Nou kontan pour fer tou sa ki nou kapab dan Servis Zeova!
1 Zapot Pol ti kontan pour fer tou sa ki i ti kapab pour akonpli son minister Kretyen. (2 Kor. 12:15) Pareyman ozordi, bokou Kretyen i travay dir konman pionye. Serten avek bann gran responsabilite fanmir i fer letan dan zot progranm byen sarze pour prese sak semenn. Serten avek bann problenm lasante grav i servi sa ptigin lenerzi ki zot annan pour promot lentere Rwayonm. Pa i vreman ankourazan pour vwar pep Zeova pe fer tou sa ki zot kapab dan servis Zeova malgre zot laz oubyen sirkonstans lavi!
2 Lanmour pour nou Prosen: Ler nou fer tou sa ki nou kapab pour servi Zeova, nou demontre lanmour pour Bondye ek nou prosen, i donn nou en konsyans kler. Akoz zapot Pol ti donn son lavi pour anons sa bon nouvel, avek lazwa i ti kapab dir: “La mon dir zot ozordi, si okenn ant zot i arive perdi, mon pa responsab.” (Akt 20:24, 26; 1 Tesa. 2:8) Pran par dan predikasyon otan ki nou kapab pou anpes nou drwa lavi dimoun.—Ezek. 3:18-21.
3 Nou santi nou ere ler nou travay dir pour ed lezot. (Akt 20:35) En frer ti dir: “I vre ki aswar, ler mon retourn dan lakour apre en zournen dan predikasyon, mon santi mwan fatige. Me mon santi mwan ere, e mon remersye Zeova pour donn mwan en lazwa ki personn pa kapab pran.”
4 Lanmour pour Bondye: Rezon pli enportan pour fer tou sa ki nou kapab dan servis Zeova i akoz i fer plezir nou Papa dan lesyel. Lanmour pour Bondye i pous nou pour obeir son komannman, e sa i enkli prese e fer disip. (1 Zan 5:3) Menm ler dimoun pa enterese oubyen opoz nou, avek lazwa nou kontinyen travay dir pour Zeova.
5 La i pa moman pour ralanti. Nou pe viv dan sa letan rekolt. (Mat. 9:37) Normalman en fermye i travay en kantite letan pandan en rekolt akoz letan i limite pour fer sa rekolt avan i konmans gate. Letan pour sa travay rekolt spirityel i osi limite. Fotespere nou tou nou kontinyen travay dir dan predikasyon, anmezir ki nou gard antet ki letan nou pe viv ladan.—Lik 13:24; 1 Kor. 7:29-31.