Eski ou pou antre par sa ‘gran Laport ki’n ouver pour fer en gran Travay’?
1. Ki sa ‘gran laport pour fer en gran travay’ ki’n ouver pour nou?
1 Kan en ‘gran laport pour fer en gran travay’ ti ouver pour zapot Pol, avek lantouzyasm i ti sezi sa loportinite pour promouvwar lentere Rwayonm menm si bokou ti opoz li. (1 Kor. 16:9) Ozordi apepre 642,000 proklanmater dan lemonn in antre dan en gran laport ki’n ouver pour fer en gran travay par vin pionye ordiner.
2. Akoz i bon pour evalye nou sitiasyon tanzantan?
2 Sirkonstans i sanze: Menm si nou sitiasyon personnel i kapab limit nou aktivite konmela, sirkonstans i sanze. Alors, i bon pour evalye nou prop sitiasyon tanzantan e pa esper en sirkonstans ideal. (Ekle. 11:4) Eski ou en zenn ki pros pour fini lekol segonder? Paran, eski byento ou zanfan pou konmans lekol? Eski ou pros pour pran retret? Sa bann tel sanzman i kapab permet ki ou annan plis letan e alors permet ou pour pran servis pionye ordiner. En ser ki ti’n eksperyans bann problenm lasante dan lepase ti deside fer pionye a laz 89 an. Akoz? Lefet ki i pa ti’n al lopital pour plis ki enn an, i ti santi ki son lasante ti pou permet li fer pionye.
3. Ki mannyer serten in fer bann azisteman pour fer pionye ordiner?
3 Dan ka Pol, depi okonmansman i ti anvi vizit son bann frer dan kongregasyon Korent. Olye fer sa, i ti plifere sanz son plan pour pres sa bon nouvel. Bokou ki pe fer pionye ordiner ozordi ti bezwen fer detrwa azisteman. Serten in senplifye zot lavi ziska sa pwen kot zot bezwen zis en travay amitan pour soutenir zot, lefet ki aprezan zot fer mwens depans. Zot in trouv plezir dan sa servis. E sa i en privilez. (1 Tim. 6:6-8) Serten koup in fer sanzman dan zot fason viv ki permet zis sa msye travay, e ki alor kree en loportinite pour sa madanm fer pionye.
4. Ki nou kapab fer si nou pa asire ki nou pou kapab fer sa kantite erdtan ki en pionye i fer?
4 Pa bezwen vitman rezet sa nide pour fer pionye akoz ou per ki ou pa pou kapab ganny sa kantite erdtan ki devret. Ou kapab fer zis en pti pe plis ki de erdtan par zour. Si ou pa asire ki ou pou kapab fer li, esey fer pionye asistan pour enn ou de mwan me avek bi pour ganny 70 erdtan. Sa pou permet ou pour eksperyans sa lazwa ki bann pionye i gannyen. (Ps. 34:8) Koz avek bann ki pe fer pionye. Petet zot in osi sirmont bann defi ki parey sa ki pour ou. (Prov. 15:22) Demann Zeova pour beni ou zefor pour fer plis dan predikasyon.—1 Zan 5:14.
5. Akoz vin en pionye ordiner i en karyer ki vo lapenn pourswiv?
5 En Karyer ki vo lapenn pourswiv: Servi konman en pionye ordiner i anmenn bokou benediksyon. I permet ou pour eksperyans sa gran lazwa ki ou gannyen ler ou donn plis. (Akt 20:35) Fer pionye pou amelyor ou abilite pour byen servi Parol Bondye. (2 Tim. 2:15) Ou pou ganny plis loportinite pour vwar lanmen Zeova ki pou soutenir ou personnelman. (Akt 11:21; Fili. 4:11-13) Fer pionye pou osi ed ou pour devlop bann kalite spirityel, parey landirans e i pou permet ou vin pli pros avek Zeova. (Zak 4:8) Eski ou kapab antre par sa gran laport ki’n ouver pour fer en gran travay e vin en pionye ordiner?