan zot lespri. (Prov. 20:5) Alor, ou pou kapab konsantre lo bann laspe mesaz Rwayonm ki adres direkteman sa ki pe trakas sa dimoun.
3 Nou bezwen pare pour koz lo bann lezot size apard sa bann ki nou’n plàn pour diskite. I kapab arive ki ler nou konmans nou konversasyon par koz lo en problenm ki pe arive aktyelman, sa dimoun i mansyonn en size lokal oubyen personnel ki pe trakas li. Dan sa ka, nou lentere senser pour satisfer son bezwen pou pous nou pour anmenn sa diskisyon biblik lo bann keksoz ki vreman enportan pour li.—Fili. 2:4.
4 Adapte nou Lapros: Ler sa dimoun i demann en kestyon, nou kapab vwar ki i byen pour kontiny sa diskisyon en lot ler apre ki nou’n kapab rod plis lenformasyon lo sa size. Nou kapab osi ofer bann piblikasyon ki koz plis lo sa topik. Tousala i montre nou lentere senser pour ed lezot konn Zeova.—2 Kor. 2:17.