Donn lespwar bann pov
1 Zezi ti demontre en lentere spesyal dan bann dimoun pov. I ti annan bann lokazyon kot Zezi ti fer bann mirak pour ed dimoun pov e osi i ti geri bann malad, me sa ki ti pli enportan pour li se deklar sa “Bonn Nouvel” avek zot. (Mat. 11:5) Ozordi osi bann pov ensi ki lezot dimoun i benefisye atraver nou minister Kretyen.—Mat. 24:14; 28:19, 20.
2 Vre lespwar: Souvan bann sef relizye i promet bann pov ki zot pou prospere finansyerman si zot kontribye anver legliz. Parkont, Labib i ansennyen ki zis Rwayonm Bondye ki pou anmenn en lafen avek lapovrete e ki pou rezourd tou bann problenm limanite. (Ps. 9:18; 145:16; Iza. 65:21-23) Par montre bann pov sa ki Labib i vreman dir, nou donn zot sa lespwar e nou ed zot konble zot bezwen spirityel.—Mat. 5:3.
3 Bann Farizyen dan letan Zezi pa ti kontan bann dimoun pov, zot ti apel sa bann tel dimoun ‘am-ha·’aʹrets, ouswa “dimoun enferyer.” Parkont, Zezi ti vwar “zot disan” oubyen zot lavi konman “presye.” (Ps. 72:13, 14) Nou osi nou kapab imit Zezi e ‘montre faver’ anver bann pov par demontre en lentere personnel dan zot e osi par senpatiz avek zot dan zot bann problenm. (Prov. 14:31) Si nou fer sa nou pa pou koz an mal ouswa pas komanter lo bann dimoun ki viv dan bann kanton ki pov oubyen pou ezite pour pres avek zot. Laplipar parmi bann ki aksepte mesaz Rwayonm se sanmenm sa bann dimoun pov.
4 Ed bann pov la konmela: Kan nou ansenny bann prensip Labib avek bann pov dan teritwar nou ed zot pour apez lefe ki lapovrete i annan la konmela. Par egzanp, Labib i kondann soular, zwe larzan, pares, fimen e lezot pratik ki anmenn ver lapovrete. (Prov. 6:10, 11; 23:21; 2 Kor. 7:1; Efe. 5:5) Lekritir i ankouraz nou pour vin onnet e travay avek ‘tou nou leker’ ki en kalite ki bokou anplwayer i rode avan i anploy en dimoun. (Kol. 3:22, 23; Ebr. 13:18) Anfet, dan en resansman ki’n ganny fer, lamazorite anplwayer i dir ki “lonnekte ek lentegrite i bann kalite ki enpresyonn zot bokou kan en dimoun i vin rod en travay.”
5 Zeova pa ensansib anver soufrans bann pov. Byento Zezi Kri pou delivre “sa enn pov ki pe kriy osekour.” (Ps. 72:12) Antretan, nou annan sa privilez spesyal pour rekonfort lezot enkli bann pov avek sa mesaz lespwar dan Labib.