Ki mannyer pour akonpli ou Lobzektif spirityel
1. Ki lobzektif bokou zenn Kretyen i kapab annan?
1 Konman en zenn Kretyen, sirman ou bann lobzektif i ganny enfliyanse par lanmour pour Zeova e par sa ki Zezi ti dir avek tou Kretyen pour ‘kontinyen rod plito Rwayonm Bondye.’ (Mat. 6:33) Petet ou annan lobzektif pour fer plis dan predikasyon par servi konman en pionye oubyen pour servi dan en landrwa kot i annan bezwen pour plis proklanmater. Serten i kapab pe mazin pour vin en volonter dan travay konstriksyon, dan en biro brans, oubyen vin en misyonner. Sa i vreman bann bon lobzektif ki pou anmenn lazwa!
2. Kwa ki kapab ed ou akonpli ou bann lobzektif?
2 En fason pour akonpli ou bann lobzektif i par met zot an ekrir. Latour Veyer le 15 Zilyet, 2004 (Angle/Franse) ti dir: “En lide ki pa kler dan ou lespri i kapab vin pli kler kan [ou] esey dir sa ki ou pe panse. Alors, [ou] kapab ekrir [ou] bann lobzektif lo en papye ek bann fason ki ou pou kapab akonpli zot.” Anplis ki sa, bann lobzektif i kapab ed ou pour evalye ou progre e reste determinen anmezir ki ou pourswiv en pli gro lobzektif.
3. Nonm ennde lobzektif ki kapab ed en dimoun pour kalifye pour batenm.
3 Bann Lobzektif: Si ou pa ankor batize, get byen sa ki ou bezwen fer pour ou kapab akonpli sa lobzektif. Petet ou pou bezwen en pli bon konprenezon lo bann lansennyman debaz Labib. Si i leka, fer li ou lobzektif pour etidye liv Ki Labib i dir. Get tou bann verse Labib ki’n ganny mete konman referans. (1 Tim. 4:15) Etablir en lobzektif pour lir Labib antye depi Zenez ziska Revelasyon, parey bann Betelit ek bann ki al lekol Gilead i ganny demande pour fer. Apre sa, gard en progranm pour lir Labib toulezour. (Ps. 1:2, 3) Mazinen ki mannyer sa pou ed ou progrese spirityelman! Konmans e termin sak lektir ek letid Labib avek en lapriyer ofon ou leker. Toultan rod bann fason pour aplik sa ki ou aprann.—Zak 1:25.
4. Ki lobzektif en Kretyen ki anvi servi Betel oubyen vin misyonner i kapab etablir?
4 Si ou’n fini batize, ki lezot lobzektif ou kapab pourswiv? Eski ou bezwen amelyor ou abilite pour prese? Par egzanp, eski ou kapab fer li ou lobzektif pour pli byen kapab servi Parol Bondye dan predikasyon? (2 Tim. 2:15) Ki mannyer ou kapab fer plis dan predikasyon? Etablir bann lobzektif ki spesifik ki ale avek ou laz e osi avek ou sitiasyon ki pou ed ou akonpli bann pli gro lobzektif.
5. Ki mannyer ler en frer ti etablir bann lobzektif sa ti ed li akonpli son lobzektif pour servi dan Betel?
5 En Zenn ki’n reisi: Kan Tony, ki annan 19 an ti vizit en biro brans Temwen Zeova, sa ti kree dan li en lanvi pour al servi dan Betel. Me i ti annan serten keksoz ki i ti bezwen aranze dan son lavi, e i pa ti ankor ni menm dedye son lavi avek Bondye. I ti deside pour aranz son lavi dapre fason azir Zeova e fer batenm vin son lobzektif. Apre ki i ti’n akonpli sa lobzektif, i ti anvi fer pionye asistan apre pionye ordiner. I ti ekrir dat lo son kalandriye kan i pou konmanse. Mazinen ki mannyer i ti kontan, apre ki i ti’n fer pionye pour en serten letan, i ti ganny envite pour al servi dan Betel!
6. Kwa ki kapab ed ou akonpli ou bann lobzektif?
6 Ou osi tou ou kapab akonpli ou bann lobzektif anmezir ki ou rod bann lentere Rwayonm premye. Gard ou “bann travay” devan Zeova dan lapriyer e fer gran zefor pour akonpli zot.—Prov. 16:3; 21:5.