“Delivrans i pros” Lasanble Distrik Temwen Zeova 2006
1. Konman pep Bondye dan letan ansyen ti demontre zot lapresyasyon pour vre ladorasyon, e ki loportinite nou osi nou annan ozordi?
1 Lerwa Izkiya dan ansyen Zida ti servi bann zonm pour delivre bann let pour demann lepep pour rasanble ansanm Zerizalenm. (2 Kron. 30:6, 13) Lafason ki bann dimoun ti azir ti demontre zot latitid anver vre ladorasyon. (2 Kron. 30:10-12) Dan bann mwan ki pe vini, bann serviter Zeova dan nou letan pou annan menm loportinite pour demontre zot profon lapresyasyon pour sa privilez pour rasanble ansanm pour ador Zeova. En let in ganny delivre kot ou kongregasyon pour envit ou asiste sa Lasanble Distrik, “Delivrans i pros.” Ki mannyer ou pou reazir anver sa lenvitasyon?
2. Ki nou kapab fer konmela menm pour benefisye plennman avek sa lasanble?
2 Fer Laranzman konmela menm: Nou pou benefisye plennman avek sa progranm spirityel ki pe ganny prepare avek lanmour si nou asiste progranm an antye. I byen pour konmans fer bann laranzman neseser konmela menm pour ou ek ou fanmiy kapab asiste tou le trwa zour. (Prov. 21:5) Bann preparasyon ki ou bezwen fer i enkli demann ou konze, diskit ou plan avek ou msye oubyen madanm ki pa Temwen, rod landrwa reste, e ed bann etidyan Labib pour asiste tou le trwa zour. Pa les sa bann keksoz enportan lo dernyen minit. Plito, priy lo la avek Zeova, e annan konfyans ki “li menm i pou azir.”—Ps. 37:5.
3. Akoz nou devret byen korpere avek bann laranzman ki’n ganny fer pour preparasyon lasanble distrik?
3 Lorganizasyon Zeova in fer bokou zefor pour asire ki lasanble distrik i ganny byen organize dan tou laspe. Lapresyasyon pour zefor ek sakrifis ki bann frer pe fer pour fer sa bann laranzman, konsiderasyon pour lezot ki pe asiste lasanble, ek respe pour laranzman teokratik i devret pous nou pour swiv byen sa bann gidans dan sa lartik.—1 Kor. 13:5; 1 Tesa. 5:12, 13; Ebr. 13:17.
4. Ki mannyer nou kapab ed sa bann ki annan bezwen spesyal?
4 Bezwen spesyal: Proverb 3:27 i dir: “Pa refiz sa ki byen bann ki merite, ler i dan pouvwar ou lanmen pour fer li.” Ki dibyen ou kapab fer pour lezot an rapor avek lasanble? Bann proklanmater aze, bann ki malad, bann serviter aplentan ek lezot i kapab bezwen en mwayen transpor ek landrwa reste. Bann fanmiy ki annan sa responsabilite prensipal pour ed sa bann dimoun. (1 Tim. 5:4) Si zot pa kapab fer li, lezot konpanyon Kretyen i kapab ede. (Gal. 6:10) Bann sirveyan letid liv i devret verifye ki laranzman in ganny fer byen davans pour sa bann dan zot group ki annan serten bezwen spesyal.
5. Ki nou kapab fer pour ogmant nou lazwa dan sa lasanble ki pe vini?
5 Bezwen Volonter: Tou dimoun ki asiste sa lasanble e benefisye avek sa nouritir spirityel ek loportinite pour asosye avek lezot pou sirman santi zot zwaye. Nou lazwa pou vin pli gran ankor si nou volonter pour ede avek travay ki bezwen ganny fer pour fer sa lasanble en sikse. (Akt 20:35) Komite lasanble pou byento envit lezot pour partisip dan sa travay. Eski ou pou kapab fer ou disponib pour ede?—Ps. 110:3.
6. Kwa ki ou apresye konsernan nou lasanble distrik annyel, e ki ou devret determinen pour fer?
6 Ler i ti pe asiste en lasanble distrik, en pti garson senk an ti dir: “Lasanble distrik i sa bout ki mon pli kontan dan ladorasyon Zeova.” Sa remark senser i ed nou tou pour realize ki kantite nou kontan ler nou asiste lasanble distrik tou le zan. I egzakteman parey sa ki en psalmis ti sante: “Vomye en zour dan ou lakour ki mil zour dan en lot landrwa.” (Ps. 84:10) Dan en kantik, David ti eksprim son dezir pour ‘reste dan lakaz Zeova toudilon son lavi pour kapab get avek lapresyasyon tanp Zeova.’ (Ps. 27:4) I ti en plezir pour David ler i ti parmi bann adorater Zeova. Annou imit son lapresyasyon pour vre ladorasyon par asiste tou le trwa zour Lasanble Distrik, “Delivrans i pros.”
[Bwat lo paz 3]
Ler Progranm
Vandredi ek Sanmdi
9:30 bomaten - 5:05 apremidi
Dimans
9:30 bomaten - 4:10 apremidi