Keksoz ki nou kapab donn Zeova
1 Eski ou ti konnen ki bann imen i kapab donn Bondye en keksoz? Abel ti sakrifye serten son bann pli meyer zannimo pour Zeova. Noe ek Zob ti osi fer bann tel sakrifis. (Zen. 4:4; 8:20; Zob 1:5) Byensir, sa bann sakrifis pa fer nou Kreater vin pli ris dan okenn fason, vi ki i posed tou keksoz. Me sa bann sakrifis ti demontre sa lanmour profon ki sa bann zonm fidel ti annan pour Bondye. Ozordi, nou osi nou kapab servi nou letan, lenerzi, ek resours pour “rann glwar Bondye.”—Ebr 13:15.
2 Letan: Nou merit ganny felisite kan nou ‘servi byen’ nou letan. Sirtou kan nou pran sa letan ki nou pase dan bann keksoz mwen enportan pour partisip plis dan predikasyon! (Efe. 5:15, 16) Petet nou kapab aziste nou progranm pour ki nou kapab fer pionye asistan en mwan oubyen plis dan en lannen. Petet nou kapab pas plis letan ki labitid dan predikasyon. Par reste 30 minit an plis sak semenn pou ogmant nou aktivite predikasyon par o mwen de-z-erdtan par mwan.
3 Lenerzi: Pour nou kapab annan lenerzi pour servi dan predikasyon nou bezwen evit bann detant ek travay ki fer nou sitan fatige ki nou pa kapab donn Zeova nou meyer. Nou bezwen osi met de kote bann lenkyetid ki kapab fer nou “akable” e pran sa lenerzi ki nou ti kapab servi dan servis Bondye. (Prov. 12:25) Menm si nou annan en bon rezon pour trakase, i pli bon pour ‘larg nou fardo lo Zeova’!—Ps. 55:22; Fili. 4:6, 7.
4 Resours: Nou kapab donn nou bann resours materyel pour siport sa travay predikasyon. Pol ti ankouraz son bann frer ek ser Kretyen pour regilyerman “met dekote” en keksoz pour zot kapab donn bann ki dan bezwen. (1 Kor. 16:1, 2) Dan sa menm fason, nou kapab met en pe larzan dekote pour fer donasyon pour bezwen kongregasyon e osi pour sa travay mondyal. Zeova i apresye sa ki nou donn avek tou nou leker, menm si i pa bokou.—Lik 21:1-4.
5 Zeova in donn nou bokou keksoz. (Zak 1:17) Nou demontre nou lapresyasyon par donn avek en leker zenere nou letan, lenerzi ek lezot resours pour servi li. Kan nou fer sa, nou pe fer plezir Zeova “parski Bondye i kontan sa ki donn avek lazwa.”—2 Kor. 9:7.